Tamil Nadu Govt Competitive Exam Free Coaching:
தமிழ்நாடு அரசு பணிகள் மற்றும் ஒன்றிய அரசு பணிகளுக்காக நடத்தும் போட்டித்தேர்வுகளில் வெற்றிபெற உதவும் வகையில் தமிழ்நாடு அரசு இலவசமாக பயிற்சி அளிக்கிறது. அந்த வகையில் சென்னையில் போட்டித் தேர்விற்கான இலவச பயிற்சிக்கு 10.09.2204 அன்று முதல் விண்ணப்பிக்கலாம் என தமிழ்நாடு அரசு பயிற்சித் துறை அறிவித்துள்ளது.
தமிழ்நாடு அரசு மற்றும் ஒன்றிய அரசு பணிகளுக்காக போட்டித் தேர்வுகள் பல்வேறு தேர்வாணையங்கள் மூலம் நடத்தப்பட்டு வருகிறது. இத்தேர்வுகள் மூலம் தகுதியானவர்கள் தேர்வுச் செய்யப்பட்டு பணியமர்த்தப்படுகின்றனர்.
அந்த வகையில் தமிழ்நாட்டை சேர்ந்த இளைஞர்களுக்கு ஒன்றிய அரசின் துறைகள், ரயில்வே மற்றும் வங்கி தேர்வுகளில் வெற்றிபெறும் வகையில் தமிழ்நாடு அரசு இலவசமாக பயிற்சி அளிக்கிறது.
அரசு பணி போட்டித் தேர்வுக்கான இலவச பயிற்சி
டிஎன்பிஎஸ்சி (TNPSC) மற்றும் எஸ்எஸ்சி (SSC), அய்பிபிஎஸ் (IBPS),ஆர்ஆர்பி (RRB) ஆகிய முகமைகள் நடத்தும் போட்டித் தேர்வுகளில் கலந்து கொள்ளும் தமிழ்நாட்டைச் சேர்ந்த ஆர்வலர்களுக்கு தமிழ்நாடு அரசின் சார்பில் இயங்கும் போட்டித் தேர்வுகள் பயிற்சி மய்யங்களால் கட்டணமில்லாப் பயிற்சி வகுப்புகள், சென்னை, பழைய வண்ணை நகரில் உள்ள சர் தியாகராயா கல்லூரி வளாகத்தில் 500 ஆர்வலர்களுக்கும் மற்றும் சென்னை, சேப்பாக்கத்தில் உள்ள மாநிலக் கல்லூரி வளாகத்தில் 300 ஆர்வலர்களுக்கும் பயிற்சிகள் வழங்கப்பட்டு வருகிறது.
மேற்படி போட்டித் தேர்வுகளில் கலந்துகொள்ளும் ஆர்வலர்களுக்கான பயிற்சி வகுப்புகளுக்கு இணையவழியாக விண்ணப்பங்கள் பெற்று, புதிதாக சேர்க்கை நடைபெற உள்ளது. பயிற்சி வகுப்புகள் பிற்பகல் 2.00 மணி முதல் 5.00 மணி வரை 6 மாத காலம் வாராந்திர வேலை நாட்களில் நடைபெற உள்ளது.
இலவச பயிற்சிக்கான தகுதிகள்
பயிற்சி வகுப்புகளில் சேர விரும்பும் ஆர்வலர்கள் குறைந்தபட்சம் 10 ஆம் வகுப்பு தேர்ச்சி பெற்றிருப்பதோடு 01.01.2024 அன்று 18 வயதைப் பூர்த்தி செய்திருக்க வேண்டும். மேற்படி போட்டித் தேர்வுகள் பயிற்சி மய்யங்களில் உணவு மற்றும் தங்கும் வசதிகள் இல்லை.
செப்டம்பர் 29ஆம் தேதி வரை விண்ணப்பிக்கலாம் :
பயிற்சியில் சேர விரும்பும் ஆர்வலர்கள் போட்டித் தேர்வுகள் பயிற்சி மய்ய இணையதளம் https://cecc.in/ வாயிலாக 10.09-2024 முதல் 24.09.2024 வரை விண்ணப்பிக்கலாம். பயிற்சி வகுப்புகளில் சேர்க்கை தொடர்பான கூடுதல் விவரங்களை மேற்குறிப்பிட்ட இணையதள முகவரியில் பார்த்து தெரிந்து கொள்ளலாம்.
மேலும் விவரங்களுக்கு 044-25954905, 044-28510537 ஆகிய தொலைபேசி எண்களைத் தொடர்பு கொள்ளலாம். பத்தாம் வகுப்பில் பெற்ற மதிப்பெண்களின் அடிப்படையில் தமிழ்நாடு அரசால் நடைமுறைபடுத்தப்பட்டுள்ள இனவாரியான இடங்களுக்கு ஏற்ப ஆர்வலர்கள் தெரிவு செய்யப்பட்டு, தேர்ந்தெடுக்கப்பட்டவர்களின் விவரங்கள் மேற்குறிப்பிட்ட இணையதளத்தில் வெளியிடப்படும். அக்டோபர் மாதம் இரண்டாம் வாரத்தில் பயிற்சி வகுப்புகள் தொடங்கப்படும் என பயிற்சித் துறை தலைவர் அறிவித்துள்ளார்.
