ஒரு நட்சத்திரத்தை சுற்றி வாயு மற்றும் தூசுகளால் உருவாகி வரும் புதிய கிரகத்தை வானியலாளர்கள் படமெடுத் துள்ளனர். இதுபோன்ற உரு வாக்க நிலையிலுள்ள கிரகத்தை ஆராய்ச்சியாளர்கள் பல ஆண்டுகளாக தேடி வரும் நிலையில், முதல் முறையாக இது கண்டெடுக்கப்பட்டுள்ளது.

பிடிஎஸ் 70 என்று பெயரிடப்பட்டுள்ள இந்த குள்ள நட்சத்திரத்திற்கு 10 மில்லியனுக்கும் குறைவான வயதே இருக்குமென்றும், மேலும் இதன் துணைக்கோளின் வயது 5 முதல் 6 மில்லியன் வயதுகள் இருக்கு மென்றும் தெரியவந்துள்ளது.

பிடிஎஸ் 70பி என்று பெயரிடப்பட்டுள்ள இது வியாழனைவிட பல மடங்கு பெரியதாக இருக்குமென்றும், மேலும் அது மேகமூட்டமாக வளிமண்டலத்தை கொண்டிருக்கலாம் என்றும் தெரிகிறது.

யுரேனஸ் சூரியனை சுற்றிவரும் தூரத்தை போன்று இந்த கோளும் அதன் நட்சத்திரத்தை சுற்றிவருமென்று ஜெர்மனியிலுள்ள மாக்ஸ் பிளாங்க் இன்ஸ்டியூட் பார் அஸ்ட்ரானமியின் ஆராய்ச்சியாளர்கள் குழு கண்டறிந்துள்ளது. இது, குள்ள நட்சத்திரத்தை ஒவ்வொரு முறை சுற்றி வருவதற்கும் 118 ஆண்டுகளாகிறது. நமது சூரிய குடும்பத்திலுள்ள எல்லா கோள்களைவிட அதிகமாக, அதாவது இதன் மேற்பரப்பு வெப்பநிலை 1,000 செல்சியஸை தாண்டும் என்று கருதப்படுகிறது. கொரோனாகிராஃப் என்ற கருவியை பயன்படுத்தி மங்கலாக காணப் படும் இந்த கிரகத்தின் ஒளி தடுக்கப்பட்டதன் மூலமே இதன் இருப்பிடம் கண்டறியப்பட்டதாக ஆராய்ச்சியாளர்கள் தெரிவித்துள்ளனர்.

கோள்கள் எப்படி உருவாகின்றன?

ஒரு நட்சத்திரம் உருவாகும்போது எஞ்சியிருக்கும் பொருட்களே கிரகங்களாக உருவாகின்றன என்ற கோட்பாடு அனைவராலும் பொதுவாக ஏற்றுக்கொள்ளப்படுகிறது.

பெரும்பாலும் வாயு மற்றும் தூசுக்களை கொண்டிருக்கும் இது, உருவான புதிய நட்சத்திரத்தை பரந்த வட்டப்பாதையில் சுற்றி வரும்.

காலப்போக்கில், அந்த சிதைவுகளின் சிறுபகுதிகள் ஒன்றிணைந்து ஒட்டிக்கொள்ளும். அவை எந்தளவிற்கு அளவில் விரிவடைகிறதோ, அந்தளவிற்கு புவி ஈர்ப்பு விசையை கொண்டிருக்கும். மேலும், உருவாக்க நிலையிலுள்ள மற்ற கோள்களிடமிருந்து கூடுதல் சிதைவு களை கவரும். அவ்வாறு உருவாகும் அமைப்பு, தனது பாதையை தெளிவாக அமைத்துக்கொள்ளுமானால், புதிய கிரகமாக உரு வெடுக்கிறது.

நமது சூரியக் குடும்பத்தை அடிப்படையாக கொண்டே இதற்கான கோட்பாட்டை ஆராய்ச்சியாளர்கள் உருவாக்கவுள்ளனர். பிடிஎஸ் 70பி போன்ற கோள்களை அதன் தொடக்ககாலம் முதலே கவனித்து வந்தால் இதுகுறித்த பல்வேறு செயல்பாடுகளை புரிந்துகொள்வதற்கு வானியலாளர்களுக்கு உதவிகரமாக இருக்கும் என்று கருதப்படுகிறது.

முதியோரின் வாழ்க்கையை சுலபமாக்கும் ‘மின்’ ஆடை

தினமும் பத்தாயிரம் அடி தூரம் நடப்பதை உறுதிப் படுத்த ஸ்மார்ட் வாட்ச் அணிவதிலிருந்து வங்கிக்கணக்கு தகவல்களை தெரிந்து கொள்வது வரை, வேரபிள் டெக்னாலஜி எனப்படும் அணி சாதன தொழில்நுட்பம் நமக்கு வெகுவாக பயன்பட்டு வருகிறது. நமது உடலில் அணியக்கூடிய மின் சாதனங்கள் நமக்கு தனிப்பட்ட பலன்களை மட்டும் தருவதில்லை, பெரிய அளவிலான சமூக பிரச்சினைகளுக்கும் தீர்வு காண உதவுகிறது.

உதாரணமாக முதியவர்கள் எண்ணிக்கை அதிகரித்து வருவதை எடுத்துக்கொள்ளலாம். 21ஆம் நூற்றாண்டின் மாபெரும் சமூக மாற்றங்களில் ஒன்றாக  முதியோர் எண்ணிக்கை உயர்வை குறிப்பிடுகிறது அய்க்கிய நாடுகள் சபையின் ஓர் அறிக்கை.

