எழுத்துரு அளவு Larger Font Smaller Font

விவசாய அதிகாரி ஆகலாம்

தமிழக அரசின் வேளாண் விரிவாக்க சார்நிலைப் பணியில் 333 உதவி வேளாண் அதிகாரி பணியிடங்கள் நேரடி நியமன முறையில் நிரப்பப்பட உள்ளன.

இதற்கான அறிவிப்பை  டி.என்.பி.எஸ்.சி.

வெளியிட்டுள்ளது. இப்பணிக்கு விண் ணப்பிக்க விரும்புவோர் பிளஸ் 2 படித்து விட்டு வேளாண்மை படிப்பில் 2 ஆண்டு கால டிப்ளமா முடித்திருக்க வேண்டும்.

எழுத்துத் தேர்வு, நேர்முகத் தேர்வு மதிப்பெண் அடிப்படையில் உதவி வேளாண் அதிகாரி பணிக்கு தேர்வுசெய்யப்படுவார்கள். எழுத்துத்தேர்வில் அப்ஜெக்டிவ் முறையில் கேள்விகள் இடம் பெறும்.

தமிழ்வழியில் படித்தவர்களுக்கு அரசு பணியில் 20 சதவீத இடஒதுக்கீடு அளிக்கப்படுவதால் வேளாண் டிப்ளமா படிப்பை தமிழ் வழியில் படித்தவர்களுக்கு 20 சதவீத பணியிடங்கள் ஒதுக்கப் பட்டுள்ளன. உதவி வேளாண் அதிகாரி பணிக்கு அடிப்படைச் சம்பளம் ரூ.5200, தரஊதியம் ரூ.2800 நிர்ணயிக்கப்பட்டுள்ளது.

எனவே, சம்பளம் தோராயமாக ரூ.20 ஆயிரம் கிடைக்கும். தற்போது அறிவிக்கப் பட்டுள்ள ஊதியக்குழுவின் பரிந்துரைகள் அமல்படுத்தப்படும்போது சம்பளம் கணிசமாக உயரும். உதவி வேளாண் அதிகாரிகள், வேளாண் அதிகாரி, உதவி இயக்குநர், துணை இயக்குநர் என வேளாண் துறையில் படிப்படியாக பதவி உயர்வும் பெறலாம்.

முக்கியத் தேதிகள்

எழுத்துத்தேர்வு, ஜூலை 2 அன்று சென்னை, கோவை, மதுரை, சேலம், திருச்சி, திருநெல்வேலி ஆகிய 6 நகரங்களில் நடைபெற உள்ளது.
தகுதியுடைய நபர்கள் டி.என்.பி.எஸ்.சி. இணையதளத்தை பயன்படுத்தி ஏப்ரல் மாதம் 7ஆம் தேதிக்குள் ஆன்லைனில் விண்ணப்பிக்க வேண்டும்.

தேர்வுக்கு ஆன்லைனில் விண்ணப்பிக்கும் முறை, தேர்வுக் கட்டணம், பாடத் திட்டம் உள்ளிட்ட விவரங்களை டி.என்.பி.எஸ்.சி .இணையதளத்தில் விளக்கமாக தெரிந்துகொள்ளலாம்.

தேர்வுத் தாள்கள்: 1. விவசாய பாடம், 2. பொது அறிவு

விவசாய பாடம்: 300 மதிப்பெண். இதில் கேட்கப்படும் 200 வினாக்கள் டிப்ளமா தரத்தில் இருக்கும்.

பொது அறிவு தாள்: 200 மதிப்பெண். இதில் இடம்பெறும் 100 கேள்விகளும் பிளஸ் 2 கல்வித் தரத்தில் அமைந்திருக்கும்.

நேர்முகத் தேர்வு: 70 மதிப்பெண்.

வயது வரம்பு: பொதுப்பிரிவினருக்கு 30 வயது.

