மகளிர்

 

ஷிவாங்கி பதக் (16) அரியாணாவின் ஹிஸர் நகரைச் சேர்ந்தவர். உலகின் மிக உயரமான சிகரமான எவ ரெஸ்ட்டின் உச்சத்தை கடந்த வாரம் தொட்டு இவர் சாதனை படைத் திருக்கிறார். மே 7 அன்று மலையேறத் தொடங்கிய ஷிவாங்கி மூன்றே நாட்களில் எவரெஸ்ட்டின் அடிவார முகாமை அடைந்தார்.

பின்பு அங்கிருந்து, கடல் மட்டத்திலிருந்து 9 கி.மீ. உயரத்தில் இருக்கும் சிகரத்தை ஆறு நாட்களில் அடைந் துள்ளார்.

மலையேறத் தொடங்கும் முன் காஷ்மீரில் நான்கு மாதம் மேற் கொண்ட கடுமையான பயிற்சி இதற்கு உதவியுள்ளது. எவரெஸ்ட்டைத் தொட்டதும் தன்னையறியாமல் தேசிய கீதத்தைப் பாடியதாகக் கூறுகிறார்.

மனித உரிமை போராளி யூரி

மே 19, 1921 இல் கலிபோர்னியாவில் பிறந்த யூரி கொச்சியாமா ஒரு ஜப்பானியர். டிசம்பர் 7, 1941இல் பேர்ல் ஹார்பர் மீது வீசப்பட்ட குண்டு அவரது வாழ்வைப் புரட்டிப்போட்டது. நோயாளியான அவருடைய தந்தை அன்று கைது செய்யப்பட்டார்.

ஓராண்டு சிறைவாசத்துக்கு பின் விடுதலையானவர், அதற்கு அடுத்த நாளே மரணத்தைத் தழுவினார். அந்த நேரம் அமெரிக்காவில் இருந்த 1,20,000 ஜப்பானியர்களை அகதி முகாமில் அடைக்க அதிபர் ரூஸ்வெல்ட் உத்தரவிட்டார்.

யூரியின் குடும்பம் வீட்டிலிருந்து வெளியேற்றப்பட்டு குதிரை தொழுவத்தில் அடைக்கப்பட்டது. சிறு வயதில் அவருக்கு ஏற்பட்ட இந்த அனுபவமும் வலியும் அவரை மனித உரிமைப் போராளியாக்கியது. 1963இல் அவர் அமெரிக்காவின் புகழ்பெற்ற போராளியான மல்கம் எக்ஸைச் சந்தித்துள்ளார்.  இன்று நடக்கும் பல போராட்டங்களுக்கும் அதை முன்னெடுத்துச் செல்லும் போராளிகளுக்கும் யூரிதான் முன்னோடி. அவரது பிறந்த நாளை முன்னிட்டு கூகுள் சிறப்பு டூடுலை வெளியிட்டுள்ளது.

தடை தாண்டிப் பாய்ந்து பதக்கங்கள் வென்ற வீராங்கனை

நீளம் தாண்டுதலில் சாதிக்கும் அளவுக்கு இந்தியாவில் திறமை வாய்ந்த வீராங்கனைகள் யாருமில்லை என்ற காலம் ஒன்று இருந்தது. அந்த இருண்ட பக்கங்களுக்கு ஒளிகொடுத்தவர் கேரளத்தைச் சேர்ந்த அஞ்சு பாபி ஜார்ஜ். உலக வாகையர் பட்டம், உலகத் தடகளப் போட்டியில் பதக்கங்கள் வென்ற முதல் இந்திய வீராங்கனை இவர்தான். இதன் மூலம் இந்திய நீளம் தாண்டுதல் விளையாட்டை உலக அளவில் கவனம் பெறச் செய்தவரும் இவர்தான்.

படிப்பைத் தாண்டி வேறு எதையும் யோசிக்கக் கூடாது என்று சொல்லும் பெற்றோர் மத்தியில் அஞ்சுவின் தந்தை கே.டி. மார்க்கோஸ் சற்று வித்தியாசமானவர். விளை யாட்டுதான் வாழ்க்கை என்று அஞ்சுவுக்கு அவர் கற்றுக் கொடுத்தார். சிறுவயதிலிருந்தே தடகளப் போட்டிகளில் விளையாட ஊக்குவித்தார். தொடக்கத்தில் ஏழு விளை யாட்டுகளின் கலவையான ஹெப்டத்லானில்தான் அஞ்சு ஆர்வம் காட்டிவந்தார். ஆனால், நாட்கள் செல்லச் செல்ல நீளம் தாண்டுதல், தடை தாண்டும் விளையாட்டுகள் மீது அஞ்சுவுக்குக் காதல் ஏற்பட்டது. இதற்கு அவரது உயரமும் ஒரு காரணம். உயரமாக இருப்பவர்கள் நீளம் தாண்டுதலில் சுலபமாகச் சாதிக்க முடியும். 185 செ.மீ. உயரம் இருந்த அஞ்சுவுக்கும் அந்த உயரம் சாதகமானது.

தொடர்ந்து நீளம் தாண்டுதலில் மாநில அளவில் வெற்றிக்கொடி கட்டிக்கொண்டிருந்த அஞ்சு 1996இல்தான் முதன்முதலாகத் தேசிய அளவிலான போட்டிகளில் காலடி வைத்தார். அப்போது டில்லியில் இளையோர் ஆசிய வாகையர் பட்டப் போட்டிகள் நடைபெற்றன. இதில் முதன் முறையாகப் பங்கேற்ற அஞ்சு, நீளம் தாண்டுதலில் பதக்கம் வென்றார். அதுதான் அஞ்சுவின் பதக்க வேட்டைக்குப் பிள்ளையார்சுழி போட்டது. இதன் பிறகு மாநில அளவிலும் தேசிய அளவிலும் தொடர்ந்து சாதித்துவந்தவர், சர்வதேச அளவிலும் குறிப்பிடத்தக்க சாதனையை வசமாக்கினார்.

முதல் சர்வதேசப் பதக்கம்

2003இல் பாரிசில் உலக சாம்பியன்ஷிப் போட்டி நடைபெற்றது. நீளம் தாண்டுதல் மகளிர் பிரிவில் அஞ்சுவும் இடம் பெற்றிருந்தார். அதற்கு முன்புவரை உலக வாகையர் பட்டப் போட்டியில் நீளம் தாண்டுதலில் பெண்கள் யாரும் சாதித்ததில்லை. இந்த முறையும்கூட அப்படியொரு வாய்ப்பு இருப்பதாக யாரும் நினைக்கவில்லை. தகுதிச் சுற்றில் அஞ்சு களத்தில் இருந்தபோது ஆசியர்கள் யாரும் சொல்லிக்கொள்ளும் அளவில் இல்லை. அய்ரோப்பா, ஆப்பிரிக்கா, அமெரிக்கக் கண்டங்களைச் சேர்ந்த வீராங் கனைகளே நிறைந்திருந்தார்கள்.

மிகச் சிறப்பாக விளையாடிய அஞ்சு, 6.59 மீட்டர் தாண்டி, பட்டியலில் மூன்றாம் இடம் பிடித்து இறுதிச் சுற்றுக்குள் நுழைந்தார். தகுதிச் சுற்றில் 6.59 மீட்டர் நீளம் தாண்டியிருந்த நிலையில், இறுதிச் சுற்றில் 6.70 மீட்டர் தாண்டி வெண்கலப் பதக்கத்தை வென்றார். வெள்ளிப் பதக்கம் வென்ற ரசியாவின் கால்கினாவுக்கும் அஞ்சு வுக்கும் 0.04 மீட்டர்தான் வித்தியாசம். என்றாலும் அஞ்சு வெண்கலப் பதக்கம் வென்று அன்று சர்வதேச அளவில் இந்தியாவுக்குப் பெருமைத் தேடிந்தந்தார். உலக சாம்பியன்ஷிப் நீளம் தாண்டுதலில் பதக்கம் வென்ற முதல் இந்தியப் பெண் என்ற சாதனையும் அவர் படைத்தார்.