60 அல்லது அதற்கு அதிக வயதுள்ளவர்கள் எண் ணிக்கை 2050ஆம் ஆண்டு வாக்கில் தற்போதுள்ளதை விட இரண்டு மடங்குக்கு மேல் அதிகமாகிவிடும் என்கிறது அவ்வறிக்கை.

இதனால் ஏற்படக்கூடிய பிரச்சினைகளில் இடம் விட்டு இடம் நகர்தலும் ஒன்று. அதாவது ஒருவருக்கு வயது அதிகரிக்க அதிகரிக்க இடப்பெயர்வும் கடினமான ஒன்றாகிவிடும். வீடு, பொது இடங்கள், அலுவலகம் என எல்லா இடங்களிலும் சவால்களை சந்திக்க நேரிடும்.

புது தொழில்நுட்பம்

இதற்கு புது வகையான அணி சாதன தொழில்நுட்பம் உதவிக்கு வர உள்ளது.  முதியோர்களுக்கு என்றே எடை குறைவான எளிதில் அணியக்கூடிய ஒரு சூப்பர் ‘சூட்’ ஒன்று வடிவமைக்கப்பட்டுள்ளது.

எஸ்.ஆர்.அய் இன்டெர்நேஷனல் என்ற லாப நோக்கமற்ற  நிறுவனத்தின் உதவியுடன் இயங்கும் சீஸ்மிக் என்ற நிறுவனம் இதை வடிவமைத்துள்ளது. அணிப வர்களின் உடலுடன் ஒட்டியவாறு உள்ள இந்த ஆடை அவர்களின் சக்தியையும் அதிகரிக்கிறது.

இந்த ஆடையில் உள்ள ‘மின்சார தசைகள்’ சின்னஞ்சிறு மோட்டார்களால் இயக்கப்படுகின்றன. மனித உடல் தசை எப்படி வேலைசெய்கிறதோ அதே போல் இந்த ‘மின்சார தசையும்‘ இயங்குகிறது.

உடலின் மூட்டுப்பகுதிகளில் உள்ள துணியுடன் ‘மின்சார தசைகள்’ ஒருங்கிணைந்துள்ளன. துணியிலுள்ள பிடிமான தளத்தால் இது சாத்தியமாகிறது. நமது உடலுக்குள் உள்ள எலும்பும் தசையும் எப்படி ஒட்டி  செயல்படு கின்றனவோ அதே போல இது செயல்படுகிறது.

உடலின் அசைவுகளை கண்காணிக்கும் கணினியும் அதற்கான சென்சாரும் ஆடையுடன் இணைக்கப் பட்டுள்ளது.

‘மின்சார தசைகள்’ எப்போது இயங்க வேண்டுமென அதனுடன் உள்ள மென்பொருள் உத்தரவிடும். இந்த செயல்பாட்டுக்கு தேவையான மோட்டார், மின்கலன், மின் சுற்று பலகைகள் போன்றவை அறுகோண வடிவில் உடலில் பொருத்த தோதான ஒரு சிறிய ஒரு பெட்டிக்குள் வைக்கப்பட்டிருக்கும்.

இயங்குவதற்கான சுதந்திரம்

நடக்க முடியாத நிலையில் இருக்கும் முதியவர்களுக்கு கம்பும் வாக்கர்களும்தான் தற்போது உதவி வருவதாக கூறுகிறார் சீஸ்மிக்கின் நிறுவனரும் தலைமை செயல் அதிகாரியுமான ரிச் மஹோனி.

சக்கர நாற்காலிகள் கூட இது போன்றவர்களுக்கு உதவுகின்றன. ஆனால் நகரும் தன்மை சற்றே குறைவாக உள்ள  முதியவர்களுக்கு உதவும் நோக்கில் உருவாக்கப் பட்டுள்ளது  இந்த மின்சார ஆடை.

இந்த ஆடை அணிய கச்சிதமாக இருப்பதுடன் சிக்கலில்லாமல்  செயல்பட வேண்டுமென்பதற்காக  வடிவமைப்பாளர் யிவிஸ் பெகரின் உதவியை பெற்றது சீஸ்மிக்.

ஒரு ஆடை என்றால் அணிவதற்கு விருப்பமாக இருக்கவேண்டும் என்பதே எங்கள் இலக்கு என்கிறார் பெஹர். அணிய வசதியாக இருப்பதுடன் அழகான தோற்றமும் உள்ளதாக இருக்க வேண்டும் என்கிறார் பெஹர்.

மின்சாரத்தால் இயங்கக்கூடிய இந்த ஆடையை இந்தாண்டு இறுதியில் ஜப்பான், அமெரிக்கா, பிரிட்டனில் சந்தைப்படுத்த திட்டமிட்டுள்ளது சீஸ்மிக். ‘எதிர்காலம் இங்கே ஆரம்பம்‘ என்ற பெயரிலான ஒரு கண்காட்சி லண்டனின் விக்டோரியாவிலும் ஆல்பர்ட் மியூசியத் திலும் நடைபெற்றது. இதில் இடம்பெற்றிருந்த நூற்றுக்கும் மேற்பட்ட பொருட்களில் இந்த மின்சார ஆடையும் ஒன்று.

வயதாக வயதாக தசைகளின் வலிமை குறைவது நம் அனைவரையும் பாதிக்கிறது. 60 வயதை எட்டினாலே வயது தொடர்பான தசைகளின் உந்துசக்தி இல்லாமல் போய்விடுகிறது. உதாரணமாக ஆண்டுக்கு 0.5 சதவிகித என்ற அளவில் குறையும் இத்திறன் 70 வயதில் 2 சதவிகித என்ற அளவை எட்டுகிறது என்றால் 80 வயதில் 4 சதவிகிதத்தை எட்டுகிறது.

