திருநெல்வேலி, ஜூன் 3 தமிழ் நாட்டில் விழாக்கள் இல்லாத காலங்களில் நாட்டுப்புற கலைஞர் களின் வாழ்வாதாரத்தை காக்கும் வகையில், அவர்களுக்கு 6 மாதம் நிவாரணம் வழங்க அரசு நடவடிக்கை எடுத்து வருவதாக, நாட்டுப்புற கலைஞர்கள் நலவாரியத் தலைவர் வாகை சந்திரசேகர் தெரிவித்தார்.
நாட்டுப்புற கலைஞர்கள்
நாட்டுப்புற கலைஞர்கள் நல வாரியத்தின் திருநெல்வேலி மண்டல அளவிலான உறுப்பினர்களுக்கு நலத்திட்ட உதவிகள் வழங்கும் விழா திருநெல்வேலி ஆட்சியர் அலுவலகத்தில் நடைபெற்றது. இவ்விழாவில் பங்கேற்ற வாகை சந்திரசேகர் கூறியதாவது:
திருநெல்வேலி மண்டலத்திலுள்ள 5 மாவட்டங்களைச் சேர்ந்த 371 கலைஞர்களுக்கு ரூ. 13.17 லட்சம் மதிப்பில் நிதியுதவி மற்றும் நலத்திட்ட உதவிகள் வழங்கப்பட்டுள்ளன. நாட்டுப்புற, நாடக மற்றும் திரைப்பட கலைஞர்களுக்காக பெருமளவு நிதி ஒதுக்கி, அவர்களது தேவைகளை தமிழ்நாடு முதலமைச்சர் பூர்த்தி செய்து வருகிறார். மாவட்டம் வாரியாக கலைஞர்களை நேரடியாக சந்தித்து, அவர்களது குறைகளை சரி செய்யும் பணி நடந்து வருகிறது. மாவட்ட அளவிலான அரசு விழாக்களில் நாட்டுப்புற கலைஞர்களுக்கு வாய்ப்பு வழங்கி, சிறந்த ஊதியம் வழங்க நடவடிக்கை எடுக்கப்பட்டு வருகிறது.
நிவாரண உதவி
இந்து சமய அறநிலையத் துறை கட்டுப்பாட்டின் கீழ் உள்ள கோயில்களில் காலியாக உள்ள நாதஸ்வர மற்றும் தவிலிசை கலைஞர்களுக்கான பணியிடங்களை நிரப்புவதற்கு, இயல் இசை நாடக மன்றம் அரசுக்கு பரிந்துரை செய்துள்ளது. தமிழ்நாடு இசைப் பள்ளியில் 50 வயதுக்கு மேற்பட்டவர்களே பயிற்சியாளர்களாக நியமிக்கப்படுவர் என்ற அரசாணையை திருத்தி அமைக்கவும், வயது வரம்பை குறைக்கவும், நாட்டுப்புற கலைஞர்கள் நல வாரியத்தின் சார்பில் அரசுக்கு பரிந்துரை செய்யப்பட்டுள்ளது.
தமிழ்நாட்டில் விழாக்கள் நடைபெறும் 6 மாதங்களுக்கு மட்டுமே நாட்டுப்புற இசை கலைஞர்களுக்கு பணி இருக்கும். பணி இல்லாத மீதமுள்ள 6 மாதங்களுக்கு அவர்களது வாழ்வாதாரத்தை காக்கும் வகையில், நிவாரணம் வழங்க தமிழ்நாடு அரசு நடவடிக்கை எடுத்து வருகிறது.
விழாக்களில் நாடகங்கள், தெருக்கூத்துக்கள் நடத்துவதற்கான, காவல்துறை கட்டுப்பாடுகளை தளர்த்தக் கோரி அரசுக்கு பரிந்துரை செய்யப்பட்டுள்ளது. வரும் நாட்களில் விழாக்கள் அதிகம் நடைபெறும் என்பதால், ஒரு மாதத்துக்குள் அந்த தளர்வுகளை ஏற்படுத்த நடவடிக்கைகள் மேற்கொள்ளப்படும். இவ்வாறு அவர் தெரிவித்தார்.
நிகழ்ச்சியில், திருநெல்வேலி ஆட்சியர் ஆர்.சுகுமார், சட்ட மன்ற உறுப்பினர் அப்துல்வகாப் மாநகராட்சி மேயர் கோ.ராமகிருஷ் ணன் மற்றும் பலர் பங்கேற்றனர்.
