மகளிர்

வடசென்னை ஆண்களின் விளையாட்டு எனப் பேசப்பட்ட கேரம் விளையாட்டை உலக அளவில் பேசவைத்தார், அதே பகுதியிலிருந்து வந்த ஒரு பெண். மூன்று முறை கேரம் உலக வாகையராக வெற்றிக்கொடி கட்டிய இளவழகிதான் அவர்.

சென்னையைப் பூர்வீகமாகக்கொண்ட இள வழகி, பிறந்து வளர்ந்தது வியாசர்பாடியில்தான். ஏழ்மையான குடும்பத்தில் பிறந்தவர். தந்தை இருதயராஜ் பிராட்வேயில் தள்ளுவண்டி ஓட்டி பிழைப்பு நடத்திய ஏழை கூலித் தொழிலாளி. வடசென்னைக்கே உரிய கேரம் விளையாட்டு மீதான ஆர்வம் அவருக்கும் இருந்தது. வடசென் னையில் எங்கே கேரம் போட்டி நடந்தாலும், அங்கே இருதயராஜ் ஆஜராகிவிடுவார். தந்தையிடமிருந்து தான் கேரம் விளையாட்டு மீது இளவழகிக்கும் ஆர்வம் பிறந்தது.

திருப்புமுனைப் பரிசு

ஆனால், கேரம் விளையாட்டு மீது இள வழகிக்குத் தணியாத தாகம். ஆறு வயது முதலே அக்கம் பக்கத்தில் கேரம் விளையாடத் தொடங்கி விட்டார். அந்தப் பகுதியில் இருந்த ஒரு கிளப்பில் தன் தந்தையின் நண்பர் உதவியுடன் கேரம் பயிற்சியை இளவழகி மேற்கொண்டுவந்தார். காலை நான்கு மணிக்கெல்லாம் எழுந்து பயிற்சிக்குச் சென்றுவிடுவார். கேரம் காய்களைக் குறிபார்த்து பாக்கெட் செய்யும் வித்தையைக் கற்றுக்கொண்ட இளவழகி, அந்த விளையாட்டின் நுணுக்கங்களையும் கற்றுக்கொண்டார்.

கேரம் விளையாட்டில் முன்னேறிவந்த இள வழகி, பத்து வயதிலேயே போட்டிகளில் பங்கேற்கத் தொடங்கிவிட்டார். முதன்முதலாக மாநில அள விலான போட்டியில் பங்கேற்றபோது, இரண்டாவது இடத்தைத்தான் பெறமுடிந்தது. ஆனால், அதன் பிறகு கொஞ்சம் கொஞ்சமாக கேரம் போட்டிகளில் ஜொலிக்கத் தொடங்கினார். மாநில அளவிலான போட்டிகளைத் தாண்டி, தேசிய அளவிலும் முத்திரை பதிக்கத் தொடங்கினார்.

உலக வாகையர்

தேசிய அளவில் முன்னேற்றம்கண்ட இளவழகி, 13 வயதில் தேசிய வாகையராக உருவெடுத்தார். இதனால், மாலத்தீவில் நடந்த கேரம் ஆசிய வாகையர் போட்டியில் பங்கேற்க இளவழகிக்கு வாய்ப்புக் கிடைத்தது. இந்தப் போட்டியில் இள வழகியின் பக்கம் வெற்றிக்காற்று வீசியது. கேரம் ஆசிய வாகையர் என்ற பெருமையோடு தமிழகம் திரும்பினார். கேரம் விளையாட்டில் தேசிய அளவிலும் சர்வதேச அளவிலும் முன்னேறிவந்த இளவழகிக்கு, 2006 மிகப் பெரிய வெற்றி ஆண்டாக அமைந்தது.

தேசியப் போட்டிகளில் முன்னேறி தரவரிசைப் பட்டியலில் முன்னிலை வகித்துவந்ததால், 2006இல் டில்லியில் நடைபெற்ற ராஜீவ் காந்தி 2ஆவது கேரம் உலகக் கோப்பைப் போட்டியில் பங்கேற்கும் வாய்ப்பு இளவழகிக்குக் கிடைத்தது. இறுதிப் போட்டியில் மகாராட்டிரத்தைச் சேர்ந்த ஆயிஷா முகமதை வீழ்த்தி முதன்முறையாக உலக வாகையரானார் இளவழகி. தொடர்ந்து 2008இல் பிரான்சில் நடைபெற்ற 5ஆவது உலக கேரம் வாகையர் பட்டப் போட்டி பெண்கள் ஒற்றையர் பிரிவிலும் பட்டம் வென்று அசத்தினார். இரட்டையர் பிரிவில் இரண்டாம் இடத்தைப் பெற்றார்.