தொழில்நுட்ப அணி சாதனங்களுக்கான   சந்தை முதியவர்களுக்குமட்டுமானது என்பதை தாண்டி பரவ லானதாக உள்ளது. பக்கவாதத்தால் பாதிக்கப்பட்டவர்கள்,  மஸ்குலர் டிஸ்ட்ரபி என்ற தசைநார் தேய்வு போன்றவற்றால் பாதிக்கப்பட்டவர்களுக்கும் மின்சார ஆடைகள் உரு வாக்கும் முயற்சிகள் நடந்துவருகின்றன. பணியிட பாதுகாப்பு, தொழிற்சாலை பயன்பாடுகளுக்கு ஏற்ற வகையில் உதாரணமாக கட்டுமான தொழிலாளர்கள், கிடங்குகளில் பணி புரிபவர்கள் தேவைக்கேற்பவும் அணி சாதனங்கள் உருவாக்கவும் முயற்சி நடந்து வருகிறது.

ஒரு வடிவமைப்பாளர் என்ற முறையில் இந்த தொழில் நுட்பங்கள் மனிதனுக்கு மேம்பட்ட வாழ்க்கையை தர வேண்டும் என்பதுதான் இலக்கு என்கிறார் பெகர்.

அணி சாதன தொழில் நுட்பங்கள் தற்போது கைக்குழந்தை பருவத்தில் இருப்பதாக நம்புகிறார் பெகர். பத்தாண்டுகளுக்கு முன் கைக்கட்டை விரலில் அணியக் கூடிய மின்கலன் அற்ற அணி சாதனங்கள் இருந்தன என்னும் பெகர், இப்போது யு.வி. தொழில் நுட்பங்கள் வந்துவிட்டதாக கூறுகிறார்.

அடுத்த பத்தாண்டுகளில் தொழில்நுட்பங்கள் கண்ணுக்கு தெரியாமல் செயல்படும் வகையில் மாறிவிடும் என்கிறார் பெஹர்.

வியாழனை சுற்றும் 10 புதிய நிலவுகள்!

புளூட்டோ கோளுக்கு அப்பால் ஒன்பதாவது கோள் இருக்கிறதா? இந்த நோக்கத்துடன் ஆய்வில் ஈடுபட்டிருந்த, சர்வதேச விண்வெளி யூனியனைச் சேர்ந்த விஞ்ஞானி களுக்கு ஆச்சரியங்கள் காத்திருந்தன.

வியாழன் கோளை, 10 புதிய நிலவுகள் வலம் வருவதை பாரீசிலுள்ள விஞ்ஞானிகள் கண்டுபிடித்துள்ளனர்.

ஏற்கெனவே வியாழன் கோளை, 69 துணைக் கோள்கள் வலம் வருகின்றன. அண்மையின் கண்டுபிடிப்பையும் சேர்த்து இப்போது, 79 துணைக் கோள்கள் இருப்பது உறுதி யாகியுள்ளது.

இந்த புதிய துணைக் கோள்களில் ஒன்றான, ‘வேலே டுடா’ என்ற கோள், வியாழன் சுற்றும் திசைக்கு எதிர் திசையில் சுற்றி வருவது வினோதமாக இருப்பதாக, விஞ்ஞானிகள் கண்டறிந்துள்ளனர். இதனால், இந்த துணைக் கோள் பிற துணைக்கோள்களுடன் மோதல் ஏற்பட வாய்ப்பு இருப்ப தாகவும் விஞ்ஞானிகள் கணித்துள்ளனர்.

 

 

27.09.1931- குடிஅரசிலிருந்து...

இங்கு இந்த விழா துவக்கப்படுமுன்  நிகழ்ச்சிக் குறிப்பில் குறிப் பிட்டிருந்த பிரார்த்தனை என்னும்பேரால் ஒரு பொய்நடிப்பு நடிக்கப் பட்டதானது உங்களுக்குத் தெரியும், பிரார்த்தனை என்று தலைவர் சொன்னவுடன் சில பிள்ளைகள் வந்தார்கள். கைகட்டினார்கள் கண்களை மூடிக் கொண்டார்கள். ஜனகணமன ................. என்று எதை யோ சொன்னார்கள். அதுபோலவே சில பெண்கள் வந்தார்கள். கைகட்டினார்கள். கண்மூடினார்கள். ஏதோ பாஷையில் எதையோ சொன்னார்கள். இதற்குப் பெயர் பிரார்த்தனையாம். இது பக்திக்காக செய்யப்படுவதாம், மேலும் இது கடவுளுக்கு ஆகவாம். நண்பர்களே! இதில் ஏதாவது அறிவோ நாணயமோ இருக் கின்றதா? என்பதை நிதானமாய், பொறுமையாய் யோசித்துப் பாருங்கள். தயவு செய்து ஆத்திரப்படாதீர்கள்.