சாதனை மேல் சாதனை

2004இல் ஏதென்ஸில் ஒலிம்பிக் போட்டி நடந்தது. உலக வாகையர் பட்டப் போட்டியில் அஞ்சு சாதித்திருந்த தால், அவர் மீது பெரிய எதிர்பார்ப்பு இருந்தது. தகுதிச் சுற்றைத் தாண்டி இறுதிச் சுற்றுக்குள் அஞ்சு நுழைந்ததே அப்போது பரபரப்பாகப் பேசப்பட்டது. எப்படியும் அஞ்சு சாதிப்பார் என்று எதிர்பார்க்கப்பட்டது.

ஆனால், அவரால் அய்ந் தாவது இடத்தையே பிடிக்க முடிந்தது. அவரால் பதக்கம் வெல்ல முடியாவிட்டாலும் 6.83 மீட்டர் நீளத்தைத் தாண்டியது, அவரது தனிப்பட்ட சாதனையாகப் பதிவானது. அவர் நீளம் தாண்டுதல் விளையாட்டிலிருந்து ஓய்வுபெறும்வரை அதுவே அவரது அதிகபட்ச தனிநபர் சாதனையாகத் தொடர்ந்தது.

அடுத்த ஆண்டே இன்னொரு களத்துக்குத் தயா ரானார் அஞ்சு. 2005இல் மொனாகோவில் உலகத் தடகளப் போட்டிகள் நடைபெற்றன. ஒலிம்பிக்கில் விட்ட பதக் கத்தை எப்படியும் பெறுவது என்ற முடிவோடு உழைத்தார். தங்கப் பதக்கத்துக்குக் குறிவைத்திருந்தார். போட்டியில் 6.75 மீட்டர் நீளத்தைத் தாண்டினார். ஆனால், அந்தப் போட்டியில் அவரால் இரண்டாம் இடத்தையே பிடிக்க முடிந்தது. வெள்ளிப் பதக்கத்துடன் அஞ்சு திருப்தியடைய வேண்டியிருந்தது. ஆனால், தங்கம் அவரைவிட்டுச் செல்லவில்லை என்பது பின்னர்தான் தெரிந்தது.

அந்தப் போட்டியில் முதலிடம் பிடித்த ரஷ்ய வீராங் கனை கொடோவா, ஊக்க மருந்து பயன்படுத்தியதாகப் புகார் எழுந்தது.

இந்த விவகாரம் 9 ஆண்டுகள் விசா ரணை என்ற பெயரில் இழுத்தடிக்கப்பட்டது. மிகவும் தாமதமாக கொடாவோ பெற்ற தங்கப் பதக்கம் 2014இல் பறிக்கப்பட்டது. அந்தப் பதக்கம் இரண்டாம் இடம் பிடித்த அஞ்சுவுக்கு வழங்கப்பட்டது. இதன் மூலம் உலகத் தடகளப் போட்டியில் தங்கம் வென்ற முதல் இந்தியப் பெண் என்ற பெருமை யையும் அஞ்சு பெற்றார்.

இந்தப் பதக்கங்கள் மட்டுமல்ல, 2002-ல் மான்செஸ்டர் காமன்வெல்த் விளையாட்டில் வெண்கலப் பதக்கம், ஆசிய விளையாட்டுப் போட்டிகளில் 2002-ல் (பூசன்) தங்கம், 2006இல் (தோகா) வெள்ளிப் பதக்கம் ஆகிய வற்றையும் அஞ்சு அள்ளினார். மேலும், ஆசிய வாகையர்  பட்டப் போட்டியில் 2005-ல் (இஞ்ச்சேன்) தங்கம், 2007இல் (அம்மான்) வெள்ளிப் பதக்கங்களையும் தன்வசமாக்கினார்.

2000இல் ராபர்ட் பாபி ஜார்ஜை அஞ்சு திருமணம் செய்து கொண்டார். இவரும் விளையாட்டு வீரர்தான். தேசிய டிரிப்பிள் ஜம்ப் வாகையர் பட்டம். திருமணம் செய்தபிறகு தான் விளையாடுவதைக் குறைத்துக்கொண்டு அஞ்சுவின் பயிற்சியாளராக மாறினார் பாபி ஜார்ஜ். அஞ்சு சர்வதேச அளவில் பதக்கங்கள் பெற்றதெல்லாம் இவரது பயிற்சியின் கீழ்தான். ஒரு வகையில் சிறுவயதில் அஞ்சு வின் தந்தை அவருக்கு வழிகாட்டியாக இருந்தார். திரு மணத்துக்குப் பிறகு அவருடைய கணவர் வழிகாட்டியானார்.

2002இல் அஞ்சுவுக்கு அர்ஜூனா விருது வழங்கப் பட்டது. அடுத்த ஆண்டு ராஜீவ் காந்தி கேல் ரத்னா விருதும் 2004இல் பத்மசிறீ விருதும் வழங்கப்பட்டன. 2008 பெய்ஜிங் ஒலிம்பிக் உள்பட பல போட்டிகளிலும் பங்கேற்ற அஞ்சு, அதன் பிறகு நீளம் தாண்டுதலிலிருந்து விடை பெற்றார். தற்போது 41 வயதாகும் அஞ்சு பாபி ஜார்ஜ், டார்கெட் ஒலிம்பிக் போடியம் ஸ்கீம் என்றழைக்கப்படும் ஒலிம்பிக் போட்டியாளர்களுக்கு உதவும் திட்டத்தின் செயல் உறுப்பினராக இருந்துவருகிறார். மத்திய அரசு அதிகாரி யாகவும் பணியாற்றிவருகிறார்.

 

உலக அளவில் இந் திய பெண்களை குறிப் பாக, தமிழ்நாட்டு பெண் களை வியந்து பார்க்கின் றனர் என்றால் அதற்கு அவர்களின் நகை சேமிப்புதான் காரணம் என்றால் மிகையாகாது.

முன்பெல்லாம் தங்க நகையைப் பொருத்த வரை பொற்கொல்லர்கள் வடிவமைத்து செய்து தரும் நகைகளே பெரும்பாலும் பெண்கள் அணிந்து வந்தனர்.

காலப்போக்கில் மனிதர்களின் தேவையும், ரசனையும் மாறிவிட, கணினி மூலம் வடிவமைப்புகள் மாறி, இயந்திரங்களின் மூலம் தற்போது நகைகள் தயாராகி வருகிறது. அந்த வகையில் நகைகள் தயார் செய்தல், நகைகளை வடிவமைத்தல், நகைகளை மதிப்பீடு செய்தல், பாலீஷ் செய்தல் போன்ற பலவிதமான பயிற்சிகள் அரசாங்கத்தின் மூலம் குறைவான கட்டணத்தில் ஒரு ஆண்டும், மூன்று மாதம், இரு வாரம் என பயிற்சிகள் அளிக்கப்படுகின்றன.

இப்பயிற்சிகள் மட்டுமின்றி நவீன நகை வடிவமைப்பு பயிற்சிகள், நகை உற்பத்தி மேலாண்மை பயிற்சியும் அளிக்கப்படுகின்றன. இப்பயிற்சி பெற்றோர், சொந்தமாக வீட்டில் இருந்தபடியே இத்தொழிலை செய்யலாம். அடுத்ததாக நகை பாலீஷ் செய்யும் பயிற்சி, நகைகளை சுத்தம் செய்யும் பயிற்சி ஆகியவையும் அளிக்கப்படுகின்றன. ஆண், பெண் இருபாலரும் இதில் கலந்து கொள்ளலாம்.

நவீன நகை வடிவமைப்பு மற்றும் உற்பத்தி

இது ஒரு வருட கால பயிற்சியாகும் . இப்பயிற்சியில் நகைகள் செய்வது, மதிப்பீடு உட்பட அனைத்து பயிற்சிகளும் அளிக்கப்படும். 10-ஆம் வகுப்பு படிப்பு போதுமானது. இப்பயிற்சி முடிப்பவர்களுக்கு பயிற்சி காலத்தின் போதே பெரிய, பெரிய நகை தொழிற்சாலைகள், கடைகள் மூலம் வேலை வாய்ப்பு உறுதி செய்யப்படுகிறது.