இதுவரை தேசிய கேரம் விளையாட்டில் ஒட்டு மொத்தமாக 260 பதக்கங்களை இளவழகி வென்றி ருக்கிறார். இதில் 106 தங்கப் பதக்கங்கள் அடங்கும். இதேபோல் சர்வதேச அளவில் 125 பதக்கங்களை வென்றிருக்கிறார். தங்கப் பதக்கங்கள் மட்டும் 111.  இந்த அளவுக்கு கேரம் விளையாட்டில் சாதித்த இள வழகிக்குப் பெரிய அங்கீகாரம் ஏதும் கிடைக்க வில்லை. கேரம் விளையாட்டில் உலக வாகையர் பட்டம் வென்றபோது அவருக்கு ஒரு முறை தமிழக அரசு 10 லட்சம் ரூபாய் பரிசு அளித்தது. இந்தியாவில் கேரம் விளையாட்டில் அர்ஜுனா விருது பெற்ற ஒரே வீரர் என்ற பெருமை வடசென்னையைச் சேர்ந்த மரிய இருதயத்துக்கு உண்டு. ஆனால், பெண்கள் பிரிவில் இந்தியாவுக்குப் பெருமைசேர்த்த இளவழகிக்கு அந்த விருதுகூடக் கிடைக்காமல் போனது. நல்வாய்ப்பாக கேரம் விளையாட்டில் சாதித்ததற்காக ஓ.என்.ஜி.சி.யில் வேலை கிடைத்தது அவருக்கான ஓர் அங்கீகாரம்.

 

ஜோஷ்னா சின்னப்பா... உலக அளவில் சென்னையை ஸ்குவாஷ் விளையாட்டின் அடையாளமாக்கியவர். இளம் வயதிலேயே தேசிய அளவில் முத்திரை பதித்த வீராங் கனை. புகழ்பெற்ற பிரிட்டிஷ் ஸ்குவாஷ் வாகையர் போட்டியில் பட்டம் வென்ற முதல் இந்தியப் பெண் என்ற சிறப்பைப் பெற்றவரும் இவரே.

ஜோஷ்னாவின் பூர்வீகம் கர்நாடகத்தில் உள்ள குடகு. ஆனால், அவர் பிறந்து வளர்ந் தது எல்லாம் சென்னையில்தான். ஜோஷ் னாவுக்கு எட்டு வயதானபோது, அவர் வயதுடைய சிறுமிகள் எல்லாம் ஓடிப் பிடித்து விளையாடுவதில் ஆர்வம் காட்டினர்.  ஜோஷ்னாவின் கொள்ளுத் தாத்தா மேஜர் கரியப்பா, தாத்தா, அப்பா அஞ்சன் சின்னப்பா மூவருமே ஸ்குவாஷ் வீரர்கள். அவர்கள் வழிவந்த ஜோஷ்னாவுக்கும் ஸ்குவாஷ் மீது இயல்பாகவே ஆர்வம் பிறந்தது.

முத்தான முதல் சாதனை

ஜோஷ்னாவுக்குப் பத்து வயதானபோது ஸ்குவாஷ் அவரை முழுவதும் ஆக்கிரமித்து விட்டது. எதிர்காலத்தில் சிறந்த ஸ்குவாஷ் வீராங்கனையாக உருவெடுக்க வேண்டும் என்ற ஆசை அந்த வயதிலேயே அவருக்குள் ஊடுருவியது. அந்தக் காலகட்டத்தில் ஸ்குவாஷ் என்ற விளையாட்டே பெரிதாக தெரிந்திருக்க வாய்ப்பில்லை. ஆனால், அந்த விளையாட்டுதான் தனது எதிர்காலம் என்பதைச் சிறுவயதிலேயே தீர்மானித்து விட்டார் ஜோஷ்னா.

ஸ்குவாஷ் விளையாட்டை ஆத்மார்த்த மாக விளையாடத் தொடங்கிய ஜோஷ்னா, 14 வயதுக்கு உட்பட்டோருக்கான தேசிய ஸ்குவாஷ் போட்டியில் பட்டம் வென்று சாதனை படைத்தார். ஸ்குவாஷ் விளை யாட்டில் இதுதான் அவருடைய முத்தான முதல் சாதனை. ஒட்டுமொத்தமாக இந்தி யாவில் எந்த வீரர், வீராங்கனையுமே 14 வயதில் தேசிய அளவில் வெற்றிவாகை சூடியது இல்லை. இந்தச் சாதனை இன்றுவரை யாராலும் முறியடிக்கப்படவும் இல்லை.