கடவுள் என்பதும் பக்தி என்பதும் பிரார்த்தனை என்பதும் எவ்வளவு முக்கிய மானதாகவும், உண்மையானதாகவும் இருக்க வேண்டுமென்று சொல்லிவருகின்றீர்களோ அந்தக்குணம் எல்லாம் மேல்குறிப்பிட்ட இந்த பிரார்த்தனையில் இருந்ததா? பாருங்கள். சாதாரணமாக கிராமபோனுக்கு உள்ள அறிவு போன்ற சிறுவர்கள் அவர்களுக்கும், அவர்களுக்கு இந்த பிரார்த்தனைப் பாட்டு  சொல்லிக் கொடுத்தவர்களுக்கும் புரியாத ஒரு பாட்டை, இந்த சபையிலுள்ள சுமார் ஒரு ஆயிரம் பேருக்கும் புரியாத பாஷையில் நாடகத்தில் நடிப்பதுபோல் வந்து சொல்லிவிட்டு போவது என்றால் இதற்குச் சமமாக எதை சொல்லுவது? அநேகமாக நமது பிரார்த்தனைகள் என்பதெல்லாம் புரியாத பாஷை, புரியாத சொற்கள், புரியாத கருத்துகள் கொண்ட பாடல் களாகவும் வாக்கியங்களாவும் இருக்கின்றனவே தவிர, பக்தி என்பதற்கு பொருத்தமானதாய் இருக்கின்றதா? பாருங்கள். எந்தப் பக்தி பாட்டும் சங்கீத பிரதானியத்திலும், இலக்கண இலக்கிய பிர தானியத்திலும், வேஷப்பிரதானியத்திலும், சடங்குப்பிரதானியத்திலும், இருக்கிறதே தவிர, உண்மை பிரதானியத்தில் சிறிதாவது இருக்கின்றதா? பாருங்கள். இந்த மாதிரி வேஷமுறையில் இவ்வளவு சிறு குழந்தைப் பருவத்தில் இருந்தே புகுத்தப்பட்ட இந்தப் பக்திக்கு ஏதாவது ஒருதுரும்பளவு யோக்கியதையாவது இவர்களது பிற்கால வாழ்வில் உண்டாகிறதா என்று யோசித்துப் பாருங்கள். மற்றும் இதிலிருந்து அக்குழந்தைகளுக்கு ஒரு பித்தலாட்டத் தையும் நாணயக் குறைவையும் பக்தி என்னும் பேரால் புகட்டினவர்களானோமா? இல்லையா? என்று யோசித்துப் பாருங்கள்.

நமக்கு அறிவில்லை என்று எவரும் சொல்லிவிட முடியாது. தீட்சண்ய புத்தியும், கூர்மையான அறிவுமுடையவர்கள் என்பது நம் பழங் கலைகளையும் அவற்றின் திறனையுங் கண்டாலே தெரியும். ஆனால், நம் மக்களின் அறிவு மேலும் மேலும் பண்பட்டு வளரமுடியாமல், கடவுள், மதம், சாஸ்திரம் என்பவைகளின் பேரால் அடக்கப்பட்டு விட்டது; சிந்திக்கும் உரிமையே அற்ற சிறிய மனிதர் களாக நம்மைச் செய்துவிட்டது. இந்தப்படியான சிந்திக்கும் தன்மை யற்ற மக்களை மாற்றி அவர்களைச் சிந்திக்கத் தூண்டிச் சிந்தனைப் பாதையில் அழைத்துச் செல்வதுதான் திராவிடர் கழகம்.

சர்வம் பார்ப்பன மயம், திருவாங்கூர்

22.11.1931 , குடி அரசிலிருந்து...

புதிய மகாராஜா பட்டத்திற்கு வந்தவுடன் திருவாங்கூர் சமஸ்தானக் குடிமக்களுக்கு இனியேனும் உண்மையான சுதந்திரம் உண்டாகும் என்று நம்பினோம். இதற்கு அறிகுறியாக கப்பற் பிரயாணம் செய்து அந்நியநாடு சென்று வந்தவர்கள் உள்ளே போகக்கூடாது என்று தடுக்கப்பட்டிருந்த கோயில்களுக்குள் அவர்களும், போகலாம், என்று முன்னி ருந்த தடை நீக்கப்பட்டது.

இதைக்கொண்டு, இனி திருவாங்கூர் மக்கள் வைதிகக் கொடுமையிலிருந்தும் நீக்கப்படுவார்கள்போலும் என்றும் சந்தோஷப்பட்டோம். ஆனால், இப்பொழுது சர்.சி.பி. ராமசாமி அய்யர் அவர்களை மேன்மை தங்கிய மகரா ஜாவுக்கு அரசியல் ஆலோசனை கூறும் உத்தியோகதராக நியமிக்கப்பட்ட திலிருந்து கப்பலேறி அந்நியநாடுகளுக்குச் சென்று வந்த சர்.சி.பி.ரா. அய்யர் அவர்கள் கோயிலுக்குள் போவதற்கு தடை இருக்கக் கூடாது என்பதற்காகவே முன் இருந்த தடை நீக்கப்பட்டது என்றே நினைக்க வேண்டிய திருக்கிறது.  அன்றியும் இப்பொழுது இருக்கும் மகாராஜா அவர்கள் ஒரு சமயம் சர். சி.பி.ரா. அய்யர் அவர்களுடன் இங்கிலாந்து முதலிய தேசங்களுக்குப் பிரயாணம் செய்து வந்தால், அப்பொழுது மகாராஜா கோயிலுக்குள் போவ தற்கு யாதொரு தடையுமில்லாமலிருப்பதற்கு முன்னேற் பாடாக இக்காரியம் செய்யப்பட்டிருக்க வேண்டுமென்றும் நினைக்கவேண்டியிருக்கிறது.

அன்றியும் இப்பொழுது பட்டத்திற்கு வந்திருக்கும் மகாராஜா அவர்கள் காலத்தில் முன்னிருந்ததைக் காட்டிலும் இன்னும் பார்ப்பன ஆதிக்கம் அதிகப்பட்டு உறுதிப்படும் என்றும் கருதி திருவாங்கூர் பிரஜைகளின் சார்பாக இரக்கப்படுகிறோம், இவ்வாறு நடக்கக்கூடும் என்பதற்கு அடையாளமாக மகாராஜா பட்டத்திற்கு வந்தவுடன், முன்பே திரு. சுப்பிரமணிய அய்யர் என்னும் பார்ப்பனர் திவானாயிருக்க, சர்.சி.பி.ராமசாமி அய்யரும் அரசியல் ஆலோசனை கூறும் அதிகாரியானார். ஆகவே, இப்பொழுது திருவாங்கூர் ராஜ்யம் இரண்டு பார்ப்பன அதிகாரிகளின் வசம் அகப்பட்டுக் கொண்டிருக்கிறது.