எஸ்.சி., எஸ்.டி., பி.சி., எம்.பி.சி. உள்ளிட்ட இடஒதுக்கீட்டுப் பிரிவினருக்கு வயது வரம்பு ஏதும் கிடையாது.


நேற்று அரசு பள்ளி ஆசிரியர்; இன்று மாவட்ட கல்வி அதிகாரி

அரசு பள்ளி ஆசிரியர் ஒருவர் டி.என்.பி.எஸ்.சி. தேர்வில் வெற்றிபெற்று நேரடியாக மாவட்டக் கல்வி அதிகாரி பணிக்குத் தேர்வுசெய்யப்பட்டிருக்கிறார். அவர் ஒரு விவசாயி மகன் என்பது குறிப்பிடத்தக்கது. கடலூர் மாவட்டம் திட்டக்குடி அரசு மகளிர் மேல்நிலைப் பள்ளி பட்டதாரி ஆசிரியர் ஆர்.அறிவழகன்தான் இந்தச் சாதனைக்குச் சொந்தக்காரர்.

சொந்த ஊர் பெண்ணாடம் அருகேயுள்ள பெ.பொன் னேரி என்னும் குக்கிராமம். தந்தை ரெகுபதி, விவசாயி. தாயார் மணிமேகலை, இல்லத்தரசி. அரசு உயர் அதி காரியாக வர வேண்டும் என்பது அறிவழகனின் லட்சியம். ஆனால் நீண்ட போராட்டத்துக்குப் பின்னரே அவரது லட்சியம் நிறைவேறியுள்ளது. அரசு பள்ளியில் இடைநிலை ஆசிரியர் பணி, அதன்பிறகு பட்டதாரி ஆசிரியராகப் பதவி உயர்வு, தற்போது நேரடியாக மாவட்டக் கல்வி அதிகாரி பணிக்குத் தேர்வு என அவரது அடுத்தடுத்த வெற்றிகளின் பின்னே பல்வேறு போராட்டங்களும், தோல்விகளும் மறைந்து கிடக்கின்றன.

கிராமத்து விவசாயின் மகனான அறிழவகன் பிளஸ் 2 முடித்த பின்பு இடைநிலை ஆசிரியர் பயிற்சியில் சேர்ந்தார். அடுத்து, சென்னை பல்கலைக்கழகத்தில் அஞ்சல்வழியில் பி.ஏ. வரலாறு முடித்தார். அப்போது அவருக்குச் சட்டம் படிக்கும் ஆர்வம் உண்டாகவே அரசு சட்டக் கல்லூரியில் பி.எல். படித்தார். 2ஆம் ஆண்டு படித்துக்கொண்டிருக்கும்போது 1995இல் ஆசிரியர் தேர்வு வாரிய தேர்வில் தேர்ச்சி பெற்றார். அவருக்கு அரசு பள்ளியில் இடைநிலை ஆசிரியர் பணி கிடைக்கிறது.

அந்தப் பணியில் இருந்துகொண்டே சென்னை பல்கலைக்கழகத்தில் அஞ்சல்வழியில் எம்.ஏ. வரலாறும், அதைத் தொடர்ந்து சிதம்பரம் அண்ணாமலை பல்கலைக் கழகத்தில் பி.எட். படிப்பையும், காரைக்குடி அழகப்பா பல் கலைக்கழகத்தில் அஞ்சல்வழி யில் எம்.ஃபில். ஒன்றன்பின் ஒன்றாக முடித்தார்.

ஆசிரியர் பணியில் இருந்த அவருக்கு அய்.ஏ.எஸ். அதி காரி ஆக வேண்டும் என்ற ஆசை 2001-ல் ஏற்பட்டது. சென்னையில் உள்ள தமிழக அரசு சிவில் சர்வீசஸ் தேர்வு பயிற்சி மய்யத்தில் சேர்ந்தார். தொடர்ந்து முயற்சிசெய்தும் வெற்றி கிடைக்கவில்லை. துணை ஆட்சியர் ஆகும் நோக்கில் 2008இல் டி.என்.பி.எஸ்.சி. குரூப்-1 தேர்வுக்குத் தயாரானார். இதற்கிடையே, அந்த ஆண்டு அவருக்குப் பட்டதாரி ஆசிரியராக (வரலாறு) பதவி உயர்வு கிடைத்தது.