நகை மதிப்பீட்டாளர் பயிற்சி

இது இரண்டு வார கால பயிற்சியாகும். இப்பயிற்சி முடித்தவர்கள், வங்கிகளில் பகுதிநேர, முழு நேர நகை மதிப்பீட்டாளர் பணிக்குச் செல்லலாம்.

கணினி நகை வடிவமைப்பு பயிற்சி

இது 3 மாத கால பயிற்சியாகும். இப்பயிற்சியில் கணினி மூலம் நகைகள் டிசைன் செய்வது பற்றி பயிற்சி அளிக்கப்படுகிறது. இப்பயிற்சி பெற்றோர் பல நகை தயாரிப்பு முன்னணி நிறுவனங்களில் வேலை வாய்ப்பு பெறலாம்.

சென்னையில் இப்பயிற்சி அளிக்கப்படும் இடம்

டாக்டர் தர்மாம்பாள் அரசினர் மகளிர் பாலிடெக்னிக் கல்லூரி, தரமணி, சென்னை - 600 113. தொ.பே. 9600318040, 9445368910.

சுமை தூக்கும் பெண் தொழிலாளி!

ராஜஸ்தான் மாநிலம் ஜெய்ப்பூர் ரயில்நிலையத்தில் 2013-ஆம் ஆண்டிலிருந்து சுமை தூக்குபவராக வேலை செய்கிறார் மஞ்சு தேவி. அந்த ரயில்வே நிலையத்தின் முதல் பெண் போர்ட்டர் மட்டுமல்ல அவர், வடமேற்கு ரயில்வேயிலும் அவர்தான் முதல் பெண் சுமைதூக்கும் தொழிலாளி.

டில்லி ராஷ்டிரபதி பவனில் நடக்கும் விழாவுக்கு அவருக்கு அழைப்பு வந்தபோது, “அய்யய்யோ... நானா என்னால் முடியாது. அங்கே வந்து போக எல்லாம் என்னால் முடியாது. எனக்கு மூன்று குழந்தைகள். அவர்களை விட்டு விட்டு என்னால் வர முடியாது’’ என்று மறுத்திருக்கிறார். அருகில் இருந்தவர்கள் எல்லாரும் பேசி அவரைச் சம்மதிக்க வைத்து டில்லிக்கு அனுப்பி வைத்திருக் கிறார்கள். அவருக்கு மத்திய பெண்கள் மற்றும் குழந்தைகள் மேம் பாட்டு அமைச்சகம் இந்த ஆண்டுக்கான “சாதனைப் பெண் மணி’ விருது கொடுக்கவே, டில்லிக்கு அழைத்திருந் தார்கள்.

மஞ்சு தேவியின் சொந்த ஊர் ஜெய்ப்பூர் அல்ல. ஜெய்ப் பூர் மாவட்டத்தில் உள்ள சுந்தர்புரா என்கிற கிராமம்தான் அவருடைய சொந்த ஊர். எதற்கு ஜெய்ப்பூருக்கு வந்தார்?

மஞ்சு தேவியின் கணவர் மகாதேவ் ஜெய்ப்பூர் ரயில்வே ஸ்டேஷனில் சுமைத்தூக்கும் தொழிலாளி. நீண்ட காலமாக கல்லீரலில் பாதிப்பு. அய்ந்தாண்டுகளுக்கு முன்பு மரணமடைந்தார். அப்போது மஞ்சு தேவிக்கு வயது 33. “மூன்று குழந்தைகள். கல்வியறிவில்லை. குழந்தைகளை எப்படிக் காப்பாற்றுவது? என்ன வேலை செய்வது?’ கவலையில் மூழ்கி இருந்த மஞ்சுவின் கண்களில் பட்டது கணவர் மகாதேவின் போர்ட்டருக்கான அனுமதி, அடையாளவில்லை. அதன் எண் 15.

“நான் போர்ட்டர் வேலை செய்தால் என்ன?’

மஞ்சு தேவி உடனே ரயில்வே சுமைதூக்கும் தொழிலாளர் சங்கத்தைச் சேர்ந்தவர்களைப் போய் பார்த்தார். அவரால் போர்ட்டர் வேலை செய்ய முடியுமா? என்று முதலில் சந்தேகத்துடன் பார்த்த சங்கத்தினர், மஞ்சுதேவியின் மன உறுதியை அதற்கும் மேலாக அவருடைய அழுகையைப் பார்த்து வேறு வழியின்றி ரயில்வே அதிகாரிகளிடம் அழைத்துச் சென்றனர்.

“ரயில்வேயில் பெண் போர்ட்டர்களே இல்லையே?’’ கைவிரித்தனர் அதிகாரிகள். மஞ்சு தேவி கெஞ்சினார். வேறு வழியின்றி அனுமதி கொடுத்தனர். ரயில்வேயில் சுமைதூக்கும் பெண் தொழிலாளி என்பவரே இல்லை யாதலால், அவர்களுக்கென சீருடையும் இல்லை. அதற்குப் பிறகு, அதிகாரிகள் கலந்து பேசி சீருடையை முடிவெடுத் திருக்கிறார்கள். ஏதோ ஒரு வேகத்தில் மஞ்சுதேவி வேலைக்கு வந்துவிட்டாரே தவிர, போர்ட்டர் வேலை செய்வதில் ஆயிரம் சிரமங்கள் இருந்தன. 100க்கும் அதிகமான ஆண் போர்ட்டர்கள் மத்தியில் ஒரு பெண் போர்ட்டர்.

“அவர்களுக்கு மத்தியில் உட்கார்வதற்கே முதலில் உடம்பெல்லாம் கூசியது. நான் நினைப்பதை அவர்களிடம் பேச கூட முதலில் தயக்கமாக இருந்தது’’ என்கிறார் மஞ்சுதேவி.

ரயில் பயணிகளோ இந்தப் பெண்ணால் சுமையைத் தூக்க முடியுமா? என்று சந்தேகப்பட்டு, ஆண் போர்ட்டர் களிடம் சுமையைக் கொடுத்தனர். உண்மையில் ஒரு 30 கிலோ எடையைத் தூக்கும் உடல் வலிமை கூட மஞ்சு தேவிக்கு அப்போது இல்லை. வறுமையால் மஞ்சுதேவியின் குடும்பம் வாடிப் போனது.

“வேலைக்குச் சேர்ந்த புதிதில் நான் வேலை செய்த நேரத்தைவிட அழுத நேரமே அதிகம்‘’ என்கிறார் மஞ்சுதேவி. தப்பாக முடிவெடுத்துவிட்டதாக குழம்பித் தவித்திருக்கிறார். மஞ்சுதேவியின் அம்மாதான் அந்த நேரத்தில் மஞ்சுதேவிக்கு ஊக்கம் கொடுத்திருக்கிறார். கொஞ்சம் கொஞ்சமாகப் பேசி அவரை தைரியமிக்க பெண்ணாக மாற்றியிருக்கிறார். அதற்குப் பின்தான் மஞ்சு தேவி ஒரு முடிவுக்கு வந்திருக்கிறார். பிரச்சினைகள், கஷ்டங்கள் இருக்கின்றன. முதலில் என்ன சூழ்நிலை இருக்கிறதோ, அதை ஒத்துக் கொள்வது, அதன் பிறகு அதிலிருந்து மீள படிப்படியாக முயற்சி செய்வது என்ற முடிவே அது.

கிராமத்தில் மஞ்சுதேவியின் அம்மாவுடன் இருந்த குழந்தைகள் ஜெய்ப்பூருக்கு வந்தார்கள். 3 ஆயிரம் ரூபாய் வாடகையில் ஓர் அறையே உள்ள வீட்டில் வாழ்க்கை. குழந்தைகளைப் பள்ளியில் சேர்த்தாயிற்று. “எனது கிராமத்தில் முன்னேறுவதற்கான வாய்ப்புகள் குறைவு. அவர்கள் தினம்தோறும் ஒழுங்காகப் பள்ளிக்குச் செல்கிறார்களா? என்று கூட என்னால் கண்காணிக்க முடியாது. போர்ட்டர் வேலையில் கிடைக்கும் கூலியில் வாரத்துக்கு ஒருமுறை கிராமத்துக்குப் போய் அவர்களைப் பார்த்துவிட்டு வருவதும் கூட என்னால் முடியாமல் போய்விடும். அதனால் அவர்களை ஜெய்ப்பூருக்கு அழைத்து வந்துவிட்டேன்’’ என்கிறார் மஞ்சுதேவி.

