ஒன்றிய அரசின் மொழிக் கொள்கையில் தமிழ்நாட்டிலும் கூட தமிழ் மொழிக்கு இடமில்லை என்பது பிஎம் சிறீ கேந்திரிய வித்யாலயா பள்ளிகள் மூலம் மீண்டும் தெளிவாகிறது.
திருச்சியில் உள்ள பிஎம் சிறீ கேந்திரிய வித்யாலயா எண் 2, 2025-2026 கல்வியாண்டிற்கான ஒப்பந்த ஆசிரியர் பணியிடங்களுக்கான நேர்காணல் அறிவிப்பை 16-03-2025 அன்று வெளியிட்டுள்ளது. இதில்: PGT (பட்டதாரி ஆசிரியர்): பொருளாதாரம், ஆங்கிலம், TGT (பயிற்சி பெற்ற பட்டதாரி ஆசிரியர்): ஹிந்தி, சமஸ்கிருதம், ஆங்கிலம், கணிதம், அறிவியல், சமூக அறிவியல், PRT (முதன்மை ஆசிரியர்): பொது மற்றும் இசைபோன்ற பாடங்களுக்கு ஆசிரியர்கள் தேவைப்படுகின்றனர். ஆனால், தமிழ் மொழி எந்த பணியிடத்திலும் குறிப்பிடப்படவில்லை. இது தமிழ்நாட்டின் மொழியை கேந்திரிய வித்யாலயா பள்ளிகளில் கற்பிக்க விருப்பமில்லை என்பதை உறுதிப்படுத்துகிறது.
தமிழ்நாடு முழுவதும் உள்ள 49 கேந்திரிய வித்யாலயா பள்ளிகளில், தகவல் அறியும் உரிமைச் சட்டத்தின்கீழ் பெறப்பட்ட தகவல்களின்படி, தமிழ் ஆசிரியர்கள் இல்லை, ஆனால் ஹிந்தி மற்றும் சமஸ்கிருத ஆசிரியர்கள் பெருமளவில் உள்ளனர். இந்தப் பள்ளிகள் தற்போது பிஎம் சிறீ என்ற பெயரில் மறுபெயரிடப்பட்டு, அதில் தேசியக் கல்விக் கொள்கை 2020 (NEP 2020) மற்றும் அதன் மும்மொழிக் கொள்கையை பின்பற்ற வேண்டும் என்று கூறப்படுகிறது. ஆனால் உண்மையில், இந்தப் பள்ளிகள் இன்னும் இருமொழிக் கொள்கையை (ஹிந்தி மற்றும் ஆங்கிலம்) மட்டுமே பின்பற்று கின்றன, தமிழ்நாட்டின் மொழியான தமிழை அவர்கள் கற்பிக்கக்கூட விரும்பவில்லை. ஆனால் இப்பள்ளிகளில் சமஸ்கிருதம் கற்பிக்கப்படுகிறது.
சமீபத்திய நிகழ்வுகளில் ஒன்றிய கல்வி அமைச்சர் புதிய கல்விக் கொள்கை 2020 வலியுறுத்தும் மும்மொழிக் கொள்கையைப் பின்பற்றி செயல்படும் பிஎம் சிறீ பள்ளிகளுக்கான புரிந்துணர்வு ஒப்பந்தத்தில் தமிழ்நாடு அரசு கையெழுத்திடவில்லை என்ற காரணத்தால், சமக்ர சிக்ஷா திட்டத்தின் மூலம் தமிழ்நாட்டிற்கு சேர வேண்டிய ரூ.2152 கோடி அளவிலான நிதியை நிறுத்தி வைத்து, சர்ச்சைக்குரிய கருத்துகளை தெரிவித்தார். இது தமிழ்நாட்டின் மொழியியல் அடையாளத்தையும், தமிழ் மக்களின் உரிமைகளையும் புறக்கணிப்பதாகும். தமிழ்நாடு அரசு இரு மொழிக் கொள்கையை (தமிழ் மற்றும் ஆங்கிலம்) பின்பற்றுகிறது, மற்றும் ஹிந்தியைத் திணிக்கும் முயற்சியாக தேசிய கல்விக் கொள்கை 2020-அய் எதிர்க்கிறது. ஆனால் மும்மொழிக் கொள்கையை வலியுறுத்தும் ஒன்றிய அரசு, தனது சொந்தப் பள்ளிகளில்கூட மாநில மொழியான தமிழை சேர்க்க மறுக்கிறது.
ஒன்றிய அரசு தமிழ்நாட்டின் பண்பாட்டையும், மொழியையும் மதிக்க வேண்டும். பிஎம் சிறீ கேந்திரிய வித்யாலயா பள்ளிகளில் தமிழை உடனடியாக அறிமுகப்படுத்த வேண்டும். மேலும் எஸ்.எஸ்.ஏ. (SSA) நிதியை தமிழ்நாட்டிற்கு வழங்க வேண்டும்.
ஒன்றிய அரசு மாநிலங்களுக்கு ஆண்டுதோறும் கல்விக்காக நிதியை ஒதுக்கி வருவது வழமையானதே! இப்பொழுது குறுக்குச் சால் ஓட்டுவானேன்?
மாநில அரசுகளின் ஆலோசனையையோ, கருத்தையோ கேட்காமல் ஒன்றிய பிஜேபி அரசு தான்தோன்றித்தனமாக ஒரு புதிய கல்வித் திட்டத்தைத் திணித்து, அந்த தேசிய கல்விக் கொள்கையை மாநில அரசு ஏற்றால்தான் வழக்கமாக ஆண்டுதோறும் மாநில அரசுக்கு அளிக்க வேண்டிய நிதி அளிக்கப்படும் என்று கூறி, அந்த நிிதியை அளிக்காமல் அடாவடித்தனம் செய்வது என்பது ஒரு நல்ல அரசுக்கு அழகல்ல.
தமிழ்நாட்டிற்கென்று தனிக் கல்விக் கொள்கை நடைமுறையில் இருக்கும்போது அதைப் புறந்தள்ளி கழுத்தில் கத்தியை வைத்து மிரட்டுவது போல நடந்து கொள்ளலாமா?
புதிய கல்வித் திட்டம் என்பது பெயரளவுக்குத்தான் சொல்லப்படுகிறதே தவிர, ஹிந்தி பேசும் மாநிலங்களில் மூன்றாவது மொழி என்பதே இல்லை. ஒன்றிய அரசு நடத்தும் தமிழ்நாட்டுப் பள்ளிகளிலும் மூன்றாவது மொழியாக தமிழைக் கற்றுத் தருவதும் கிடையாது.
வீண் வம்பை விலைக்கு வாங்குவது என்பார்களே, அதற்கு எடுத்துக்காட்டு, ஒன்றிய அரசின் இத்தகைய நடவடிக்கையே!