படித்தது ஒருபோதும் வீண்போகாது!

அரசு உயர் அதிகாரியாக வரவேண்டும் என்ற ஆசை நிறைவேறவில்லையே என்று கவலை ஒருபுறம் இருந் தாலும், இன்னொரு புறம் கையில் உள்ள ஆசிரியர் பணியைத் திறம்படச் செய்ய வேண்டும் என்று கருதி அதன்படி பணியைத் தொடர்ந்தார்.

இந்த நிலையில், 2014இல் 11 மாவட்டக் கல்வி அதிகாரிகளை நேரடியாகத் தேர்வுசெய்ய டி.என்.பி.எஸ்.சி. ஓர் அறிவிப்பை வெளியிட்டது. 600 மதிப்பெண்களுக்குக் கூடுதலாகப் பொது அறிவு பாடங்கள் சேர்க்கப்பட்டுப் புதிய மாற்றங்களோடு தேர்வு நடத்தப்பட்டது. ஏற்கெனவே அய்.ஏ.எஸ். தேர்வுக்கும், குரூப்-1 தேர்வுக்கும் தன்னை முழுவதுமாகத் தயார்படுத்தி யிருந்ததால், புதிய முறை டி.இ.ஓ. தேர்வைத் தன்னம்பிக் கையோடு எதிர்கொண்டார். முதல்நிலைத் தேர்வு, மெயின் தேர்வு, நேர்முகத் தேர்வு என அத்தனை தேர்வுகளிலும் வெற்றி. டி.இ.ஓ. தேர்வு முடிவு அண்மையில் வெளியிடப் பட்டது. பணிக்குத் தேர்வுசெய்யப்பட்ட ஒன்பது பேரில் அறிவழகனும் ஒருவர். தகுதி பட்டியலில் அவருக்கு 3-வது இடம் கிடைத்துள்ளது.

பட்டதாரி ஆசிரியராகப் பணியாற்றி வரும் அவர், மாவட்டக் கல்வி அதிகாரியாகப் பயிற்சி பெறும் நாளை ஆவலோடு எதிர்நோக்கிக் காத்திருக்கிறார்.

தனது தேர்வு தயாரிப்பு அனுபவங்கள் குறித்து அறிவழகன், எனது வெற்றிக்குப் பெரிதும் கைகொடுத்தது யூ.பி.எஸ்.சி. தேர்வு, டி.என்.பி.எஸ்.சி. குரூப்-1 தேர்வெழுதிய அனுபவம் தான். புதிய டி.இ.ஓ. தேர்வில் புதிதாக 2 பொது அறிவுதாள்கள் சேர்க்கப்பட்டது எனக்குப் பெரிதும் உதவிகரமாக இருந் தது. நீண்ட காலமாக அய்.ஏ.எஸ். தேர்வுக்கும், குரூப்-1 தேர்வுக்கும் படித்து வந்ததால் அந்த அனுபவம் டி.இ.ஓ. தேர்வில் பொது அறிவு தாளில் நல்ல மதிப்பெண் எடுக்க உதவியது. படித்தது ஒருபோதும் வீண்போகாது என்று சொல்வார்கள். அதுபோல எனது பழைய உழைப்பு டி.இ.ஓ. தேர்வுக்கு மிகவும் பயனுள்ளதாக இருந்தது.