சர்வதேசப் பயணம்

சர்வதேசப் போட்டிகளில் பங்கேற்கத் தொடங்கிய பிறகு 2004இல்தான் மிகப் பிரம்மாண்டமான வெற்றியை ஜோஷ்னா பதிவுசெய்தார். 19 வயதுக்குட்பட்ட பிரிட்டிஷ் ஸ்குவாஷ் ஓபன் டைட்டில் பட்டத்தை வென்று நாடு திரும்பினார். ஸ்குவாஷ் விளையாட்டில் புகழ்பெற்ற தொடராகப் பார்க்கப்படுவது பிரிட்டிஷ் ஓபன் டைட்டில். அந்த டைட்டிலை வென்ற முதல் இந்திய வீராங்கனையானார் ஜோஷ்னா. 2008இல் என்.எஸ்.சி. சூப்பர் சாட்டிலைட் டூர் பட்டம், 2010இல் அய்ரோப்பிய டூர் பட்டம் என ஸ்குவாஷில் ஜோஷ்னா வென்ற பட்டங்கள் அவரை மேலும் உச்சத்துக்குக் கொண்டு சென்றன. அய்ரோப்பிய டூர் பட்ட இறுதிப் போட்டியில் சென்னையைச் சேர்ந்த சக வீராங்கனை தீபிகா பலிக்கல்லைத் தோற் கடித்து ஜோஷ்னா பட்டம் பெற்றார்.

வேகத்தடையாக வந்த காயம்

சர்வதேசப் போட்டிகளில் அழுத்தமாகத் தடம் பதித்துவந்த வேளையில், அவரது பயணத்துக்கு வேகத்தடையாக வந்து நின்றது அவருக்கு ஏற்பட்ட காயம். 2012இல் ஏற்பட்ட காயம் அவரது ஸ்குவாஷ் வாழ்க்கையைத் தற்காலிகமாக முடக்கியது. முழங்காலில் ஏற்பட்ட காயத்துக்கு அறுவை சிகிச்சை, பிறகு ஓய்வு என எட்டு மாதங்கள் ஸ்குவாஷ் பக்கமே அவரால் தலைவைக்கக்கூட முடிய வில்லை. ஸ்குவாஷ் விளையாட்டின் பலமே கால்கள்தாம்.

கால்கள் வலுவாக இருந்தால்தான் ஸ்குவாஷ் விளையாட்டில் ஜொலிக்க முடியும். காயத்திலிருந்து மீண்டுவந்த ஜோஷ்னா, பழைய நிலையை அடைய கடுமையாகப் பயிற்சி செய்ய வேண்டியிருந்தது. தொடர்ச்சியாகப் பயிற்சியெடுத்து, கால்களைப் பலப்படுத்திய பிறகே அவரால் சர்வதேசப் போட்டிக்குத் திரும்ப முடிந்தது.

உச்சம் தொட்ட ஆண்டு

காயம் தந்த ஓய்வால் புத்துணர்வுடன் களமிறங்கிய ஜோஷ்னா, மீண்டும் ஸ்குவா ஷில் வெற்றிகளைக் குவிக்கத் தொடங்கினார். 2014, ஸ்குவாஷ் பயணத்தில் ஜோஷ்னா உச்சம் தொட்ட ஆண்டு. அந்த ஆண்டு அமெரிக்காவில் நடந்த ரிச்மண்ட் ஓபன் ஸ்குவாஷ் போட்டியில் வெற்றியை முத்த மிட்டவர். கிளாஸ்கோவில் நடைபெற்ற காமன் வெல்த் போட்டியில் தங்கப் பதக்கம் வென்று அசத்தினார். ஸ்குவாஷ் இரட்டையர் போட்டி யில் தீபிகா பலிக்கல்லுடன் இணைந்து இந்தத் தங்கப் பதக்கத்தை வென்றார். காமன்வெல்த் போட்டியில் முதன்முறையாகத் தங்கம் வென்ற வீராங்கனை என்ற பெருமை தீபிகா வுடன் சேர்ந்து ஜோஷ்னாவுக்கும் கிடைத்தது. அதே காலகட்டத்தில்தான் உலகின் நம்பர் ஒன் வீராங்கனைகளைப் பந்தாடி கனடாவின் வின்னிபெக் ஓபனிலும் பட்டம் வென்று அசத்தினார் ஜோஷ்னா.

தரவரிசையில் முன்னேற்றம்

2015இல் ஆஸ்திரேலியாவில் நடந்த விக்டோரியா ஓபனில் சாம்பியன், மும்பையில் நடந்த சர்வதேசப் போட்டியில் மீண்டும் சாம்பியன் என ஜோஷ்னா வெற்றி மேல் வெற்றிகளைக் குவித்துக்கொண்டே இருந் தார். சர்வதேச ஸ்குவாஷ் தரவரிசைப் பட்டி யலில் 15 இடங்களுக்குள் முன்னேற வேண்டும் என்பது ஜோஷ்னாவின் நீண்ட காலக் கனவு. அந்தக் கனவு 2016இல் நிறைவேறியது. 2014இல் 19ஆவது இடத்தில் இருந்த ஜோஷ்னா, 2016இல் 10ஆவது இடத்துக்கு முன்னேறிக் காட்டினார். ஸ்குவாஷ் விளை யாட்டில் இந்திய வீராங்கனை ஒருவரின் அதிகபட்ச முன்னேற்றம் இதுதான்.

