அமைச்சா் அன்பில் மகேஸ்
சென்னை, ஜன.21 அனைவருக்கும் கல்வியை வழங்குவதன் மூலம் வறுமையை ஒழிக்க முடியும் என பள்ளிக்கல்வித் துறை அமைச்சா் அன்பில் மகேஸ் பொய்யாமொழி தெரிவித்தாா்.
காந்தியாரின் நினைவு தினத்தை முன்னிட்டு சென்னை கோட்டூா்புரத்தில் உள்ள அண்ணா நூற்றாண்டு நூலகத்தில் ‘நம்பிக்கை நகரம்: காந்தி, கிங் மற்றும் 1968 ஏழை மக்கள் இயக்கம்’ எனும் தலைப்பிலான கண்காட்சி ஜன. 20 முதல் 30-ஆம் தேதி வரை நடைபெறுகிறது.
இதனை பள்ளிக்கல்வித் துறை அமைச்சா் அன்பில் மகேஸ் பொய்யாமொழி நேற்று (20.1.2025) தொடங்கி வைத்து பேசியதாவது:
காந்தியாரும், மாா்டின் லூதா் கிங்கும் வெவ்வேறு பகுதி மற்றும் கலாசாரத்தை சோ்ந்தவா்களாக இருந்தாலும், இருவருக்கும் உள்ள ஒற்றுமை அகிம்சையை பின்பற்றுவது. பொருளாதார அடிப்படையில் ஒரு சமூகம் கட்டமைக்கப்படுகிறது. அதனால் ஒரு சமூகத்துக்கு பொருளாதார நீதி வழங்காமல் சமூக நீதி வழங்க முடியாது. சமூக சமத்துவத்தை ஏற்படுத்துவதில் கல்வி முக்கியப் பங்கு வகிக்கிறது.
அனைவருக்கும் கல்வி
அனைவருக்கும் கல்வியை வழங்குவதன் மூலம் வறுமையை ஒழிக்க முடியும். அந்த வகையில் தற்போது தொடங்கியுள்ள கண்காட்சி இளைஞா்களுக்கு வரலாற்றை அறிந்துகொள்ள உதவும்.
இன்றைய நவீன உலகில் காந்தியார் மற்றும் மாா்டின் லூதா் கிங்கின் கருத்துகள் எப்படி எடுத்துக்கொள்ள முடியும் என்ற கேள்வி இளைஞா்கள் மத்தியில் எழுகிறது. தற்போதைய காலகட்டத்தில் இணைய ரீதியான பாதிப்பு, காலநிலை மாற்றம் மிகப்பெரிய பிரச்னையாக பாா்க்கப்படுகிறது. இதுபோன்ற சூழ்நிலைகளை எவ்வாறு எதிா்த்து போராடுவது என்பதை
காந்தியார், மாா்ட்டின் லூதா் கிங் போன்ற தலைவா்களின் வரலாற்றில் இருந்துதான் அறிந்துகொள்ள முடியும் என்றாா் அவா்.
அமெரிக்க துணைத் தூதரகத்தின் பொது உறவு நய அதிகாரி ஜீன் பிரிகாண்டி கூறுகையில், காந்தியாரின் தத்து வங்கள், கோட்பாடுகள் மீது மாா்ட்டின் லூதா் கிங்குக்கு ஏற்பட்ட தாக்கம் அமெரிக்க மக்கள் உரிமைகள் இயக்கத்தில் பெரும் பங்கு வகித்தது. அமெரிக்க சமூக முன்னேற்றத்தில் இந்தியா முக்கியப் பங்கு வகித்துள்ளது என்றாா் அவா்.
நிகழ்ச்சியில் ஆப்பிரிக்க அமெரிக்க வரலாறு மற்றும் கலாசார தேசிய அருங்காட்சிய கண்காணிப்பாளா் ஆரோன் பிரையன்ட், ரீரீட்டி அறக்கட்டை நிறுவனா் தேஜஷ்வி ஜெயின், சென்னை ஃபோட்டோ பைனாலே அறக்கட்டளை இயக்குநா் சுச்சி கபூா் உள்ளிட்டோா் பங்கேற்றனா்.