“”போர்ட்டர் வேலைக்குச் சேர்ந்த தொடக்கத்தில் ஒரு சிறிய சூட்கேஸ் பெரிய மலை மாதிரி எனக்குத் தோன்றும்‘’ என்று கூறும் மஞ்சுதேவி, இப்போது 80 கிலோ பொருள் களைக் கூட அனாயசமாக தூக்கி, வண்டியில் வைத்து இழுத்துச் செல்கிறார்.

“இந்த போர்ட்டர் வேலையில் உள்ள சங்கடமே, பெருங்கூட்டம் உள்ள ரயில்வே பிளாட்பாரத்தில் சுமை யையும் இழுத்துக் கொண்டு மிக வேகமாக உரிய ரயில் பெட்டியை நோக்கி விரைந்து செல்வதுதான்’’ என்கிறார்.

காலை 5.00 மணிக்கே ரயில் நிலையத்துக்கு வந்துவிடும் மஞ்சுதேவி, ரயில் நிலையத்தின் நுழைவு வாயிலில் நின்று கொண்டு சுமை தூக்க வாய்ப்பளிக்கும் ரயில் பயணி களுக்காகக் காத்திருக்கிறார். இவ்வளவுதான் இன்றைக்கு கூலி கிடைக்கும் என்று சொல்ல முடியாது. என்றாலும் மஞ்சுதேவி தனது குழந்தைகளை படிக்க வைத்துக் கொண்டிருக்கிறார்.  “நம்மால் முடியும் என்று நாம் நினைக்க ஆரம்பித்தால், நம்மால் முடியாதது என்று எதுவுமில்லை’’ என்கிறார் உறுதியாக மஞ்சுதேவி.

கவனம் கொள்க!

மாதவிடாய்  நாட்களில் கால்கள் இழுப்பதும், அடி வயிற்றில் அதிக வலியும் இருக்கும். அதனால் கால்சியம் நிறைந்த உணவுகளான பால், தயிர், வெண்டைக்காய், பாதாம் ஆகிய வற்றை சாப்பிடுங்கள். மேலும் கண்டிப்பாக ஏதேனும் கீரைகளை சேர்த்துக் கொண்டால் படிப்படியாக இந்தப் பிரச்சினைகள் குணமடையும்.

மாதவிடாய்க்கு முன்பு வைட்டமின் பி6, டி சத்துக்கள் அதிகம் இருக்கும் ஆரஞ்சு, நட்ஸ் வகைகள், வாழைப்பழம், மீன், தர்பூசணி, கீரை போன்றவற்றை சாப்பிடுங்கள். வலியில்லாத மாதவிடாய்க்கு தயாராக இந்த வைட்டமின்கள் தேவை.

 

பார்வையற்ற நிலையிலும் அய்ஏஎஸ் படித்து சாதனை படைத்த பிரஞ்ஜால் பாட்டீல், கேரளத்தின் எர்ணாகுளம் மாவட்ட பயிற்சி ஆட்சியராக பொறுப்பேற்றுள்ளார்.

பார்வையற்ற ஒருவர், அதிலும் பெண் அதிகாரி, மாவட்ட பயிற்சி ஆட்சியராக பொறுப்பேற்பது, நாட்டிலேயே இதுதான் முதல் முறையாகும்.

பிரஞ்ஜால் பாட்டீலை இந்த பதவிக்கு நியமித்ததன் மூலம், கேரள இடது ஜனநாயக முன்னணி அரசு புதிய வழிகாட்டியுள்ளது.

கர்நாடக மாநிலம் உல்லாஸ் நகரை சேர்ந்தவர் என்.பி. பாட்டீல். பொறியாளர் ஆவார். இவரது மனைவி ஜோதி. இந்த தம்பதியின் மகள்தான் பிரஞ்ஜால் பாட்டீல். இவர் 2 வயதாக இருந்தபோது, காய்ச்சல் ஏற்பட்டு 2 கண்களிலும் பார்வை பறிபோனது.

எனினும், பெற்றோரின் ஊக்கத்தால், நன்கு படித்த பிரஞ்ஜாலின் பாட்டீல், தொடுதிரை உதவியுடன், மும்பை கல்லூரியில் பட்டப்படிப்பை முடித்தார். பின்னர் டில்லியில் உள்ள சர்வதேச கல்லூரியில் எம்.பில். மற்றும் பி.எச்.டி. டாக்டர் பட்டமும் பெற்றார்.

அதைத்தொடர்ந்து கடந்த 2014-ஆம் ஆண்டு அய்.ஏ.எஸ். தேர்வையும் பிரஞ்சால் பாட்டீல் எழுதினார். ஆனால், அதில் அவருக்கு 773ஆவது இடமே கிடைத்தது. இதனால் அவரால் ஆட்சியராக முடியவில்லை. அதே நேரத்தில் ரயில்வே துறையில் தேர்வாகி கணக்குப் பிரிவில் வேலைக்குச் சேர்ந்தார். எனினும் மாவட்ட ஆட்சியர் லட்சியத்தை அவர் கைவிடவில்லை.

2017ஆம் ஆண்டு மீண்டும் அய்.ஏ.எஸ். தேர்வு எழுதிய அவர், இந்த முறை 124ஆவது இடத்தைப் பிடித்தார். ஆட்சியர் ஆவதற்கு 124ஆவது ரேங்க் போதுமானதாக அமைந்தது.

இந்நிலையில்தான், பிரஞ்ஜால் பாட்டீலை, கேரள மாநிலம் எர்ணாகுளம் மாவட்ட பயிற்சி ஆட்சியராக அம்மாநில இடது ஜனநாயக முன்னணி அரசு நியமித்துள்ளது. பிரஞ்ஜால் பாட்டீலும், பயிற்சி ஆட்சியராக திங்கட்கிழமையன்று எர்ணாகுளம் மாவட்ட ஆட்சியர் அலுவலகத்தில் பொறுப்பேற்றுள்ளார்.

முன்னதாக, தனக்கு ஊக்கமும், தைரியமும் கொடுத்து வளர்த்த தனது தாய்தான், தன்னை ஆட்சியர் இருக்கையில் அமர வைக்க வேண்டும் என்று உயர் அதிகாரிகளிடம் அனுமதி கேட்டார். அதிகாரிகளும் அதற்கு அனுமதியளித்தனர்.

அதன்படி அவரது தாய் ஜோதி, மகள் பிரஞ்ஜால் பாட்டீலை ஆட்சியர் இருக்கையில் அமர வைத்தார்.

சாதிப்பதற்கு - கடினப் பயிற்சிக்கு ஈடு இணை எதுவுமில்லை

தொழில்முறை நீச்சல் போட்டியாளராக இருப்பது ஒன்று. சாதனை நோக்கில் நீச்சல் போட்டியாளராக இருப்பது இரண்டு. புலா இந்த இரண்டும் சேர்ந்த கலவை. தொடக்கத்தில் தொழில்முறை நீச்சல் போட்டியாளராக உருவாகி, பின்னர் சாதனை படைக்கும் நோக்கில் நீச்சலில் புலிப் பாய்ச்சல் காட்டியவர் இவர். இந்தியாவின் நீச்சல் ராணி எனப் புகழப்பட்டவர். தொழில்முறையாகக் குறைந்த போட்டிகளில் பங்கேற்றிருந்தாலும் சாதனை நோக்கில் இவர் நிகழ்த்தியவை மலைக்க வைப்பவை.

