ஆவடி, அக்.15- தமிழ்நாடு அரசு கடந்த ஆண்டு செப்டம்பர் மாதம் கலைஞர் மகளிர் உரிமைத் தொகை திட்டத்தை தொடங்கி செயல்படுத்தி வருகிறது. ஒரு கோடி பயனாளர்களை இலக்காகக் கொண்டு பொருளாதாரத் தகுதிகள் வரையறுக்கப்பட்டன.
ஆனால் ஒரு கோடிக்கும் அதிகமா னோர் அரசு அறிவித்த பொருளாதாரத் தகுதிப் பட்டியலுக்குள் வந்தனர். தகுதி வாய்ந்த அத்தனை மகளிருக்கும் மாதம் தோறும் 1000 ரூபாய் வழங்க தமிழ்நாடு அரசு உத்தரவிட்டது.
முதற்கட்டமாக ஒரு கோடியே 6 லட்சத்து 52 ஆயிரம் பேருக்கு கலைஞர் மகளிர் உரிமைத் தொகை வழங்கப்பட்டது. நிராகரிக்கப்பட்டவர்கள் மீண்டும் மேல்முறையீடு செய்த நிலையில் ஆவ ணங்கள் சரிபார்க்கப்பட்டு தொடர்ந்து பயனாளர்களின் எண்ணிக்கை அதி கரிக்கப்பட்டு வந்தது.
சுமார் ஒரு கோடியே 15 லட்சம் பயனாளர்கள் இணைக்கப்பட்டிருந்த நிலையில் மீண்டும் ஒரு லட்சத்து 48 ஆயிரம் பேர் சேர்க்கப்பட்டனர். தற்போது ஒரு கோடியே 16 லட்சம் பேர் பயனாளர்களாக இணைக்கப்பட்டுள்ள போதிலும் பலர் இன்னும் திட்டத்தில் இணையாமல் உள்ளனர்.
2 கோடியே 24 லட்சத்துக்கும் அதிகமான குடும்ப அட்டைகள் உள்ள நிலையில் ஒரு கோடிக்கும் அதிகமானோர் திட்டத்தில் இணைய முடியாமல் உள்ளனர். மகளிர் உரிமைத் தொகை திட்ட விண்ணப்பப் பதிவு முகாமை மீண்டும் நடத்த வேண்டும், பொருளாதார தகுதியில் தளர்வுகளை அறிவிக்க வேண்டும் என்று தொடர்ந்து மக்கள் கோரிக்கை வைத்து வருகின்றனர்.
‘கலைஞர் மகளிர் உரிமைத் தொகை’ திட்டம் துணை முதலமைச்சர் உதயநிதி ஸ்டாலின் வசம் உள்ள சிறப்புத் திட்ட செயலாக்கத் துறையின் கீழ் செயல்படுத்தப்பட்டு வருகிறது.
மகளிர் உரிமைத் தொகை திட்டத்தில் புதிய பயனாளர்களை இணைப்பது தொடர்பாக அவர் பேசியுள்ளார். உதயநிதி ஸ்டாலின் ஆவடியில் நடை பெற்ற அரசு விழாவில் 17,427 வீட்டு மனை பட்டாக்களுக்கான ஆணைகளை பயனாளிகளுக்கு வழங்கினார்.
அந்த நிகழ்வில் அரசால் பெண் களுக்காக செயல்படுத்தப்படும் திட்டங்கள் குறித்து பேசினார். “மகளிருக்கான விடியல் பேருந்து பயண திட்டத்தின் மூலமாக 520 கோடி ஒதுக்கப்பட்டுள்ளது. இதன்வாயிலாக மகளிர் மாதத்தோறும் ரூ.900 சேமிக்கின்றனர். மகளிரின் சுமைகளை குறைக்கும் வகையில், தமிழ்நாடு முதலமைச்சர் காலை உணவுத்திட்டத்தினை அறிமுகப் படுத்தினார்.
இத்திட்டத்தின் மூலம் திங்கள் முதல் வெள்ளி வரை 20 இலட்சம் மாணவர்களுக்கு பள்ளிக்கல்வித்துறையின் மூலமாக தரமான காலை உணவு வழங்கப்பட்டு வருகிறது.
‘புதுமைப் பெண்’ திட்டத்தின் வாயிலாக அரசுப்பள்ளியில் பயின்று உயர்கல்வி பயிலும் 3 இலட்சத்து 25 ஆயிரம் மாணவிகளுக்கு மாதந்தோறும் ரூ.1,000 வழங்கப்பட்டு வருகிறது. ‘தமிழ் புதல்வன்’ திட்டத்தின் மூலம் அரசுப்பள்ளியில் பயின்று உயர்கல்வி பயிலும் 3 இலட்சத்திற்கு அதிகமான மாணவர்களுக்கு மாதந்தோறும் ரூ.1,000 கல்வி ஊக்கத்தொகை வழங்கப்பட்டு வருகிறது.
மேலும், முக்கியமான திட்டமான கலைஞர் மகளிர் உரிமைத்திட்டம் பெண்கள் மத்தியில் மிகப்பெரிய வரவேற்பை பெற்றுள்ளது.
கடந்த ஆண்டு செப்டம்பர் மாதம் தொடங்கி இத்திட்டம் 1 கோடியே 16 இலட்சம் மகளிருக்கு மாதந்தோறும் ரூ.1,000 கலைஞர் மகளிர் உரிமைத்தொகை வழங்கப்பட்டு வருகிறது. கலைஞர் மகளிர் உரிமைத்தொகை கிடைக்காத மகளிர்கள் கோரிக்கை வைத்துள்ளார்கள்.
தங்களுடைய கோரிக்கைகளை தமிழ்நாடு முதலமைச்சர் கவனத்திற்கு கொண்டு சென்று விடுபட்ட தகுதிவாய்ந்த அனைத்து மகளிருக்கும் கலைஞர் மகளிர் உரிமைத்தொகை வழங்கிட நடவடிக்கை மேற்கொள்ளப்படும். இப்படி நம்முடைய அரசு தமிழ்நாட்டையும், தமிழ்நாட்டு மக்களின் வளர்ச்சிக்கும் அடுத்த கட்டத்திற்கு எடுத்து செல்ல தமிழ்நாடு முதலமைச்சர் பல்வேறு திட்டங்களை செயல்படுத்தி வருகின்றார்” என்று கூறினார்.
ஊரக உள்ளட்சித் தேர்தலுக்கான அறிவிப்பு விரைவில் வர உள்ள நிலையில் அதற்கு முன்பாக கலைஞர் மகளிர் உரிமைத் தொகை திட்ட விரிவாக்கம் குறித்த அறிவிப்பு வெளியாகும் என எதிர்பார்க்கப்படுகிறது. மகளிர் உரிமைத் தொகை திட்டத்தில் விடுபட்டவர்கள், நிராகரிக்கப் பட்டவர்கள், புதிய குடும்ப அட்டை பெற்றவர்கள் என பலரும் பயனடையும் வகையில் அந்த அறிவிப்பு அமையும்.