தற்போது 32 வயதாகும் ஜோஷ்னா, இன்றும் 20 வயதில் ஆடிய அதே துடிப்புடன் விளையாடி வருகிறார். 2017இல் ஆசிய ஸ்குவாஷ் டைட்டில், 2018இல் கோல்ட் கோஸ்ட் காமன்வெல்த் போட்டியில் தீபிகா வுடன் இணைந்து வெள்ளிப் பதக்கம், 2018 ஆசிய விளையாட்டுப் போட்டி ஒற்றையர் பிரிவில் வெண்கலப் பதக்கம் எனப் புலிப் பாய்ச்சல் காட்டிவருகிறார். ஸ்குவாஷ் விளை யாட்டில் இந்தியாவின் முகமாக நீண்ட கால மாகக் கோலோச்சிவரும் ஜோஷ் னாவைப் பாராட்டி 2013ஆம் ஆண்டிலேயே மத்திய அரசு அர்ஜூனா விருது வழங்கிக் கவுர வித்தது.

அன்றைய பணிகளை முடித்துவிட்டுக் காத்திருக்கிறார்கள் பள்ளிக் கல்வி இயக்குநரகத்தில் பணிபுரியும் துப்புரவுத் தொழிலாளர்கள். ஆசிரியர் கனகலட்சுமி வந்தவுடன் புத்தகத்தில் உயிர் எழுத்து, மெய்யெழுத்துகளை உச்சரித்துக்கொண்டேஎழுதத் தொடங்கினர்.

தாய் மொழிக்கு முக்கியத்துவம்

சென்னை செனாய் நகரில் உள்ள அரசுப் பெண்கள் மேல்நிலைப் பள்ளியின்  இடைநிலை ஆசிரியராகப் பணியாற்றிவருகிறார் முனைவர் கனகலட்சுமி. சமீபத்தில் இவர் வெளியிட்டுள்ள கசடறக் கற்க கற்பிக்க தமிழ் வாசிக்க எழுத 45 நாட்கள்  புத்தகம் தமிழ் படிக்க, எழுதத் தெரியாத மாணவர்களுக்காக எழுதப்பட்டுள்ளது. அதேபோல் கணக்குப் பாடத்தை ஒன்றாம் வகுப்பு மாணவர்கள் எளிமையாகப் புரிந்துகொள்ளும்வகையில் கணக்கு கையேடு என்ற புத்தகத்தையும் வெளியிட்டுள்ளார்.

இந்தப் புத்தகங்களின் பயன்பாடு குறித்துப் பள்ளிக் கல்வி இயக்குநரகம் சார்பில் விழுப்புரம், திருவண்ணாமலை ஆகிய மாவட்டங்களில் உள்ள தொடக்கப் பள்ளி மாணவர்களிடம் ஆய்வு நடத்தப் பட்டது. ஆய்வின் முடிவில்  ஒன்றாம் வகுப்பு மாண வர்கள்  தமிழ் வாக்கியங்களைப்  பிழையில்லாமல் எழுதவும் சரளமாகப் படிக்கவும் செய்துள்ளனர். அதேபோல் இவரின் புத்தகங்களை வைத்துத் தமி ழகத்தில் உள்ள தொடக்கப் பள்ளி ஆசிரியர்களுக்குப் பயிற்சி அளிக்கப்பட்டுவருகிறது.

தமிழ் எழுத்தின் ஒவ்வொரு வளைவுக்கும்  வரிவடிவங்களுக்கான ஒலி வடிவ முறை உண்டு. ஆனால், நாம் ஒலிவடிவங்களை மறந்ததன் விளைவு  பிள்ளைகளுக்குத் தமிழை எழுதக் கற்றுத் தருவதற்குப் பதிலாக ஓவியம் போல் வரையவே கற்றுக்கொடுக்கிறோம். இது மாற வேண்டும் என்ப தற்காகத்தான் தமிழ் இலங்கியங்களில் தமிழ் எழுத்துக்கள் குறித்துச் சொல்லப்பட்டிருப்பதை ஆய்வுசெய்து புத்தகமாக வெளியிட்டுள்ளேன் என்கிறார் கனகலட்சுமி. தற்போது முதியோர் கல்விக்கு  இந்தப் புத்தகம் எந்த அளவுக்குப் பய னுள்ளதாக இருக்கும் என் பதற்கான முன்னோட்ட வகுப்புகள் சென்னை பள்ளிக் கல்வி இயக்கு நரகத்தில் நடத்தப்பட்டு வருகிறது.