திருவாங்கூர் சமஸ்தானம் பார்ப்பனர்களின் அதி காரத்தில் அகப்பட்டு, அச்சமஸ்தான மக்கள் பார்ப் பனியத்தால் நசுக்குண்டு கிடப்பது இன்று அல்லது நேற்று முதல் நடைபெறும் விஷயம் அல்ல; நூற்றுக்கணக்கான வருஷங் களாகவே இப்படி இருந்து வருகின்றது. இதைக் கீழ்வரும் விஷயத்தால் தெளிவாய்த் தெரிந்து கொள்ளலாம். 1817 ஆம் ஆண்டு முதல் 1931ஆம் ஆண்டுவரையிலும் திருவாங்கூர் திவான் உத்தியோகத்தை 24 பேர் வகித்து வந்திருக்கின்றனர். இந்த 24 பேர்களில் திரு. நாணுப்பிள்ளை என்பவர் 1877 முதல் 1880 வரையில் 3 வருஷமும், இப்பொழுது சென்னை அரசாங்கத்தில் சட்ட மந்திரியாய் இருக்கும் திரு.கிருஷ்ணன் நாயர். 1914 முதல் 1920 வரை 6 வருஷமும், திரு வாட் என்னும் அய்ரோப்பியர் 1925 முதல் 1929 வரை 4 வருஷமும் திவானாக இருந்திருக்கின்றனர். இவர்கள் திவானாக இருந்த 13  வருஷங்கள் போகபாக்கி 101 வருஷங் களும் பார்ப்பனர்களே திவான்களாக இருந்து வந்திருக் கின்றனர். இந்தக் கணக்கைப் பார்த்தாலே திருவாங்கூர் ராஜ்யம் எப்பொழுதும் பார்ப்பனமயம் என்பதில் ஏதேனும் தவறு உண்டா?

சுதேச சமஸ்தானமாகவும், பார்ப்பன ஆதிக்க ராஜ்ய மாகவும், பத்மநாபசுவாமி என்னும் கடவுளின் ராஜ்ய மாகவும் இருக்கும் அந்தச் சமஸ்தானம் எந்த நிலையிலிருக் கிறது? 40 லட்சம் ஜனத்தொகையுள்ள அந்த சமஸ்தானத்தில் சுமார் 20 லட்சம் பேர் முகமதியர், கிறிஸ்தவர் முதலிய அந்நியமதத்தினராகவும், சுமார் 12.5  லட்சம் மக்கள் தீண்டக் கூடாதவர்களாயும், பார்க்கக் கூடாதவர்களாகவும், தெருவில் நடக்கக் கூடாதவர் களாகவும் இருக்கின்றார்கள் இவை போக சுமார் 7.5 லட்சம்  இந்துக்கள் என்பவர்களே பத்மநாபக் கடவுளின் அரசாங்கமாகிய இந்து ராஜ்யத்தில் இருக்கிறார் களென்றால் இதை என்ன ராஜ்யம் என்று சொல்லுவது? பார்ப்பனர்களின் அதிகாரத்தின் காரணமாக - பார்ப்பனீயமாகிய இந்து மதக் கொடுமை காரணமாக. இந்துமதத்திலிருந்து விலகியவர்கள் தான் இப்பொழுது அச்சமஸ்தானத்தில் இருக்கும் 20 லட்சம் வேறு மதக்காரர்களும் என்பதை யார் இல்லை யென்று சொல்ல முடியும்? இந்து மதத்தைச் சேர்ந்தவர்கள் என்ற காரணத் தால் தானே இன்று 12.5 லட்சம் பேர் தீண்டத் தகாதவர் களாகவும், பார்க்கக் கூடாதவர்களாகவும், தெருவில் நடக்கக் கூடாதவர்களாகவும், மிருகத்திலும் கேடாக மதிக்கப்பெற்று கொடுமை செய்யப்பட்டுக் கிடக்கிறார்கள்? இவர்களும் அந்நிய மதத்தினர்களாக ஆகி விட்டால் இவ்வளவு கொடுமைக்கு ஆளா வார்களா?

இந்த இழிவான நிலையில் உள்ள இச்சமஸ்தானம், எல்லா மக்களும் கண் விழித்துச் சுயமரியாதை உணர்ச்சி பெற்று வருகிற இந்நாளிலுமா பார்ப்பனர் வசமும் பார்ப்பனிய வசமும் சிக்கித் துன்பப்பட்டுக்கொண்டிருக்க வேண்டும்? என்ற உணர்ச்சியுடன் திருவாங்கூர்ப் பிரஜைகள் அனை வரும், சர். சி.பி.ரா. அய்யரின் நியமனத்தைச் சரியான காரணங்களுடன் கண்டித்துத் தீர்மானங்கள் செய்வதை நாம்  பாராட்டுகிறோம்.