டி.இ.ஓ. புதிய தேர்வுமுறையில் பொது அறிவு தாள்கள் சேர்த்திருப்பது வரவேற்கத்தக்கது. காரணம் பொது அறிவு தாளில் அனைத்துப் பாடங்களும் இடம்பெறுவதால் மாவட்டக் கல்வி அதிகாரியாகத் தேர்வுசெய்யப்படுபவர்கள் சிறப்பாகப் பணியாற்ற முடியும் என்றார்

மாற்றம் விரும்புபவர்களுக்கு ஒரு படிப்பு!

கல்வி, சமூகத்தில் பல மாற்றங்களை ஏற்படுத்தும். அந்தச் சமூக மாற்றங்களை எப்படிக் கொண்டு வருவது என்பதையே ஒரு படிப்பாகப் படித்தால் எப்படியிருக்கும்?

நம்மில் பலரும் சமூகத்தில் மாற்றத்தை ஏற்படுத்தத் தொடர்ந்து பல பணிகளை மேற்கொண்டு வந்திருப்போம். அதில் பல பிரச்சினைகளைச் சந்தித்திருப்போம். அப்போதெல்லாம், இந்தப் பிரச்சினைகளை எப்படி அணுகுவது என்பது பற்றி யாராவது சொல்லித் தந்தால் நன்றாக இருக்குமே என்று ஏங்கியிருப்போம் அல்லவா? வந்துவிட்டது, ஆட்சியியல் மாற்றத்தை வழிவகுத்தல் படிப்பு .

சர்வதேச அளவில் புகழ்மிக்க கல்வி நிலையங்களில் ஒன்று மும்பையில் உள்ள டாடா இன்ஸ்டிடியூட் ஆஃப் சோஷியல் சயின்சஸ் நிறுவனம். அதனுடன் சேர்ந்து நாட்டில் பல ஆண்டுகளாக, சமூக மாற்றத்துக்கான பல பணிகளை மேற்கொண்டு வரும் பாமரர் ஆட்சியியல் கூடம் எனப்படும் பேர்ஃபூட் அகாடமி ஆஃப் கவர்னென்ஸ் அமைப்பும் இணைந்து இந்த ஓர் ஆண்டு முதுநிலை பட்டய படிப்பை நடத்துகின்றன.
இந்தியா சுதந்திரம் அடைந்த பிறகு இரண்டு முக்கியமான மாற்றங்களைச் சந்தித்தது. ஒன்று, மக்கள் தங்களின் எல்லா தேவைகளுக்கும் அரசை மட்டுமே சார்ந்திருக்க வேண்டியதானது. இரண்டு, அனைத்து அதிகாரங்களும் ஒரே மய்யத்தில், அதாவது அரசிடம் மட்டுமே குவிக்கப்பட்டது. இன்று நாடு சந்திக்கும் பல பிரச் சினைகளுக்கும் இவைதான் காரணம். அந்தப் பிரச்சினைகளை எப்படி அணுகுவது என்பதைக் கற்றுத் தருவதுதான் இந்தப் படிப்பின் நோக்கம் என்று இந்தப் படிப்பைப் பற்றி விளக்கத் தொடங்கினார், முனைவர்

வி. சுரேஷ். அடிப்படையில் வழக்கறிஞரான இவர், மக்கள் சிவில் உரிமைக் கழகத்தின் தேசியச் செயலாளராகவும், சமூக மாற்றம் தொடர்பான களப் பணியாளராகவும் செயலாற்றிவருகிறார். இந்தப் படிப்பை உருவாக்கியதில் இவருக்கு முக்கியப் பங்குண்டு.   கூடுதல் விவரங்களுக்கு:: http://admissions.tiss.edu/view/10/admissions/stp-admissions/pg-diploma-in-facilitating-governance-reform/



.
 

இப்பிரிவில் அண்மைச் செய்திகள்:
இப்பிரிவில் முந்தையச் செய்திகள்:

தமிழில் கருத்துக்களை தெரிவிக்க -  


Security code
Refresh

Banner
Banner