எழுத்துரு அளவு Larger Font Smaller Font



15.01.1933 - குடிஅரசிலிருந்து...
ஓ! மூடசிகாமணிகளே ! இரண்டு மூன்று மாதகாலமாய் ஒரு பார்ப்பனர் சென்னையில் இருந்துகொண்டு, தன்னை சங்கராச்சாரி என்றும், லோக குருவென்றும், சுவாமி களென்றும், அவதார புருஷ பரம்பரை என்றும் சொல்லிக் கொண்டும், பல பார்ப்பனர்களை ஏவிவிட்டு அந்தப்படியே சொல்லி பிரசாரம் செய்யச் செய்துகொண்டும், உங்க ளுடைய பணங்களைக் காணிக்கைப் பிச்சையென்னும் பேரால் தினம் 500, 1000, 2000, 3000, 5000, 10000 என்பதாகக் கொள்ளை அடித்துக் குதிரில் போட்டுப் பார்ப்பனர்களுக்கு, அதாவது நம்மைச் சூத்திரன் என்றும் நாலாவது வரு ணத்தான் என்றும், அடிமை என்றும், பல ஜாதிக்கலப்பால் பிறந்த மக்கள் என்றும், சண்டாளர்கள் என்றும், நம்மைத்தொட்டால் குளிக்கவேண்டுமென்றும் சொல்லும் அயோக்கிய ஆரியப் பார்ப்பனர்களுக்கே மூட்டை மூட்டையாய் பொங்கிப் பொங்கிப் போட்டுத் திரிகின்ற அக்கிரமங்களை யெல்லாம் சகித்துக்

கொண்டிருக் கின்றீர்களே! உங்களுக்கு மானமில்லையா! வெட்க மில்லையா!! சுயமரியாதை உணர்ச்சியில்லையா!!!
நமது நாட்டு அயோக்கியப் பணக்காரர்களும், கொள் ளைக்கார, கொடுமைக்கார, வன்நெஞ்சப் பணக்காரர்களும் எவ்வளவு இழிவாய் - பித்தலாட்டமாய் - மோசடியாய் பணம் சம்பாதித்து அந்தப் பணங்களை யெல்லாம் எந்த அறிவீனர்களிடம் - பாமர ஜனங்களிடம் - ஏழைகளிடம் இருந்து சம்பாதித்தார்களோ அவர்களுக்காகச் சிறிதும் பயன்படுத்தாமல், மேற்குறிப் பிட்ட அந்தச் சோம்பேறிக் கூட்டத்திற்குத் தலைமை வகிப்பவருக்கும் நம்மைச் சூத்திரர்கள், நாலாம் வருணத் தார்கள், சண்டாளர்கள் என்றழைக்கும் மிலேச்சப் பார்ப் பனர்களுக்குமே அழுகின்றார்களே; இதன் சூழ்ச்சியும், இதிலுள்ள புரட்டும் உங்களுக்கு விளங்குகின்றதா? நன்றாய் யோசித்துப் பாருங்கள். இந்தப் பணக்காரர்கள் எல்லாம் ஏழைகளின் குடும்பங்களைக் கெடுத்து  அவர்கள் வீடு வாசல்களைப் பிடுங்கிக்கொண்டு நடுத்தெருவில் பிள்ளை குட்டிகளுடன் அலையச்செய்து விட்டு - பட்டினியினால் மடியச் செய்து விட்டு சம்பாதித்த பணங்களை இந்தச் சோம்பேறிக் கூட்ட பார்ப்பனர்களுக்கு அழுவதென்றால் அதில் ஏதாவது இரகசியம் இருக்குமா இருக்காதா? என்பதை யோசித்துப் பாருங்கள். அது என்னவென்றால் அதுதான் உங்களை மறுபடியும் மறுபடியும், மேலும் மேலும் கொள்ளை யடிப்பதற்கு - வஞ்சிப்பதற்கு - உங்கள் குடும்பங்களைக் கெடுத்து வாழ்வதற்கு - உங்களைப் பட்டினி போட்டு பணம் சேர்ப்பதற்காக செய்யப்படும் சூழ்ச்சியாகும்.

எப்படியென்றால், சங்கராச்சாரிக்குப் பணத்தைக் கொடுத்து, பெண்டு பிள்ளைகளுடன் அவர் காலில் விழுந்து, அவர் கால் கழுவிவிட்ட தண்ணீரை வாங்கிக் குடித்து தலையில் தெளித்துக்கொண்டால், முன் சொன்னபடி அவன் எப்படிப்பட்ட கொள்ளைக் காரனா னாலும், கொலைகாரனானாலும் எத்தனை குடும்பங்களைக் கெடுத்துக் குட்டிச்சுவராக்கினவனானாலும், மகாப்பிரபு, தர்மவான், தர்மப்பிரபு என்று பார்ப்பனர்களாலும், அவர்கள் பத்திரிகைகளாலும், அழைக்கப்பட்டு விடு கிறான். இதனால் இந்தப் பணக்காரர்கள் செய்யும் புரட்டுகளும், அயோக்கியத் தனங்களும் எல்லாம் மறைந்து விடுகின்றன. சற்றும் மானம், வெட்கம் இல்லாமல் இவன்கள் மறுபடியும் பொதுஜனங்கள் முன்னிலையில் வந்து நிற்பதற்குத் தைரியமும் ஏற்பட்டு விடுகின்றது. நமது மூடமக்களும், அந்தப் பணக்காரன்களை மகாப்பிரபு என்றும், தர்மப்பிரபு என்றும், லட்சுமிபுத்திரன் என்றும் அழைக்க ஆரம்பித்து விடுகின்றார்கள். இந்த மாதிரி பித்தலாட்டத்திற்காக தான் மேற்கண்ட பணக்கார கொள்ளையன் சங்கராச்சாரிக்குப் பணத்தையும் கொடுத்து மற்ற காரியத்தையும் செய்கின்றார்கள்.