ஆறு வயதில் நீச்சல்

விளையும் பயிர் முளையிலேயே தெரியும் என்ற பழமொழிக்கு நூறு சதவீதம் பொருத்தமானவர் புலா சவுத்ரி. சிறுவயதில் மற்ற குழந்தைகள் ஓடிப் பிடித்து விளையாடிய போது புலாவோ வீட்டருகே இருந்த குட்டையில் இறங்கி விளையாடுவாராம். தினமும் குட்டையில் நேரத்தைக் கழித்து கால்களைத் தண்ணீரில் அடித்து நீந்தப் பழகியபோது அவருக்கு ஆறு வயது. தொடர்ந்து நீச்சலில் ஆர்வம் காட்டியதால், ஹூக்ளி ஆற்றில் நீச்சல் பழகப் பெற்றோர் அனுப்பி வைத்தனர். அந்த ஆற்றில் நீந்தித்தான் நீச்சல் நுணுக்கங்களை அவர் கற்றுக்கொண்டார்.

தங்கம் மேல் தங்கம்

மூன்றாண்டுகளுக்குள் நீச்சல் அத்துப்படியான நிலையில் போட்டிகளில் களம்கண்டார். ஒன்பது வயதில் தேசிய ஜூனியர் நீச்சல் போட்டியில் அவர் பங்கேற்றார். அவரைவிட வயதில் மூத்தவர்கள் போட்டியிட்டபோதும் வெற்றி என்னவோ புலாவுக்குத்தான் கிடைத்தது. அவர் பெற்ற முதல் பதக்கம் இது. இதன்பிறகு தேசிய ஜூனியர், சீனியர் அளவிலான போட்டிகளில் புலா தொடர்ந்து பங்கேற்றார். தேசிய அளவில ஆறு தங்கப் பதக்கங் களையும் வென்றார்.

சர்வதேசப் போட்டிகளிலும் புலா பங்கேற்றிருக்கிறார். தெற்காசிய அளவிலான நீச்சல் போட்டி அவற்றுள் குறிப்பிடத்தகுந்தது. 1991இல் இலங்கைத் தலைநகர் கொழும்பில் நடந்த தெற்காசிய நீச்சல் போட்டியில் இந்தியா சார்பில் பங்கேற்ற புலா, தங்கப் பதக்கம் வென்றார்.

இந்த வெற்றிக்குப் பிறகு தொழிற்முறை நீச்சல் போட்டிகளில் பங்கேற்பதைக் குறைத்துக்கொண்ட புலா, நீண்டதூர நீச்சல் போட்டியில் பங்கேற்க ஆர்வம் காட்டினார். அந்த ஆர்வம் பின்னர் வெவ்வேறு கண்டங் களில் கடல்களைக் கடக்கும் அளவுக்கு ஆர்வம் அதிகமானது. இதைத் தொடர்ந்து ஆர்ப்பரித்து எழும் கடல் அலைகளை எதிர்த்து நீந்தவும் பயிற்சியெடுத்தார். சுமார் இரண்டரை ஆண்டுகள் கடலிலேயே பொழுதைக் கழித்தார். கடல் பயிற்சி எதுவும் வீணாகவில்லை. 1989இல் முதன் முதலில் ஆங்கிலக் கால்வாயைக் கடந்து ஆச்சரியமூட்டினார்.

ஆங்கிலக் கால்வாயைக் கடந்த பிறகு புலாவின் தன்னம்பிக்கை அதிகரித்தது. தொடர்ந்து உலகில் உள்ள பல வளைகுடாக்களையும் கை கால்வாய்களையும் கடக்க அவர் முடிவு செய்தார். இதற்கிடையே 1996இல் உள் நாட்டிலும் அவர் மிகப் பெரிய சாதனையை அரங் கேற்றினார். அப்போது முர்ஷிதாபாத்தில் தேசிய நீச்சல் போட்டி நடந்தது. அதில் நீண்டதூர நீச்சல் போட்டியில் பங்கேற்ற புலா  81 கிலோ மீட்டர் தூரத்தைக் கடந்து வெற்றிவாகை சூடி, புதிய சாதனையையும் படைத்தார். அப்போது அவருக்கு 16 வயதுதான்!

ஏழு கடல் தாண்டி...

இந்த வெற்றிக்குப் பிறகு அவரது கவனம் முழுக்க கடலின் பக்கம் திரும்பியது. 1996-க்கும் 2005-க்கும் இடைப்பட்ட காலத்தில் மட்டும் அய்ந்து கண்டங்களில் உள்ள ஏழு கடல்களில் நீந்தி உலக சாதனை படைத்தார். 1998இல் மத்திய தரைக் கடலையும் அட்லாண்டிக் கடலையும் இணைக்கும் ஜிப்ரால்டர் ஜலசந்தியை மூன்றரை மணி நேரத்தில் கடந்து புதிய உலக சாதனை படைத்தார். அதன் பின்னர் அய்ரோப்பாவில் உள்ள திர்ரேனியக் கடல், நியூசிலாந்தில் உள்ள குக் நீரிணைப்பு, கிரீஸில் உள்ள டொரன்னஸ் வளைகுடா, கலிபோர்னி யாவில் உள்ள கேட்டலினா கால்வாய் ஆகியவற்றை நீந்திக் கடந்தார்.

தென்னாப்பிரிக்காவின் ரோபன் தீவிலிருந்து கேப்டவுன் நகருக்கு நீந்தி சாதனை படைத்தார். 1999இல் ஆங்கிலக் கால்வாயைக் கடந்ததன் பத்தாவது ஆண்டு தினத்தையொட்டி மீண்டும் ஆங்கிலக் கால்வாயை இன்னொரு முறை கடந்தார். இதன் மூலம் ஆங்கிலக் கால்வாயை இரண்டு முறை கடந்த முதல் ஆசியப் பெண் என்ற சாதனைக்கும் சொந்தக்காரரானார்.

2004இல் இலங்கையின் தலைமன்னார் இந்தியாவின் தனுஷ்கோடி இடையிலான தொலைவை 14 மணி நேரத்தில் கடந்து சாதனை படைத்தார். இதன் மூலம் உலகில் அய்ந்து கண்டங்களில் உள்ள ஏழு கடல்களில் நீந்திக் கடந்த முதல் பெண் என்ற சிறப்பைப் பெற்றார்.

முதன்முறை ஆங்கிலக் கால்வாயைக் அவர் கடந்த பிறகு 1990-லேயே அர்ஜூனா விருதுக்குப் புலா தேர்வு செய்யப்பட்டார். ஆனால், இன்னொரு மகுடமாக அதே ஆண்டில் பத்மசிறீ விருதுக்கும் தேர்வானார். ஒரே ஆண்டில் இரட்டை விருதுகளைப் பெற்று அந்த விருது களுக்குப் பெருமைச் சேர்த்தார். நீச்சலைத் தாண்டி அரசி யலிலும் இறங்கி, மூழ்காமல் நீந்தி வெற்றிக்கொடி நாட்டி னார் புலா. மேற்கு வங்க சட்டப்பேரவை உறுப்பினராகவும் அவர் இருந்ததே அதற்குச் சான்று.

தற்போது 48 வயதாகும் புலா, கொல்கத்தாவில் நீச்சல் பயிற்சி மய்யம் ஒன்றை நிறுவி, ஏராளமான இளம் பெண்களுக்கு நீச்சல் பயிற்சி அளித்துவருகிறார். நீச்சலில் சாதிக்க என்ன செய்ய வேண்டும் என்று அவரிடம் அடிக் கடி கேள்வி எழுப்பப்படுவது வாடிக்கை. அப்போதெல்லாம் அவர் சொல்லும் ஒரே பதில் இதுதான்: ஒரே ஒரு நாள்கூட பயிற்சியைத் தவறவிட்டுவிடாதீர்கள். சாதிப்பதற்குக் கடினப் பயிற்சிக்கு ஈடு இணை எதுவுமில்லை. நீச்சலில் சாதிக்க வேண்டுமென்றால் கனவில்கூட கடல்தான் வர வேண்டும்.

காவல்துறையில்

பெண்கள்!

உலகில் முதன்முதலில் லண்டன் மாநகர காவல் துறையில்தான் 1916 -ஆம் ஆண்டு 30 பெண் காவலர்கள் சேர்த்துக் கொள்ளப்பட்டனர்.

* இந்தியாவில், 1937 - ஆம் ஆண்டு கேரள மாநிலம் திருவிதாங்கூர் சமஸ்தானத்தில் முதன்முதலில் காவல் துறையில் பெண்களையும் சேர்த்து கொண்டார்கள்.