இதோடு மற்றொரு வதந்தியும் உலாவுகிறதென்று அறிகிறோம். அதாவது, இப்பொழுதுள்ள திவான், திரு.சுப்பிர மணிய அய்யர் திவான் பதவியை விட்டு விலகியவுடன், அப்பதவிக்கு, சென்னையில் உள்ள திரு.டி.ஆர்.வெங்கட்ட ராம சாஸ்திரி அவர்களும், மற்றும், இரண்டு பெரிய இந்திய அரசாங்க உத்தியோகஸ்தர்களும் முயற்சி செய்கிறார்களாம்.  இவ்வாறு முயற்சி செய்து கொண்டிருக்கும், திரு.டி.ஆர்.வெங்கட்டராம சாஸ்திரியார் அவர்களோ, அல்லது வேறு ஒரு சாஸ்திரியார் அல்லது  அய்யர் அல்லது அய்யங்கார் அல்லது  ஆச்சாரியாரோ திவானாக வந்தால் திருவாங்கூர் ராஜ்யம் இன்னும் மோசமான பார்ப்பன ராஜ்யமாக ஆகவேண்டி யதைத் தவிர வேறு வழியில்லை என்பது உறுதியான விஷயமாகும்.

உதாரணமாக சர்.சி.பி.ராஅய்யர் அவர்களின் யோக்கி யதையைச் பார்த்தாலே இது விளங்கும். முதலாவது, திரு. அய்யர், தன் அதிகாரத்தால் செய்யக்கூடிய எந்த உத்தியோகங்களையும், நன்மைகளையும், தன் இனத்தார் களாகிய பார்ப்பனர்களுக்கு மாத்திரம் செய்யக்கூடியவர் என்பது நாம் அறிந்த சங்கதி, இரண்டாவது, எல்லாமக்களும் சம சுதந்திரம் பெற்றுச் சகோதரர்களாய் வாழ வேண்டும் என்னும் சமதர்மக் கொள்கைக்கு எதிரான வருணாசிரம தரும வகுப்பினரைச் சேர்ந்தவர் என்பது யாவருக்கும் தெரிந்த செய்தி மூன்றாவது, அவர் எப்பொழுதும் பிரிட்டிஷ்காராருக்குச் செல்லப்பிள்ளையாக நடந்து தன் காரியங்களைச் சாதித்துக் கொள்ளக்கூடியவர், என்பது அவருடைய அரசியல் நாடகம் அறிந்தவர்களுக்கு நன்றாய்த் தெரியும். இதனால் பிரிட்டிஷ் இந்தியாவில் இருந்து சுதேச சமதானத்திற்குப் போகும் எந்த பார்ப்பனரும், பெரும்பாலும், இதே மாதிரியான யோக்கியதை உள்ளவராகத்தான் இருப்பார்கள். ஆகையால் திவாங்கூர் பிரஜைகள் தம்மைக் காப்பாற்றிக் கொள்ளும் பொருட்டு இத்தகைய விஷயங்களை, இந்திய அரசாங்கத்தாருக்கும், மேன்மை தாங்கிய மகாரா ஜாவுக்கும் எடுத்துக்காட்டிப் பரிகாரம் தேடிக்கொள்ளும்படி அவர்களுக்கு நினைப்பூட்டி, நாமும் இந்தச் சமஸ்தானம் பார்ப் பனருக்கும், பார்ப்பனியத்திற்கும் அடிமைப்பட்டு வருவதைப் பலமாகக் கண்டிக்கிறோம்.

 

 

 

மாற்று உறுப்புக்காக காத்திருப் போரின் பட்டியல் நீண்டு வருகிறது. இந்த நிலையில், பாதிக்கப்பட்டோரின் உடலிலிருந்தே திசுக்களை எடுத்து, வளர்த்து புதிய உறுப்பை பொருத்த, ஆய்வுகள் நடக்கின்றன.

இதற்கு ‘3டி பயோ பிரின்டர்’ எனப்படும் உயிரி முப்பரிமாண அச்சு இயந்திரம் பயன்படும்.

ஆனால், கல்லீரல், சிறுநீரகம் போன்ற உறுப்புகள், ஆய்வகத்தில் வளர்த்தெடுத்து, மருத்துவமனைக்கு வரும் வரை ‘உயிருடன்’ இருக்க வேண்டுமல்லவா? அதற்கு, அந்த உறுப்புக்களுக்கு ஆக்சிஜன் மற்றும் உயிர்ச் சத்துக்களை, ரத்தத்தின் வழியே தருவதற்கு ரத்த நாளங்கள் தேவை.

‘பெரிலிஸ் பயோலாஜிக்ஸ்’ என்ற நிறுவனம், நுண் ரத்தக் குழாய் களுடன் கூடிய உறுப்பை, உயிரி முப்பரிமாண அச்சில் உருவாக்க முயல்கிறது.

லேசர் மூலம், ஹைட்ரோஜெல் என்ற பொருளை, ரத்த நாளங்களுக்கு சாரம் போல அச்சிட முடியும் என்றும், ஒரு முழு சிறுநீரகத்தை, ரத்தநாளங்களுடன், 12 மணி நேரத்திற்குள் அச்சிட்டு எடுக்கும் தொழில் நுட்பத்தை பரிசோதித்து வருவதாக பெரிலிஸ் பயோலாஜிக்ஸ் அறிவித்துள்ளது.

ரோல்ஸ் ராய்சின் பறக்கும் கார்!

ஜெட் விமானங்களை தயா ரித்து வரும் ‘ரோல்ஸ் ராய்ஸ்’, விரைவில் அய்ந்து பேர் பயணிக்கும் வகையில், பறக்கும் காரை தயாரிக்கப் போவதாக அறிவித்துள்ளது. இந்தக் காருக்கு ஓடுபாதை தேவையில்லை என்றும், நிற்குமிடத்திலிருந்து செங்குத்தாக கிளம்பி, வானில் பறக்கும் வகையில் இந்த கார் இருக்கும் என்றும், ரோல்ஸ் ராய்ஸ் அண்மையில் அறிவித்தது.