ஆகவே நம்மை சூத்திரன் என்றும், கீழ்ஜாதி என்றும், பல ஜாதி விந்து கலப்பு என்றும், விபசாரத்தில் பிறந்தவர்களென்றும், சண்டாளர் என்றும், ஒரு கூட்ட அயோக்கியர்கள் சொல்லுவதற்கு மற்றொரு கூட்ட அயோக்கியர்கள் ஆதாரமாய் இருந்து உதவி செய்கின் றார்களா இல்லையா என்பதை கூர்ந்து கவனித்துப் பாருங்கள் என்பதற்காகத்தான் இதை உங்களுக்கு தெரிவிக்க வந்தேன்.
நிற்க.

ஓ! சைவர்களே! சங்கராச்சாரி என்றால் யார்? சங்கராச்சாரி கதைப்படி பார்த்தால் அவர் ஒரு விதவை பெற்ற பிள்ளை என்று காணக்கிடக்கின்றதா இல்லையா? அவர் கடவுள் இல்லை (தானே கடவுள்) என்று சொல்லு கின்றவரல்லவா? சைவர்களுக்குப் பிறவி எதிரியல்லவா? தன்னைச் சந்நியாசி என்ற சொல்லிக்கொண்டு யானை, குதிரை, ஒட்டகம், பல்லக்கு முதலாகிய ராஜபோகத்தை அடைந்து கொண்டிருக்கிறார் அல்லவா? சகலத்தையும் சமமாய் பாவிக்கின்றவர் என்று சொல்லிக்கொண்டு கீழ், மேல் ஜாதியையும் பிராமணன், சூத்திரன், சண்டாளன் என்பதுபோன்ற உயர்வு தாழ்வு இழிவு பிரிவுகளையும் ஆதரித்துக் காப்பாற்றியும், அதற்காக ஆதாரங்களைப் பிரச்சாரம் செய்து அதை மக்களுக்குள் பரப்புகின்றவரும் அல்லவா? இவர் கொள்கைப்படி எந்தச் சைவனும் தாசிமகன் - அடிமை - சூத்திரன்தானே. இந்தப்படி சொல்லும் இவர் காலில் விழுவதற்கும் காணிக்கை கொடுப்பதற்கும் சாதம் சாப்பிடும் சைவனுக்கு அதாவது பகுத்தறிவுள்ள சைவனுக்கு எப்படித்தான் மனம் வந்தது? என்பது நமக்கு விளங்கவில்லை. உண்மையான சைவன் ஸ்மார்த்தப் பார்ப்பனரைக் கண்டால் அய்யோ அந்த தோஷம் தீர உடுத்தின வேஷ்டியுடன் ஸ்நானம் செய்யவேண்டுமென்று சொல்லிவிட்டு அந்தப்படியே ஆதாரங்கள் இருப்பதாய் பேசிவிட்டு பிறகு சங்கராச்சாரி காலில் பணத்தைக்கொட்டி விழுந்து கும்பிடுவதென்றால், சுயமரியாதைக்கும் நாணயத்துக்கும், பகுத்தறிவுக்கும் இந்த சைவர்களுக்கும் எவ்வளவு சம்பந்தம் இருக்கிறது என் பதை முட்டாள்தனத்தையும், சுயநலத்தையும், சூழ்ச்சி யையும் கொண்டு யோசிக்காமல் பகுத்தறிவையும், நேர்மையையும் கொண்டு யோசித்துப் பாருங்கள்.

ஓ! மார்வாடி சேட்டுமார்களே! பண வியாபாரத்தில் பணம் பெருக்கும் தொழிலாளிகளே! ஏழை மக்களிடம் - கூலிக்காரர்களிடம் - ஆப்பம் சுட்டு, எருமுட்டை தட்டிப் பிழைக்கும் பெண்களிடம், ரிக்ஷா வண்டி இழுப்பவர் களிடம் தினம் 1-க்கு ரூபாய் 1-க்கு ஒரு அணா வரைகூட வட்டி வாங்கி பணம் சேர்த்து அந்தப் பணங்களை இந்த மாதிரியான அக்கிரமமான காரியத்திற்காகவா செல வழிக்கவேண்டும் என்று கேட்கின்றேன். இது ஏழைகளைக் கொடுமைப்படுத்தும் காரியமல்லவா?
அரசியல் சட்டப்படி கொள்ளையடித்து மதக்கொள் கைப்படி மக்களை இழிவு படுத்தும் காரியமல்லவா நீங்கள் செய்யும் இந்த மோசமானதும் யோக்கியப் பொறுப் பற்றதுமான காரியம் என்பதை யோசித்துப்பாருங்கள்.

ஓ! பொதுஜனங்களே! இந்தப் போலி தேசியத்தை, மானங்கெட்ட தேசியத்தை, வயிற்றுப் பிழைப்பு தேசி யத்தை ஒழித்தால்தான், அழித்தால்தான் இந்திய மக்கள் மானத்துடன் சுயமரியாதையுடன் சமமான மனிதனாய் வாழமுடியும். சங்கராச்சாரி முதலிய கொள்ளையை விரட்டி அடிக்க முடியும் என்பதை உணருங்கள் ! உண ருங்கள் !! முக்காலும் உணருங்கள்!!!



.
 

இப்பிரிவில் அண்மைச் செய்திகள்:
இப்பிரிவில் முந்தையச் செய்திகள்:

தமிழில் கருத்துக்களை தெரிவிக்க -  


Security code
Refresh

Banner
Banner