* 1948 ஆம் ஆண்டு டில்லியில் ஒரு பெண் உதவி ஆய்வாளர் தலைமையில் பெண்கள் காவலர் பிரிவு ஏற்படுத்தப்பட்டது.

* 1973-ஆம் ஆண்டு பெண்களை முழுமையாகக் கொண்ட காவல் நிலையம் கேரள மாநிலம் கொல்லங் கோட்டில் துவங்கப்பட்டது.

* தமிழ்நாட்டில் 1973- ஆம் ஆண்டு ஒரு பெண் உதவி ஆய்வாளர், ஒரு தலைமைக்காவலர், இருபது பெண் காவலர்கள் பணியில் அமர்த்தப்பட்டனர்.

* 1992ஆம் ஆண்டு சென்னை ஆயிரம் விளக்கில் முழுவதும் பெண்களைக் கொண்ட அனைத்து மகளிர் காவல் நிலையம் தொடங்கப்பட்டது.

 

60 வயதில் நீச்சல் பழக தொடங்கி கடந்த பத்தாண்டுகளில் நடந்த 60 முதல் 70 வயதுக்குட் பட்டவர்களுக்கான நீச்சல் போட்டி களில் பங்கேற்று பல பரிசுகளையும், விருதுகளையும் வாங்கி குவித் துள்ளார் பெங்களூரை சேர்ந்த ஜெயசிறீ. அண்மையில் தனது 70 ஆவது வயதில் கஜகஸ்தான் நாட்டில் நடந்த இந்திய - கஜகஸ் தான் அக்வாடிக் வாகையர் பட்டப் போட்டியில் கலந்து கொண்டு 5 தங்கப் பதக்கங்களைப் பெற்றுள்ளார்.

சிறுவயது முதலே விளையாட்டில் ஈடுபாடு கொண்டிருந்த

ஜெயசிறீ, இளவயதில் கோல்ப் மற்றும் ஸ்குவாஷ் விளையாட்டிலும் ஆர்வமாக இருந்தார். கூடவே நீச்சலும் கற்றிருந்தார். பின்னர், குடும்பத்தில் ஈடுபடவே விளையாட்டுத் துறையை மறந்திருந்தார். 60 வயதில் மூட்டுவலி பிரச்சினையில் நீச்சல் செய்வது நல்லது என்று சிலர் கூறவே, மீண்டும் பெங்களூரு கிளப் நீச்சல் பயிற்சியாளர் செரியன் உதவியுடன் நீச்சல் பழக தொடங்கினார். அந்த நேரத்தில் இவரது மகளும், நீச்சல் போட்டிகளில் மாநில அளவில் பல பரிசுகளை பெற்றிருந்த அனுசுயா ஆல்வா, தன் தாயாரை 60 முதல் 70 வயதானவர் களுக்கான நீச்சல் போட்டிகளில் பங்கேற்கும்படி ஆர்வமூட்டினார். அதற்கான பயிற்சி களைப் பெற்ற ஜெயசிறீ, முதன்முறையாக கருநாடகத்தில் மாநில அளவில் 60 முதல் 64 வயதானவர்களுக்காக நடந்த நீச்சல் போட்டியில் கலந்து கொண்டு 6 தங்க பதக்கங்களை வென்றார். இது அவருக்குள் நம்பிக்கையையும், உற்சாகத்தையும் ஏற்படுத்தவே தொடர்ந்து இந்தூர், ராஜ்காட், அய்தராபாத் போன்ற நகரங்களில் தேசிய அளவில் மூத்தவர்களுக்கான பிரிவில் நடத்தப்பட்ட நீச்சல் போட்டிகளில் பங்கேற்க தொடங்கினார்.

பிரெஸ்ட் ஸ்ட்ரோக்கில் திறமைசாலியான இவர் 50 மீட்டர் தூரத்தை 1.09 நிமிடங்களில் கடந்து சாதனை படைத்துள்ளார். தேசிய அளவில் நீச்சல் போட்டி களில் பங்கேற்ற வெற்றிகளை குவித்த இவர், 2018 - ஆண்டு பிப்ரவரி 11 ஆம் தேதி கஜகஸ்தானில் தொடங்கிய சர்வ தேச 70 முதல் 75 வயதானவர்களுக்காக நடத்தப்பட்ட நீச்சல் போட்டியில் இந்தியா சார்பில் அனுப்பப்பட்ட 42 நீச்சல் வீரர்களில் கருநாடகா சார்பில் ஜெயசிறீயும் இடம் பெற்றார். அந்த குழுவில்

ஜெயசிறீதான் மிகவும் வயதான மூத்த உறுப்பினர் ஆவார். அங்கு நடந்த அனைத்துப் போட்டிகளும் ஒரே நாளில் நடத்துவதென தீர்மானிக்கப் பட்டது. இதுவரை ஒரே நாளில் ஒன்றுக்கு மேற்பட்ட போட்டிகளில் கலந்து கொண்ட அனுபவம் இல்லாத ஜெயசிறீக்கு இந்த முடிவு அதிர்ச்சி யையும், உதறலையும் கொடுத்தாலும் மனதை திடப்படுத்திக் கொண்டு அனைத்து போட்டிகளிலும் பங்கேற்பதென முடிவு செய்தார். ஒரே நாளில் 50 மீட்டர் பேக் ஸ்ட்ரோக், 50 மீட்டர் ப்ரீஸ்டைல் மற்றும் 4100 மீட்டர் மெட்லே ரீலே என அய்ந்து போட்டிகளில் கலந்துகொண்டு 5 தங்க பதக்கங்களை வென்றார்.

வானில் “அனிதா” துணைக்கோள்

தமிழக மாணவி சாதனை

கைக்குள் அடங்கும் “கலாம்” துணைக்கோளைத் தொடர்ந்து  இதோ  “அனிதா” துணைக் கோள் - உருவாக்கி யிருப்பவர் வில்லெட் ஓவியா. திருச்சி ஆர். எஸ். கே பள்ளியில் பிளஸ் டூ படிக்கும் மாணவி. வயது பதினேழு.

பிளஸ் டூ தேர்வுகள் எழுதிவிட்டு காத்திருக்கும் வில்லெட் ஓவியா, தான் உருவாக்கிய துணைக் கோள் பற்றி கூறியதாவது:

“சில ஆண்டுகளுக்கு முன், விவசாயத்திற்கு நவீன முறையில் சிக்கனமாக நீர்ப்பாசனம் எப்படி செய்யலாம் என்பது குறித்த திட்டத்தை டாக்டர் கலாம் அவர்களுக்கு அனுப்பி வைத்திருந்தேன். அதை கலாம் சார் பாராட்டினார். தூர்தர்ஷன் பொதிகை சானலில் “ஏழாம் அறிவு’ என்ற அறிவியல் போட்டித் தொடர் நடைபெற்றது. அதில் நானும் பங்கு பெற்றேன். நிகழ்ச்சியின் முடிவில் முதல் ஏழு பேர்களில் ஒருத்தியாக என்னால் வர முடிந்தது . அந்த நிகழ்ச்சிதான் என்னை துணைக் கோள் குறித்து சிந்திக்கச் செய்தது. அதன் காரணமாக மின்னணுவியல், மின்னியல் தொடர்பாக படிக்க ஆரம்பித்தேன்.

சுற்றுப்புறச் சூழலால் காற்றில் மாசு நாளுக்கு நாள் அதிகமாகிறது. நாம் சுவாசிக்கும் காற்றில் உள்ள மாசுகள் அதிகமாவதால் பல நோய்க்கு காரணம் தெரியாமலேயே இரையாகிறோம் . “காற்றில் மாசுகள்’ குறித்து மக்களுக்கு விழிப்புணர்ச்சி ஏற்படுத்த வேண்டும் என்பதற்காக இந்த துணைக்கோளை வடிவமைத்தேன். பூமியைச் சுற்றியிருக்கும் வாயு மண்டலம் பூமி வெப்பம் அடைவதால் எப்படியெல்லாம் மாற்றம் அடைகிறது... தாக்கத்திற்கு உள்ளாகிறது என்பதை ஆய்வு செய்வதற்காக ஒரு துணைக் கோள் தயாரிக்கலாம் என்று முடிவு செய்தேன். வாயு மண்டலத்தில் இருக்கும் கார்பன் டை ஆக்சைடு, கார்பன் மோனாக்சைடு, ஆக்சிஜன் மற்றும் இதர வாயுக்களின் அளவு எவ்வளவு உள்ளது என்பதை அறிய துணைக்கோள் உதவும். “நீட்’ தேர்வு காரணமாக உயிரிழந்த அனிதாவின் நினைவாக எனது துணைக் கோளுக்கு “அனிதா - சாட்” என்று பெயரிட்டேன்.

