எழுத்துரு அளவு Larger Font Smaller Font

ட்ரோன்களை அழிக்க நுண்ணலை கருவி!  

ஆளில்லாமல் பறக்கும் வாகனங்களான, ‘ட்ரோன்’களின் பயன்பாடு அதிகரித்து வருகின்றது. இதனால் தடை செய்யப்பட்ட பகுதிகளின் மேல் பறக்கவிடுவது போன்ற அத்து மீறல்களும் அதி கரித்துள்ளன.

எனவே, ராணுவம், காவல்துறையினருக்கு ட்ரோன்களை தடுக்க அல்லது அழிக்க புதிய வகை ஆயுதத்தை அமெரிக்க ராணுவத்திற்காக உருவாக்கியிருக்கிறது ‘ரேதியான்’ நிறுவனம். மைக்ரோவேவ் எனப்படும் நுண்ணலைகளை பயன்படுத்தும், ‘பேசர்’ என்ற இச் சாதனம் டிஷ் ஆண்டனா போன்ற அமைப்பையும், நுண்ணலைகளை உற்பத்தி செய்யும் பெரிய பெட்டி போன்ற அமைப்பையும் கொண்டி ருக்கிறது.

ட்ரோன்கள் பறக்கும் இடத்தை துல்லியமாக கண்டறிய ரேடார் வசதியும் இதில் உண்டு. ட்ரோனை கண்டறிந்ததும், டிஷ் மூலம் அடர்த்தியான நுண்ணலை துடிப்புகளை பேசர் அனுப்பும். இதனால் ட்ரோன்களில் இருக்கும் மின்னணு சாதனங்கள் நொடியில் பொசுங்கிவிடும்.

ஒரே சமயத்தில் பல ட்ரோன்களை இதுபோல பொசுக்க பேசரால் முடியும். அதுமட்டுமல்ல, எதிரியின் செயல்பாடுகளை முடக்க, அவர்கள் பயன்படுத்தும் எந்த மின்னணு சாதனத்தையும் தொலைவிலிருந்தே வறுத்தெடுக்க பேசரால் முடியும். இதை சிவிலியன்கள் பகுதியில் பயன்படுத்தப்படுவதை கற்பனை செய்தாலே நடுக்கம் வருகிறது, இல்லையா?

பழைய துணியிலிருந்து விமான எரிபொருள்!

வீணாகும் பொருட்களை மறுசுழற்சி செய்து, எரிபொருட்களை தயாரிக்க முடியுமா? இன்று, உலகெங்கும் உள்ள சுற்றுச்சூழல் ஆர்வலர்கள், இந்த நோக்கத்தில் பல ஆராய்ச்சிகளை செய்து வருகின்றனர்.

ஜப்பானின் சுற்றுச்சூழல் திட்டமிடல் அமைப்பான, ‘ஜெப்லான்’ பசுமை பூமி அமைப்பு மற்றும் ஜப்பான் ஏர்லைன்ஸ் ஆகியவை, பழைய துணிகளிலிருந்து, ‘பயோ எத்தனால்’ எனப்படும் எரிபொரு ளை தயாரிக்க முயன்று வருகிறது. பழைய துணிகளில் உள்ள பருத்தியை நொதிக்கவைத்து, அதில் கிடைக்கும் சர்க்கரைகளை கொண்டு விமான எரிபொருளை தயாரிப்பதே இந்த அமைப்புகளின் நோக்கம். இதற்கென, ஜப்பானிலுள்ள துணி விற்பனையாளர்களிடம் பேசி உபரியான, விரயமான துணிகளைப் பெற ஏற்பாடுகள் செய்யப்பட்டுள்ளன. பருத்தியிலிருந்து குறைந்த அளவே சர்க்கரையை பிரித்தெடுக்க முடியும்.

எனவே, வீணாகும் இதர நார் பொருட்கள் மற்றும் காகிதங்களையும் கலந்து நொதிக்கவைத்தால், கட்டுபடியாகக்கூடிய அளவுக்கு விமான எரிபொருள் கிடைக்கும். இதற்கென உருவாக்கப்பட்டுவரும் சோதனை ஆலையிலிருந்து வரும் பயோ எத்தனாலை, அடுத்த மூன்று வருடங்களுக்கு பயன்படுத்தி வெள்ளோட்டம் பார்க்கவிருக்கிறது ஜப்பான் ஏர்லைன்ஸ்.

தமிழில் கருத்துக்களை தெரிவிக்க -  


Security code
Refresh

Banner
Banner