குழந்தைத் தொழிலாளர்களுக்கான முதல் பள்ளி

கனகலட்சுமியின் சொந்த ஊர் கோவில்பட்டி. பள்ளிப் படிப்பு முடிக்கும்வரை சராசரி மாணவி யாகவே இருந்திருக்கிறார். அம்மா சுப்புலட்சுமி இறந்துவிட்ட நிலையில் அப்பாவின் கனவை நன வாக்கவே ஆசிரியர் பயிற்சிப் படிப்பில் சேர்ந்தார். குடும்பத்தின் முதல் பட்டதாரியான இவர், ஆசிரியர் பயிற்சியில் முதல் வகுப்பில் தேர்ச்சி பெற்றார். தனியார் பள்ளியில் ஆசிரியராக ஓராண்டு பணி யாற்றினார். பின்னர் ராமநாதபுரத்தில் உள்ள கடுக்காய் வலசை கிராமத்திலுள்ள அரசு ஊராட்சி ஒன்றிய தொடக்கப் பள்ளியில் பணியாற்றினார். மாணவர் களுக்குப் புரியும்வகையில் எளிமையாகக் கற்பித் ததால் போகலூர் ஒன்றியத்தின் ஆசிரியர் பயிற்றுநுர் பொறுப்புக்கு உயர்த்தப்பட்டார்.

இந்நிலையில்  அனைவருக்கும் கல்வித் திட் டத்தின்கீழ் அப்பகுதியில் உள்ள செங்கல் சூளை களில் உள்ள குழந்தைகளை மீட்டெடுத்துள்ளார். தமிழகத்திலேயே ராமநாதபுரம் மாவட்டத்தில் முதன்முறையாகக்  குழந்தைத் தொழிலாளர் களுக்கான பள்ளியை இவர் தொடங்கினார்.

உலக சாதனை

இவரது புத்தகத்தைக்கொண்டு திருவண் ணாமலை மாவட்டத்தில் உள்ள அனைத்து அரசுப் பள்ளி ஆசிரியர்களுக்கும் எளிமையான முறையில்  தமிழைக் கற்பிக்கும் முறை குறித்துப் பயிற்சி அளிக்கப்பட்டுள்ளது.

மாவட்ட ஆட்சியர் கந்தசாமி தலைமையில் 1,56,170 அரசுப் பள்ளி மாணவர்கள் ஒரே நேரத்தில் தமிழை வாசிக்கச் செய்து உலக சாதனைப் புத்தகத்தில் இடம்பெற்றுள்ளார். இந்தச் சாதனை யைச் சாத்தியப்படுத்தியதற்காக அமெரிக்காவின் உலக சாதனை நிறுவனம் சார்பில் சான்றிதழ் வழங்கப்பட்டுள்ளது.

தமிழ் மொழி குறித்து ஆராய்ச்சி மேற்கொள் வதற்காகவே தனக்கு வந்த பணி உயர்வையெல்லாம் தவிர்த்திருக்கிறார். வாழ்வின் இறுதிவரை தமிழ் மொழிக்குத் தொண்டாற்ற வேண்டும் என்பதே லட்சியம் என்கிறார் ஆசிரியை கனகலட்சுமி.கனகலட்சுமி.

உலக துப்பாக்கிச் சுடுதல் மகளிர் பிரிவு தரவரிசையில் இந்திய வீராங்கனை ஒருவர் முதலிடம் பிடிப்பது கனவிலும் நடக்காது எனப் பலர் நினைத்தனர். ஆனால், அந்த நினைப்பைத் தகர்த்தெறிந்து பதக்கக் கனவுக்கு உயிர்கொடுத்தார் அந்த வீராங் கனை. உலகக் கோப்பை துப்பாக்கிச் சுடுதல் 10 மீட்டர் ஏர் பிஸ்டல் பிரிவில் தங்கப் பதக்கம் வென்ற முதல் இந்திய வீராங்கனையும் அவர்தான். இந்திய வரலாற்றில் முத்தான இரு சாதனைகளை படைத்த அந்த வீராங்கனை, பஞ்சாபைச் சேர்ந்த ஹீனா சித்து.

ஹீனா சித்துவின் சொந்த ஊர் லூதியானா. மற்ற வீராங்கனைகளைப் போல சிறு வயதிலிருந்து விளையாட்டைக் கற்றவரும் அல்ல; விளையாட்டு ஆர்வம் கொண்டவரும் அல்ல. சிறு வயதிலிருந்தே மருத்துவராக வேண்டும் என்பதுதான் ஹீனாவின் லட்சியம். அவருடைய பயணமும் அதை நோக்கித்தான் இருந்தது. முழுக்க முழுக்க படிப்பில் மட்டுமே அவரது  கவனம் குவிந்திருந்தது. பிளஸ் டூ தேர்வு, மருத்துவ நுழைவுத் தேர்வு எனப் படிப்பிலேயே மூழ்கிக்கிடந்தார் ஹீனா. ஒரு கட்டத்தில் படிப்பு தந்த சோர்வால், அவருக்குச் சற்று மன அமைதி தேவைப்பட்டது. அதற்காக அவர் தேர்வு செய்த விளையாட்டுதான் துப்பாக்கிச் சுடுதல்.