இந்த துணைக்கோளைத் தயாரிக்க மூன்று ஆண்டுகள் பிடித்தது. “அனிதா’ துணைக்கோள் ஆறு அங்குல நீளம், அகலம், உயரம் கொண்டு கன சதுர வடிவில் இருக்கும். எடை சுமார் நானூறு கிராம். இந்த துணைக் கோளைத் தயாரிப்பதில் எல்லா வகையிலும் உதவியவர் அக்னீஷ்வர் ஜெயப்ரகாஷ். சென்னை மற்றும் “அக்னி ஃபவுண் டேஷன்” அமைப்புகளின் தலைவர். துணைக்கோளுக்கு தேவையான பாகங்களை வாங்கவும், அதை எப்படி கையாள வேண்டும் என்பதை சென்னையைச் சேர்ந்த கருடா ஏரோஸ்பேஸ் நிறுவனம் உதவியது.

இந்த துணைக் கோளை கூம்பு வடிவில் இருக்கும் கருவியில் வைக்கப் பட்டு ஹீலியம் பலூன் மூலம் பறக்க விடப்படும். இந்த நிகழ்வு வரும் மே 6ஆம் தேதி மெக்சிகோவில் நடை பெற்றது.

இந்த துணைக் கோளை உருவாக்க சுமார் ஒன்றே கால் லட்சம் செலவானது. அதனையும், துணைக் கோள் விண்வெளியில் செலுத்தப்படும் செலவையும் அக்னீஷ் வர் ஜெயப்ரகாஷ் சார் ஏற்றுக் கொண்டுள்ளார்.

புவியிலிருந்து வான் நோக்கி சுமார் அய்ம்பது கி.மீ தூரம் வரை வாயு அல்லது வளி மண்டலம் பரவியுள்ளது. துணைக் கோளில் வளி மண்டலத்தின் வெப்பம், அங்கி ருக்கும் காற்று அழுத்தம், மண்டலத்தில் (பூமியிலிருந்து சுமார் பதினைந்து கி. மீ தூரத்தில்) குடி கொண்டிருக்கும் வாயுக்கள், அதன் அளவு, அங்கே காற்றின் தூய்மையின் அளவு குறித்த புள்ளிவிவரங்களைப் பதிவு செய்ய சென் சர்கள் பொருத்தப்பட்டுள்ளன. பூமியிலிருந்து துணைக் கோளின் வான் நோக்கிய பயணத்தை படம் பிடித்து நேரடியாக அனுப்பத் தேவையான கேமராவும் துணைக் கோளில் உண்டு. பதிவு செய்யப்படும் புள்ளிவிவரங்கள் உடனுக்குடன் மெக்சிகோ நகரில் இருக்கும் அஸ்ட்ரா ஆய்வகத்திற்கு அனுப்பி வைக்கப்படும். வாயு மண்டலம் நிலைமை குறித்து தெரிந்து கொண்டு அதை பாதுகாக்கும் நடவடிக்கைள் எடுக்க உதவியாக இருக்கும். ஹீலியம் பலூன் அதிகபட்சம் அய்ம்பது கி. மீ உயரம் வரை போகும். அங்கு போனதும் சூரிய ஒளியின் வெப்பம் காரணமாக வெடித்து விடும். அப்போது துணைக் கோள் வைக்கப்பட் டிருக்கும் கருவி கீழே விழத்தொடங்கும். அது பத்திரமாக வந்து சேர பாராசூட் விரிந்து உதவும். அநேகமாக கடலில் வந்து இறங்க வாய்ப்புள்ளது. அதை மீட்டு ஆய்வு செய்வார்கள்.  இந்தத் திட்டம் குறித்து அறிந்ததும் தமிழக முதல்வர் மற்றும் கல்வி அமைச்சர் நேரில் அழைத்துப் பாராட்டினார்கள்.

சிறு வயதிலிருந்து மருத்து வராக வேண்டும் என்ற லட்சி யத்துடன் படித்து வந்தேன். அதனால் “பிளஸ் ஒன்” னில் பயோ பாடங்களை எடுத்தி ருந்தேன்.

துணைக் கோள் குறித்து சிந்திக்கத் தொடங்கியதும் மின்னணுவியல், மின்னியல் தொடர்பான புத்தகங்களை ஆழமாகப் படிக்கத் தொடங்கினேன்.

தொடர்ந்து அந்த பாதையில் போகலாம் என்றாலும், “மருத்துவராக வேண்டும்” என்ற நீண்ட நாள் கனவை நனவாக்க தேர்வுகளுக்கு என்னைத் தயார் செய்து கொண்டிருக்கிறேன்.

மே 6 ஆம்தேதி எனது துணைக் கோள் வளிமண்டலம் நோக்கி அனுப்பப்பட்டது. மே 6ஆம் தேதி  தேர்வு எழுத வேண்டும் என்று சென்றதால் , எனது துணைக் கோளின் விண் பயணத்தை நான் பார்க்க முடியவில்லை. அதுதான் கொஞ்சம் வருத்தத்தைத் தருகிறது” என்கிறார் வில்லெட் ஓவியா.

தெரியுமா உங்களுக்கு....

* காலில் ரத்தம் ஓட்டம் சீராக, காலையிலும், மாலையிலும் மல்லாந்து படுத்துக் கொண்டு பாதங்களை மெல்ல உயரத் தூக்கி இரண்டு நிமிடம் அப்படியே நிறுத்திப் பிறகு மெதுவாக கீழே இறக்க வேண்டும். இவ்வாறு பத்து முறை செய்தால், கால்களில் ரத்த ஓட்டம் சீராகி கால்கள் பலம் பெறும். சுறுசுறுப்பு உண்டாகும்.

* காலையில் எழுந்ததும் ஒரு டம்ளர் குளிர்ந்த நீர் குடிக்கவும். இதனால் குடல் சுத்தமாகும். உடலும் புத்துணர்ச்சியுடன் காணப்படும்.

* இரவில் படுக்கச் செல்லும் முன் ஆலிவ் எண்ணெய்யைத் தடவிக் கொண்டால், முகம் பளிச்சிடும். மேலும் புருவங்கள் மென்மையாகவும், அழகாகவும் இருக்கும்.

பெரும்பாலான விளையாட்டுகளில் ஆண்கள் ஆதிக்கம் செலுத்தும்போதும் துப்பாக்கி சுடுதல் விளையாட்டைப் பற்றிக் கேட்கவே வேண்டாம். 2000-க்கு முன்புவரை ஆண்களின் ஆதிக்கம் நிறைந்த விளையாட்டாக அது இருந்தது. இந்த நிலையை மாற்றியவர் அஞ்சலி பாகவத். சர்வதேச அளவில் துப்பாக்கி சுடும் போட்டியில் பங்கேற்ற முதல் இந்தியப் பெண்; உலகக் கோப்பை துப்பாக்கி சுடும் போட்டியில் கோப்பை வென்ற முதல் இந்தியப் பெண்; உலகத் துப்பாக்கி சுடும் வீராங்கனைகளில் இந்தியாவின் முகமாக நீண்ட காலம் கோலோச்சியவர் எனப் பல சிறப்புகளுக்குச் சொந்தக்காரர் அவர்.