முழுக்க முழுக்க மின் சக்தியால் பறக்கும், அதிக சத்தமில்லாத இந்த காரின் இறக்கைகள், வால் பகுதிகள் உட்பட அய்ந்து மின் விசிறிகளை கொண்டிருக்கும். மின்சாரத்தால் பறந்தாலும், இந்த காருக்கு வேண்டிய மின்சாரத்தை, உற்பத்தி செய்து தரப்போவது, வாகனத்தில் பொருத்தப்பட்டுள்ள எரிவாயு டர்பைன்கள் தான். எனவே, துவக்கத்தில் இந்த கார் மின்சாரம் மற்றும் எரிவாயுவால் இயங்கும், ‘அய்பிரிட்’ வாகனமாகவே இருக்கும். ஒரு முறை எரிபொருள் நிரப்பினால், 800 கி.மீ., தூரம் செல்லும். ரோல்ஸ் ராய்ஸ் பறக்கும் காரின் அதிகபட்ச வேகம் மணிக்கு, 330 கி.மீட்டர்.

ரயில் விபத்தைத் தடுக்கும் ரோபோட்!

பணக்கார நாடுகளோடு போட்டிபோடவே தொழில் நுட்ப வளர்ச்சியில் கவனம் செலுத்துகிறது இந்தியா. தவிர, சாதாரணர்களின் வாழ்க்கையை உயர்த்தும் தொழில் நுட்பங்களை வடிவமைப்பதில் முனைப்பு காட்டுவதில்லை என்ற விமர்சனம் தொடர்ந்து முன்வைக்கப் பட்டுவருகிறது. இதற்குப் பதில் சொல்லும் விதமாக, மலக்குழிக்குள் இறங்கிச் சுத்தம் செய்யும்போது விஷவாயு தாக்கித் தொழிலாளர்கள் உயிரிழப்பதைத் தடுக்கும் வகையில் பாதாளச் சாக்கடையைச் சுத்தம் செய்யும் ரோபோட்டை கேரளத்து இளைஞர்கள் சில மாதங்களுக்கு முன்னால் வடிவமைத்திருந்தார்கள்.

அதை அங்கீகரித்து அந்த ரோபோட்டைப் பயன் படுத்த கேரள அரசும் முடிவெடுத்தது அனைவரின் பாராட்டையும் பெற்றது. இத்தகைய உணர்வு தமிழகத்தைச் சேர்ந்த மாணவர்களிடமும் இருக்கிறது என்பதைத் தற்போது வேறொரு ரோபோட் கண்டுபிடிப்பின் மூலமாக நிரூபித்திருக்கிறார்கள் சென்னை அய்.அய்.டி. மாணவர்கள்.

மாணவர்கள் அல்ல, கண்டுபிடிப்பாளர்கள்!

நாங்கள் மாணவர்கள் அல்ல, கண்டுபிடிப்பாளர்கள், பிரச்சினைக்குத் தீர்வு காண்பவர்கள். அந்த உணர்வுதான் எங்களை ஆர்டிமிஸ் ரோபோட்டைக் கண்டுபிடிக்க உந்தித் தள்ளியது என்றார்கள் சென்னை அய்.அய்.டி.யின் சென்டர் ஃபார் இன்னொவேசன் மய்யத்தைச் சேர்ந்த அக்சய், கிருஷ்ணா, கவன் சவ்லா, அனுபவ் அகர்வால், சாஸ்வத் சாஹூ, யாஷ் படேல் ஆகிய மாணவர்கள். இவர்கள் கண்டுபிடித்திருப்பது ரயில் தண்டவாளத்தில் ஏற்படும் விரிசலைக் கண்டறிந்து தகவல் தெரிவிப்பதன் மூலம் ரயில் விபத்துகளைத் தடுத்து நிறுத்த உதவும் ஆர்டிமிஸ் ரோபோட்.

கட்டுமானப் பணி எவ்வளவு முக்கியமோ அவ்வளவு முக்கியமானது பராமரிப்புப் பணியும். அதிலும் ரயில் தண்டவாளங்கள் மிகவும் கவனமாகப் பராமரிக்கப்பட வேண்டியவை. தண்டவாளத்தில் சிறு விரிசலோ ரயில்பாதையில் சிறிதளவு விலகலோ ஏற்பட்டால்கூட மோசமான விபத்துகள் நேர்ந்துவிடும்.

ரயில் தடம்புரண்டதால் ரயிலில் பயணித்தவர்கள் விபத்துக்குள்ளான செய்திகளை அடிக்கடி கேள்விப்படு கிறோம். அதே நேரம், மறுபுறம் மறைந்துகிடக்கிறது மற்றொரு செய்தி. அது, இந்தியாவில் மட்டும் ஆண்டு தோறும் 400-க்கும் மேற்பட்ட ரயில்பாதைப் பராமரிப்புப் பணியாளர்கள் பணியை மேற்கொள்ளும்போது ரயில் விபத்துகளால் உயிரிழக் கிறார்கள் என்பது.

தண்டவாளங்களைச் சோதனையிட்டுப் பராமரிக் கும் பணியை ரயில்பாதைப் பரா மரிப்புப் பணியாளர்கள் தாம் இத்தனை காலமாகச் செய்து வருகிறார்கள்.

அபாயகரமான இந்தப் பணியை மேற்கொள்ளும் டிராக்மென், டிராக்

மெயிண்டனர்ஸ், ரயில் பொறியாளர்கள் உள்ளிட்ட ரயில் பணியாளர்களில் பலர் ஆண்டுதோறும் விபத்து களை எதிர்கொள்கிறார்கள்; சில நேரம் உயிரிழந்துவிடுகிறார்கள்.