எதிர்பாராத துப்பாக்கிச் சூடு

ஹீனாவின் அப்பா தேசிய துப்பாக்கிச் சுடும் வீரர். அவருடைய உறவினர் துப்பாக் கியை வடிவமைக்கும் கடையின் உரிமை யாளர். இவர்கள் மூலம் துப்பாக்கியைப் பிடிக்கத் தொடங்கிய ஹீனா, ஆசுவாசத்துக் காகத் துப்பாக்கிச் சுட ஆரம்பித்தார். ஆனால், சில நாட்களிலேயே அந்த விளையாட்டு மீது அவருக்கு ஈர்ப்பு ஏற்பட்டது.

மருத்துவம் படித்துக்கொண்டே துப் பாக்கிச் சுடுதல் விளையாட்டையும் தொடர்ந் தார். மருத்துவக் கல்லூரியில் படிக்கும்போதே தேசிய அளவிலான போட்டிகளில் பங்கேற்கத் தொடங்கிவிட்டார். 2009இல் கேரளத்தில் நடந்த தேசிய துப்பாக்கிச் சுடுதல் போட்டியில் தங்கம் வென்ற ஹீனாவுக்கு அதே ஆண்டில் சீனாவில் உலகக் கோப்பை துப்பாக்கிச் சுடும் போட்டியில் பங்கேற்க வாய்ப்புக் கிடைத்தது.

19 வயதிலேயே உலகக் கோப்பைப் போட்டியில் பங்கேற்ற ஹீனா, வெள்ளிப் பதக்கம் வென்று சர்வதேசப் பயணத்தை வெற்றிகரமாகத் தொடங்கினார். மருத்துவ வகுப்புக்குப் பங்கம் வராமல் தொடர்ந்து தேசிய, சர்வதேச அரங்கில் வலம்வரத் தொடங்கினார். 2010இல் டெல்லியில் நடந்த காமன்வெல்த் விளையாட்டுப் போட்டி ஹீனாவின் திறமைக்குச் சான்றாக அமைந்தது. 10 மீ. ஏர்பிஸ்டல் பிரிவில் பங்கேற்ற மகளிர் அணி சார்பில் விளையாடிய ஹீனா, தங்கப் பதக்கம் வென்றார். அதே ஆண்டில் சீனாவின் குவாங்சூ நகரில் நடைபெற்ற ஆசிய விளையாட்டுப் போட்டியிலும் வெள்ளிப் பதக்கத்தை வென்று முத்திரைப் பதித்தார்.

வரலாற்றுச் சாதனை

2013இல் உலகக் கோப்பைத் தொடரில் முக்கியமான சாதனையை ஹீனா படைத்தார். அந்த ஆண்டு ஜெர்மனியில் உலக துப்பாக்கிச் சுடும் போட்டி நடைபெற்றது. இந்தப்  போட்டியில் உலக சாம்பியனான செர்பி யாவின் சொரானா அருனோவிக், உக்ரைனின் ஒலினா ஆகி யோரைத் தோற்கடித்துத் தங்கம் வென்றார். உலகக் கோப்பையில் தங்கப் பதக்கம் வென்ற இரண்டாவது இந்திய வீராங்கனை என்ற சிறப்பைப் படைத்தார் ஹீனா.

இதற்கு முன்பு அஞ்சலி பாகவத், ககன் நரங் இருவர் மட்டுமே உலக துப்பாக்கிச் சுடுதல் போட்டியில் ரைபிள், பிஸ்டல் பிரிவில் தங்கம் வென்றிருந்தனர். அந்த வரிசையில் மூன்றாவதாக இணைந்தார் ஹீனா. பிறகு அவரது வெற்றிப் பயணம் தடையின்றி தொடர்ந்தது. 2014 ஏப்ரல் 7 அன்று உலக துப்பாக்கிச் சுடுதல் மகளிர் பிரிவில் நம்பர் ஒன் இடத்தைப் பிடித்தார் ஹீனா. இதன்மூலம் உலகத் தரவரிசைப் பட்டியலில் முதலிடம் பிடித்த முதல் இந்திய வீராங்கனையானார்.

2015இல் ஆசிய துப்பாக்கிச் சுடுதல் வாகையர் பட்டம், தெற்காசிய ஃபெடரேஷன் துப்பாக்கிச் சுடுதல் வாகையர் பட்டம் என ஹீனா வெற்றி மேல் வெற்றிகளைக் குவித்து இந்தியாவுக்குப் பெருமை சேர்த்தார். பிரேசிலில் நடந்த ஒலிம்பிக் போட்டியில் பதக்கம் வென்று வருவார் என்று எதிர்பார்க்கப்பட்டது.

ஆனால், 25 மீட்டர் பிஸ்டல் பிரிவில் தகுதிச் சுற்றோடு அவர் வெளியேறியது பெருத்த ஏமாற்றத்தை அளித்தது. 2017இல் ஈரானில் நடைபெற்ற ஆசிய துப்பாக்கிச் சுடும் போட்டியில் பங்கேற்கும் பெண்கள் தலையில் முக்காடு அணிய வேண்டும் என்று விதிக்கப் பட்ட ஆடை கட்டுப்பாட்டை எதிர்த்துப் போட்டியிலிருந்து விலகியதால் ஹீனா சர்வதேச அளவில் கவனம் பெற்றார்.