பள்ளிப் பருவத்தில் மும்பையில் வசித்த அஞ்சலி பாகவத்துக்குத் துப்பாக்கி சுடும் விளையாட்டு, தேசிய மாணவர் படை (என்.சி.சி.) மூலமே அறிமுகமானது. என்.சி.சி. பயிற்சியின்போது துப்பாக்கி பிடிக்கக் கற்றுக்கொண்டதுமே இந்த விளையாட்டின் மீது அவருக்குக் காதல் மலர்ந்தது. பள்ளிப் பருவத்தில் மட்டுமல்ல; கல்லூரியில் காலடி எடுத்த வைத்தபோதும் என்.சி.சி. அமைப்பு இருக்கும் கல்லூரியாகத் தேடிச் சேர்ந்தார்.

முறைப்படி துப்பாக்கி சுடக் கற்றுக்கொள்ள விரும்பிய போது அவர் கல்லூரிப் படிப்பையே முடித்திருந்தார். 21 வயதில்தான் மகாராஷ்டிர ரைபிள் சங்கத்தில் சேர்ந்து துப்பாக்கி சுடும் பயிற்சியை எடுக்கத் தொடங்கினார். ஒரே வாரத்துக்குள் துப்பாக்கியைப் பிடிக்க மட்டுமல்ல; குறி பார்த்துச் சுடவும் கற்றுக்கொண்டார்.

1990-களின் தொடக்கத்தில் மாநில, தேசிய அளவிலான போட்டிகளில் பங்கேற்று, துப்பாக்கி சுடுதலில் அஞ்சலி தன் திறமையை வெளிப்படுத்திக்கொண்டிருந்தார். 1995இல் சென்னையில் நடைபெற்ற தெற்காசிய விளையாட்டுப் போட்டியில் வெண்கலப் பதக்கத்தை வென்று, சர்வதேச அளவிலான பதக்க வேட்டைக்குப் அடித்தளமிட்டார்.  1999இல் நேபாளத்தில் நடைபெற்ற தெற்காசிய விளையாட்டுப் போட்டியும் அஞ்சலிக்கு மறக்க முடியாத தொடர்தான். இந்தத் தொடரில் மட்டும் நான்கு தங்கப் பதக்கங்களை வென்று முத்திரை பதித்தார்.

விளையாட்டைப் பொறுத்தவரை வீரர், வீராங்கனைகள் எல்லாருக்குமே 30 வயது என்பது வேகத் தடையைப் போன்றது. குறிப்பாக, இளம் போட்டியாளர்களுடன் போட்டி போட்டு விளையாடும் திறன் குறையத் தொடங்கிவிடும். ஆனால், அஞ்சலி பாகவத் தலைகீழாக இருந்தார். இரண்டாயிரமாவது ஆண்டுக்கு பிறகு அஞ்சலி பாகவத் மீண் டெழுந்தார். அப்போது 31 வயதை எட்டியிருந்த அஞ்சலி, அதன் பிறகு சர்வதேச அளவில் பதக்கங்களைக் குவித்தார்.

முதன்முறையாக 2000இல் சிட்னியில் நடைபெற்ற ஒலிம்பிக்கில் பங்கேற்கஅஞ்சலி பாகவத்துக்கு வாய்ப்பு கிடைத்தது. ஒலிம்பிக்கில் பதக்கம் எதுவும் கிடைக்கவில்லை யென்றாலும், குறிப்பிடத்தக்க சாதனையைப் படைக்க அவர் தவறவில்லை. துப்பாக்கி சுடும் போட்டியின் இறுதிச் சுற்றுவரை முன்னேறினார். இந்தியப் பெண் ஒருவர் துப்பாக்கி சுடுதலில் இறுதிச் சுற்றுவரை முன்னேறியது அதுதான் முதல்முறை.

2002இல் அஞ்சலியின் விளையாட்டு வாழ்க்கையின் வசந்த காலம். அந்த ஆண்டு மான்செஸ்டரில் காமன்வெல்த் போட்டிகள் நடைபெற்றன. இந்தத் தொடரில் மட்டும் 10 மீட்டர் ஏர் ரைபிள், 3 விதமான 50 மீட்டர் ஏர் ரைபிள் பிரிவுகளில் பங்கேற்ற அஞ்சலி பாகவத், நான்கு பிரிவுகளிலுமே தங்கப் பதக்கத்தைத் தனதாக்கி, உலக சாதனை படைத்தார். இதேபோல 2003இல் இந்தோ - ஆப்ரிக்கத் துப்பாக்கி சுடுதல்  வாகையர் பட்டப் போட்டியிலும் இரு பிரிவுகளில் பங்கேற்றுத் தங்கம், வெள்ளி என இரு பதக்கங்களை வென்றார். இந்தத் தொடரிலும் பதக்கம் வென்ற முதல் இந்தியப் பெண் என்ற சாதனைக்கு அஞ்சலி சொந்தக்காரர் ஆனார். இந்தக் காலகட்டத்தில் 10 மீட்டர் ஏர் ரைபிள் பிரிவுத் தரவரிசைப் பட்டியலில் அஞ்சலி பாகவத் முதலிடத்துக்கு முன்னேறி புதிய உச்சத்தைத் தொட்டார்.

பதக்க வேட்டை

2004 ஏதென்ஸ் ஒலிம்பிக் போட்டியில் பதக்கம் வெல்வார் என்ற எதிர்பார்ப்புக்கு மாறாக, 8ஆவது இடத்தைப் பிடித்தார். ஆனால், இரண்டாவது முறையாக ஒலிம்பிக்கில் இறுதிச் சுற்றுவரை முன்னேறியவர் என்ற பெருமையோடு அவர் நாடு திரும்ப வேண்டியிருந்தது. மூன்றாவது முறையாக 2008 பெய்ஜிங் ஒலிம்பிக்கில் பங்கேற்கும் வாய்ப்பு கிடைத்தபோது அவர் அதை சரியாகப் பயன்படுத்திக்கொண்டார். அப்போது அவர் 39 வயதை எட்டியிருந்தாலும், ஆட்டத் திறனில் கொஞ்சமும் தடுமாற்றம் இல்லாமல் தோட்டாவைப் போல் சீறினார்.

சுமார் 20 ஆண்டுகள் நீடித்த அஞ்சலியின் விளையாட்டுப் பயணத்தில், அவர் குவித்த பதக்கங்கள் ஏராளம். சர்வதேச அளவிலான போட்டிகளில் மட்டும் 28 தங்கம், 22 வெள்ளி, 6 வெண்கலப் பதக்கங்களை வென்றிருக்கிறார். இதில் காமன்வெல்த் போட்டிகளில் மட்டும் 13 தங்கப் பதக்கங்களைப் பெற்றிருக்கிறார். தேசிய அளவில் 54 தங்கப் பதக்கங்களை வென்ற ஒரே வீராங்கனை அஞ்சலி மட்டுமே.

குறி பார்த்து பதக்கத்தைச் சுடுவதில் தேர்ந்தவராக இருந்ததால்தான் அவரை இந்தியாவின் அர்ஜூனா, இந்தியாவின் ஷூட்டிங் ராணி எனப் பெருமையோடு அழைக்கிறார்கள். அர்ஜூனா விருது, ராஜீவ் காந்தி கேல் ரத்னா விருது உள்பட 14 விருதுகளை அவர் வாங்கிக் குவித்திருக்கிறார்.

2010க்குப் பிறகு விளையாட்டுப் போட்டிகளிலிருந்து ஓய்வுபெற்ற அஞ்சலி, தொடர்ந்து விளையாட்டுத் துறை சார்ந்த பணிகளிலும் சமூக சேவையிலும் ஈடுபட்டுவருகிறார். இந்தியப் துப்பாக்கி சுடும் போட்டியில் பெண்களின் எண்ணிக்கை இன்று கணிசமாகக் கூடியிருப்பதில் அஞ்சலி பாகவத்துக்கு முக்கியப் பங்கு இருக்கிறது. ஆண்கள் மட்டுமே கோலோச்சிக்கொண்டிருந்த ஒரு விளையாட்டில், தனி ஒருவராக ராஜ்ஜியத்தை நிறுவியவர் அஞ்சலி. துப்பாக்கி சுடுதல் போட்டியில் அவர் போட்ட விதை இன்று ஆல மரமாகக் கிளை பரப்பி நிற்கிறது.

Banner
Banner