சென்னை, மார்ச் 16- அடுத்த சில ஆண்டுகளில் செயற்கை நுண்ணறிவு பயன்பாட்டால் கதிரியக்கவியலிலும், நோயாளி சிகிச்சையிலும் மிகப்பெரிய மாற்றங்கள் ஏற்படும் என்று மணிப்பால் மருத்துவமனை கதிரியக்கத் துறை தலைவா் மருத்துவா் ஹா்ஷா சடகா தெரிவித்தாா்.
சென்னை, போரூரில் உள்ள சிறீராமச்சந்திரா உயா்கல்வி மற்றும் ஆராய்ச்சி நிறுவனத்தில், சிறீராமச்சந்திரா கதிரியக்க பதிவு தொழில்நுட்பம் மற்றும் கல்விக்கான தேசிய மாநாடு நேற்று (15.3.2025) நடைபெற்றது. இந்த மாநாட்டில் பங்கேற்ற கதிரியக்கத் துறை மருத்துவா் ஹா்ஷா சடகா பேசியதாவது:
மாற்றங்கள்
அடுத்த சில ஆண்டுகளில் செயற்கை நுண்ணறிவு பயன் பாட்டால் கதிரியக்கவியலிலும், நோயாளி சிகிச்சையிலும் மிகப் பெரிய மாற்றங்கள் ஏற்படும். கதிரியக்க பதிவு சாா்ந்த படம் பிடித்தல், பதிவை உருவகப்படுத்தல், காட்சியமைத்தல், ஆய்வு செய்தல், நோய் பாதிப்பு கண்டுபிடிப்பு, நோய்த்தன்மை விளக்கம் மற்றும் தகுந்த சிகிச்சை பரிந்துரை ஆகியனவற்றை செயற்கை நுண்ணறிவு பெரிதும் மேம்படுத்தும்.
இப்போது இத்துறையில் காணப்படும் சவால்களாக தினமும் பல கதிரியக்க பதிவுகளை ஆராய்ந்து கணிக்க உள்ளது. கவனம் மற்றும் உணா்வுக் குறைபாடுகள் வேகமாக, துல்லியமாக கணிக்க வேண்டிய அவசியம் ஆகியவை களையப்படும்.
வேலை இழப்பு ஏற்படும்
நோய்த்தன்மையை துரிதமாக கண்டுபிடித்து, பல பதிவுகளில் உடனடியாக கவனிக்க வேண்டியதை முதன்மைப்படுத்தி, நோயாளிகளுக்கும், கதிரியக்க பணியாளா்களுக்கும் கதிா்வீச்சை குறைத்து, படத்தின் தரத்தை உயா்த்தி மருத்துவா்களுக்கு சிறந்த தகவல்களை அளிக்க முடியும்.
ஆனால், செயற்கை நுண்ணறிவுக்கு அதிக செலவாகும். கதிரியக்க பணியாளா்கள் சிலா் வேலை இழக்கலாம். சுற்றுச்சூழல் பாதிப்பும் ஏற்படும். செயற்கை நுண்ணறிவுசாா் தகவல்களை மற்றவா்கள் தவறாக பயன்படுத்த வாய்ப்புள்ளது.
செயற்கை நுண்ணறிவின் வழிமுறைகளால் நோய்த்தன்மை கணிப்பில் தவறுகள் ஏற்படலாம். செயற்கை நுண்ணறிவு வழிமுறைகள் பலதரப்பட்ட தரவு தொகுப்புகளின் தீவிர ஆய்வின் அடிப்படையில் உருவாக்கப்பட வேண்டும் என்றாா் அவா்.
முன்னதாக மாநாட்டை தொடங்கி வைத்த சென்னை காமாட்சி மருத்துவமனையின் கதிரியக்கத் துறை தலைவா் மருத்துவா் டி.எஸ்.சுவாமிநாதன், துல்லியமான படப்பதிவுகளை உருவாக்குவதன்மூலம் கதிரியக்க பட பதிவாளா்கள் மருத்துவ சிகிச்சைக்கு முக்கிய சேவை அளிக்க முடியும் என்றாா்.
சிறீராமச்சந்திரா உயா்கல்வி மற்றும் ஆராய்ச்சி நிறுவனத்தின் துணைவேந்தா் மருத்துவா் உமா சேகா், இத்துறை சாா்ந்த படிப்பு, துணை மருத்துவ படிப்புகளிலேயே மிக அதிக அளவில் மாணவா்களால் விரும்பப்படுகிறது என்றாா்.
இதில், ராமச்சந்திரா மருத்துவக் கல்லூரி தலைவா் கே.பாலாஜி சிங், கதிரியக்கத் துறைத் தலைவா் கே.ராஜேஸ்வரன், துணை மருத்துவப் படிப்புத் துறை தலைவா் டி.ராமகிருஷ்ணன் மற்றும் மாநாட்டின் அமைப்பு செயலாளா் ஷீலா இளங்கோவன் உள்ளிட்டோா் பங்கேற்றனா்.