2018 கோல்ட் கோஸ்ட் காமன்வெல்த் போட்டியில் தங்கப் பதக்கத்தையும் வென்று திரும்பினார். சில மாதங்களுக்கு முன்பு ஜகார் தாவில் நடைபெற்ற ஆசிய விளையாட்டுப் போட்டியில் வெண்கலப் பதக்கத்தை வென்றார். தனது விளையாட்டுப் பயணத்தில் ஏராளமான பதக்கங்களை வென்றாலும்   மிகப் பெரிய தொடர்களில் அவர் வென்ற  பதக்கங்களே அவரது திறமைக்குச் சான்று. 2014இல் உலகத் தரவரிசையில் முதலிடம் பிடித்த பிறகு அவரது திறமையை அங்கீ கரிக்கும்வகையில் மத்திய அரசு ஹீனாவுக்கு அர்ஜூனா விருது வழங்கிக் கவுரவித்தது.

உழைப்பின் மகிமை

2012, 2016 என இரு ஒலிம்பிக் போட்டிகளில் பங்கேற்றிருக்கிற ஹீனா, அதில் பெரிய அளவில் சாதிக்கவில்லை. ஆனால், ஒலிம் பிக்கைத் தவிர்த்துவிட்டு மற்ற பெரிய தொடர் களில் எல்லாம் அவர் ஜொலித்தி ருக்கிறார். உலகக் கோப்பைத் துப்பாக்கிச் சுடும் போட்டி யில் 4 பதக்கங்கள், காமன்வெல்த் போட்டியில் 4 பதக்கங்கள், ஆசிய விளையாட்டுப் போட்டியில் 3 பதக்கங்கள், காமன்வெல்த் வாகையர் பட்டப் போட்டியில் ஒரு பதக்கம், ஆசிய வாகையர் பட்டப் போட்டியில் 2 பதக்கங்கள் என சர்வதேச அளவில் ஹீனா வெற்றிக்கொடியைப் பறக்கவிட்டிருக்கிறார்.

பல மைல் கல் தருணங்களை 2018இல் சந்தித்திருக் கிறார்கள் இந்திய வீராங்கனைகள்.  அவற்றில் சில முக்கியமான தடங்கள் இவை.

மேரிகோம்

மூன்று குழந்தைகளின் தாய், 36 வயது பெண் போன்ற தடைகள் எல்லாம்  மேரிகோமுக்கு எப்போதும் கிடை யாது. சென்ற ஆண்டு மட்டும் அவர் 4 தங்கப் பதக்கங் களை வென்று இந்திய குத்துச்சண்டைப் பிரிவுக்குப் பெருமைசேர்த்தார். 2018இன் தொடக்கத்தில் இந்திய ஓபனில் தங்கப் பதக்கம் வென்ற மேரிகோம், ஆண்டு இறுதியில் டில்லியில் நடைபெற்ற உலக வாகையர் பட்டப் போட்டியில் தங்கப் பதக்கம் வென்று 2018ஆம் ஆண்டை வெற்றிகரமாக நிறைவுசெய்தார். இடையே காமன்வெல்த், பல்கேரியாவில் நடைபெற்ற அய்ரோப்பியப் போட்டி யிலும் இவருக்கே தங்கப் பதக்கங்கள் கிடைத்தன.

பி.வி. சிந்து

2018-லும் பி.வி. சிந்துவை நோக்கி வெற்றிக் காற்று பலமாக வீசியது. இரண்டு பட்டங்கள், காமன்வெல்த், ஆசியப் போட்டி, உலக வாகையர் பட்டப் போட்டிகளில் 3 வெள்ளிப் பதக்கங்கள் என வெற்றி மேல் வெற்றி குவிந்தது. இந்திய ஓபன், தாய்லாந்து ஓபனில் இரண்டாமிடத்தைப் பிடித்த சிந்து, இறுதியாக பி.டபுள்யு. உலக டூர் ஃபைனல்ஸ் பட்டப் போட்ட்டியில் வாகையர்  பட்டம் வென்று தொடர்ச்சியாக இறுதிப் போட்டித் தோல்விகளுக்கு முற்றுப்புள்ளி வைத்தார்.

மணிகா பத்ரா

டேபிள் டென்னிஸில் சென்ற ஆண்டு அறிமுக நாயகியாக அமர்க்களப்படுத்தினர் மணிகா பத்ரா. டெல்லியைச் சேர்ந்த இவர், காமன்வெல்த் போட்டியில் தங்கப் பதக்கத்தை வென்று ஆச்சர்யத்தில் மூழ்கடித்தார். ஆசிய விளையாட்டுப் போட்டியில் கலப்பு இரட்டையர் பிரிவில் வெண்கலப் பதக்கத்தையும் தனதாக்கினார்.