இந்நிலையில் ரயில் பயணிகள், ரயில் பணியாளர்கள் ஆகிய இரு தரப்பினரையும் மனத்தில் கொண்டு சென்னை அய்.அய்.டி. மாணவர்களால் வடிவமைக்கப் பட்டிருக்கிறது ஆர்டிமிஸ் ரோபோட்..

இந்தியாவின் உயர் கல்வி நிறுவனத்தில் படித்தோம் உச்சபட்ச சம்பளம் பெறும் வேலையில் சேர்ந்தோம், சொகுசாக வாழ்ந்தோம் என்பதல்ல எங்களுடைய இலக்கு. சாதாரணமானவர்களுக்குப் பயனுள்ளவற்றைக் கண்டு பிடிப்பதில் கவனம் செலுத்துகிறோம். நடைமுறை சார்ந்த பிரச் சினைகள் எங்களைக் கலங்கடிக்கின்றன. அதிலும் பெரு வாரியான மக்களால் பயன்படுத்தப்படும் போக்கு வரத்துச் சாதனங்களில் ஒன்று ரயில். அதில் ஏற்படும் விபத்தால் உயிரிழப்பவர்கள் அனேகர். இதற்குக் குறைந்த செலவில் தீர்வு கண்டிருக்கிறோம் என்றார் ஒடிசாவில் இருந்து சென்னைக்கு வந்து மூன்றாமாண்டு பையலா ஜிக்கல் இன்ஜினீயரிங்க் படித்துக் கொண்டிருக்கும் சாஸ்வத் சாஹூ.

ஆர்டிமிஸ் எப்படிச் செயல்படும்?

தற்போதுவரை   கருவியைக் கொண்டுதான் ரயில் ஊழியர்கள் தண்டவாள விரிசலைக் கண்டுபிடிக்கிறார்கள். அந்தக் கருவியைக் கையில் பிடித்துக்கொண்டு அவர்கள் தொலைதூரம் நடக்க வேண்டி இருக்கும். அடிக்கடி ரயில்கள் கடந்து செல்லும் தண்டவாளங்களில் அதைப் பயன்படுத்தும் போதுதான் அவர்கள் விபத்தில் சிக்கிக்கொள்கிறார்கள். நாங்கள் வடிவமைத்திருப்பது 1.5 அடி நீளத்தில் ஆறு சக்கரங்கள் கொண்ட குட்டி ரோபோட்.

ரயில் ஓடிக்கொண்டிருக்கும் போதே இது தண்ட வாளத்துக்கு இடையில் ஒரு நொடிக்கு ஒரு மீட்டர் என்ற வேகத்தில் ஓடியபடியே ,  சென்சார்கள் மூலமாகத் தகவல் சேகரிக்கும். அந்தத் தகவலை ரோபோட்டில் பொருத்தப் பட்டிருக்கும் மைக்ரோ சிப்புக்கு அனுப்பி விடும். இதில் ஜி.பி.எஸ். வசதி இணைக்கப்பட்டுள்ள தால் எங்கிருந்து வேண்டு மானாலும் இதை இயக்க லாம். கூடவே சென்று நேரடி யாக இயக்க வேண்டிய தில்லை என்றார் மூன்றா மாண்டு சிவில் இன்ஜினீயரிங் மாணவரான யாஷ் படேல்.

ரயில் விபத்தைத் தடுக்கவும் உயிர்களைக் காப்பாற்ற வும் கைகொடுக்கும் உங்களுடைய ரோபோட் பராமரிப்புப் பணியாளர்களின் வேலையைப் பறித்துவிடாதா? என்று கேட்டால், தானியங்கியாக ஆர்டிமிஸ் இருந்தாலும் இது பிரச்சினை எங்கு இருக்கிறது என்பதைக் கண்டுபிடிக்க மட்டுமே பயன்படும். இதன் மூலமாக நெடுந்தூரம் நடக்க வேண்டிய வேலைப் பளு குறையும்.

மற்றபடி சீர் செய்யும் பணிகளை ரயில்வே ஊழியர்கள் தாம் செய்ய வேண்டும் என்பதால் அவர்களுடைய வேலைக்கு வேட்டுவைக்காது. அதுமட்டுமல்லாமல் ரூ.20 ஆயிரத்திலேயே இதைத் தயாரிக்க முடியும் என்பதால் நிச்சயம் அரசாங்கத்தின் பட்ஜெட்டுக்கும் ஒத்துவரும் என்றார் இந்தக் கூட்டணியின் ஒரே சென்னை மாணவர் மெக்கானிக்கல் இன்ஜினீயரிங்கில் மூன்றாமாண்டு படிக்கும் அக்சய்.

சோதனை முயற்சிகளில் வெற்றிகரமாகச் செயல் பட்டதன் மூலமாகச் சமீபத்தில் நடைபெற்ற இண்டர்-அய்.அய்..டி. மீட் 2018இல் அனைவரின் கவனத்தை ஈர்த்தி ருக்கிறது ஆர்டிமிஸ் ரோபோட் - கூடிய விரைவில் இந்திய ரயில்வே துறையும் இவர்களுடைய கண்டுபிடிப்பை அங்கீகரித்துப் பயன்படுத்த முன்வரும் என்று எதிர் பார்க்கப்படுகிறது.

அதிநவீனத் தொழில்நுட்ப வளர்ச்சிகளை வெகுஜன மக்களின் பயன்பாட்டுக்குக் கொண்டுவந்து தமிழகத்துக்குப் பெருமை சேர்த்திருக்கிறார்கள் சென்னை அய்.அய்.டி மாணவர்கள்.

 

 

Banner
Banner