சாய்னா நேவால்

சாய்னாவுக்கு 2018 மறக்க முடியாத ஆண்டு. காமன்வெல்த்  பாட்மிண்டன் இறுதிப் போட்டியில் பி.வி. சிந்துவைத் தோற்கடித்து தங்கப் பதக்கத்தை வென்றார். ஆசிய விளையாட்டுப் போட்டியில் வெண்கலப் பதக்கம் கிடைத்தது. ஆசிய வாகையர் பட்டப் போட்டியிலும் வெண்கலம் இவருக்கே கிடைத்தது. தவிர இந்தோனேசியா மாஸ்டர்ஸ், டென்மார்க் ஓபன், சயீத் மோடி இண்டர் நேஷனல் போன்ற தொடர்களில் இறுதிப் போட்டிவரை முன் னேறினார். பாட்மிண்டன் வீரர் பாருபள்ளி காஷ்யப்பை மணந்துகொண்டு புதிய இன்னிங்ஸைத் தொடங்கினார்.

இமா தாஸ்

தடகளத்தில் தன்னிகரற்ற சாதனைகளைப் படைத்தார் ஹிமா தாஸ். பின்லாந்தில் நடைபெற்ற சர்வதேச ட்ராக் போட்டியில் 400 மீ. ஓட்டப் போட்டியில் தங்கப் பதக்கம் வென்ற முதல் இந்திய வீராங்கனை என்ற பெருமை சென்ற ஆண்டு இமாவுக்குச் சொந்தமானது. இதற்கு முன்பு எந்த இந்திய வீராங்கனையும் செய்யாத சாதனை இது. ஆசிய விளையாட்டுப் போட்டியில் ஒரு தங்கப் பதக்கத்தையும் இரண்டு வெள்ளிப் பதக்கங்களையும் வென்று தடகளத்தில் அழியா தடம் பதித்தார்.

தீபா கர்மாகர்

ரியோ ஒலிம்பிக்கில் நூலிழையில் பதக்கத்தைக் கோட்டைவிட்டது, இரண்டு ஆண்டுகள் காயத்தால் அவதிப்பட்டது என ஜிம்னாஸ்டிக்ஸ் விளையாட்டில் சறுக்கல்களைக் கண்ட தீபா கர்மாகருக்கு சென்ற ஆண்டு புத்துணர்வைத் தந்தது. நீண்ட ஓய்வுக்குப் பிறகு களத் துக்கு வந்த தீபா, துருக்கியில் நடைபெற்ற ஜிம்னாஸ்டிக்ஸ் உலக சேலஞ்ச் கோப்பையை வென்று மீண்டும் புதிய அவதாரம் எடுத்தார்.

டுட்டி சந்த்

பயிற்சி பெறவே பெரும் சிரமங்களைச் சந்தித்த டுட்டி சந்துக்குச் சென்ற ஆண்டு மறக்க முடியாதது. ஆசிய விளையாட்டுப் போட்டி 100 மீ. ஓட்டப் போட்டியில் இவர்  வெள்ளி வென்றார். வெறும் 0.02 விநாடிகளில் தங்கத்தைக் கோட்டைவிட்டார்.

ஆனால், ஆசிய விளையாட்டுப் போட்டியில் பி.டி. உஷாவுக்குப் பிறகு வெள்ளிப் பதக்கம் வென்ற வீராங்கனை என்ற பெருமை டுட்டிக்குக் கிடைத்தது.

வினேஷ் போகத்

கடந்த சில ஆண்டுகளாக ஏமாற்றங்களைச் சந்தித்த வினேஷ், சென்ற ஆண்டு ஏற்றம் கண்டார். ஆசிய  மல்யுத்தப் போட்டியில் தங்கப் பதக்கம் வென்று தன்னை நிரூபித்தார் வினேஷ். ரியோ ஒலிம்பிக்கில் மல்யுத்தப் போட்டியில் யாருடன்  விளையாடும்போது  காயம் ஏற்பட்டதோ, அதே வீராங்கனையை வீழ்த்தி தங்கப் பதக்கம் வென்று சாதித்தார்.

ஹர்சிதா தோமர்

கடுகு சிறுத்தாலும் காரம் குறையாது என்பது ஹர்சிதா தோமருக்குப் பொருந்தும். பதின் பருவத்திலேயே சர்வதேசப் படகு வலித்தல் போட்டியில் பங்கேற்றுப் பதக்கத்தை வென்றார். இளம் வயதில் பதக்கம் வென்ற இரண்டாவது இந்திய வீராங்கனை என்ற சிறப்பு அவருக்குக் கிடைத்தது. ஹர்சிதா தற்போது 10ஆம் வகுப்பு படித்துவருகிறார்.

 

 

 

 

 

 

 

 

 

Banner
Banner