சிறைகளில் செல்போன்களின் செயல்பாடுகளை செயல் இழக்க செய்யும் ஜாமர்கருவி?

எழுத்துரு அளவு

சனி, 30 ஜூன் 2012 09:38

1 Comments

கோவை, ஜூன் 30- தமிழக சிறைகளில் செல்போன்களின் செயல்பாடுகளை செயல் இழக்க செய்யும் ஜாமர்கருவி பொருத்துவது தொடர்பான திட்டம் பரிசீலிக்கப்பட்டது என்று தமிழக கூடுதல் காவல்துறை டி.ஜி.பி.டோக்ரா கூறினார்.

கோவை சிறைக்குள் பார்சல் வீசப்பட்டது மற்றும் செல்போன்கள் பறிமுதல் செய்யப்பட்ட சம்பவங்கள் சமீபத்தில் நடந்தேறியது. இதைத்தொடர்ந்து தமிழகக் காவல்துறை கூடுதல் டி.ஜி.பி.யும், சிறைத்துறை தலைவருமான எஸ்.கே.டோக்ரா கடந்த 2 நாள்களாக கோவை சிறையில் ஆய்வு மேற்கொண்டார்.

பின்னர் நேற்று காலையில் சிறை மைதானத்தில் நடைபெற்ற அணிவகுப்பு மரியாதையை ஏற்றுக்கொண்டார். அதை தொடர்ந்து செய்தியாளர்களுக்கு பேட்டி அளித்தார்.

அப்போது அவர் கூறியதாவது:-

இந்தியாவில் உள்ள அனைத்து சிறைகளுக்கும் சென்று அங்குள்ள சூழ்நிலை மற்றும் பாதுகாப்பு போன்ற அம்சங்களை ஆய்வு செய்துள்ளேன். பிற மாநில சிறைகளை ஒப்பிடும் போது தமிழகத்தில் உள்ள சிறைகள் கடந்த ஓராண்டு காலமாக மிகவும் அமைதியாகவும், எந்த அசம்பாவிதங்கள் நடைபெறாமலும் உள்ளன.

தமிழகத்தில் உள்ள 9 மத்திய சிறைகளிலும் 58 பொதுத்தொலைபேசிகள் அமைக்க எல்காட் நிறுவனத்திற்கு டெண்டர் விடப்பட்டுள்ளது. இதற்காக பணிகள் நடைபெற்று வருகின்றன.

பொதுத்தொலைப்பேசி அமைக்கப்பட்ட பின்னர் கைதிகளின் கைரேகை பதிவு செய்யப்பட்டு அவர்களுக்கு `ஸ்மார்ட் கார்டு' வழங்கப்படும். அதன் பின்னர் ஒரு கைதி ஒரு மாதத்திற்கு 30 நிமிடங்கள் வரை பேசிக் கொள்ளலாம். கைதிகள் யாருடன் பேச விரும்புகிறார்களோ அவர்களில் 3 பேர் பற்றிய விவரங்களை முன்கூட்டியே சிறைத்துறை நிருவாகத்திடம் வழங்க வேண்டும். இந்தத் திட்டம் அடுத்த மாதம் இறுதிக்குள் நடைமுறைக்கு வந்துவிடும்.

தமிழக சிறைகளில் செல்போன்களின் செயல்பாடுகளை செயல் இழக்க செய்யும் ஜாமர்கருவி பொருத்துவது தொடர்பான திட்டம் பரிசீலிக்கப்பட்டது. அதற்காக வேறு மாநில சிறைகளில் ஜாமர் கருவிகள் பொருத்தப்பட்டுள்ள விவரம் சேகரிக்கப்பட்டது. அப்போது ஜாமர் கருவியால் சிறையின் அனைத்துப் பகுதிகளிலும் செல்போன்களின் செயல்பாட்டை தடுத்து நிறுத்த முடியவில்லை என தெரியவந்தது. எனவே சிறைகளில் ஜாமர் கருவி பொருத்தும் திட்டம் செயல்படுத்தப்படவில்லை.

அதே போல் சி.சி.டி.வி. கேமரா பொருத்தியும் கைதிகளை கண்காணிப்பது முடியாத ஒன்று. அவர்களுக்கு என்று சில உரிமைகள் உள்ளன. அதில் தலையிட முடியாது. அவர்களை நல்வழிப்படுத்த முயற்சிகள் மேற்கொண்டால் அனைத்து பிரச்சினைகளும் தீர்ந்து விடும்.

கோவை சிறைக்குள் பார்சல் தூக்கி வீசப்பட்ட சம்பவம் குறித்து தொடர்ந்து விசாரணை நடைபெற்று வருகிறது. இந்த சம்பவத்திற்கு உடந்தையாக இருந்த வார்டர்கள் 3 பேரும் பணி இடைநீக்கம் செய்யப்பட்டு விட்டனர்.

சிறைக்குள் வீசப்பட்ட பார்சலை எடுத்துக் கொண்டு ஓடிய குண்டு வெடிப்பு கைதிகள் ஹக்கீம், அன்வர் மற்றும் இப்ராகிம் ஆகிய 3 கைதிகளும் சென்னை புழல் சிறைக்கு மாற்றப்பட்டு விட்டனர்.

கோவை சிறையில் தண்டனைக் கைதிகளும், விசாரணைக் கைதிகளும் ஒன்று சேராமல் இருக்க தேவையான கட்டமைப்பு மற்றும் நிருவாக மாற்றங்கள் செய்யப்படும். இந்த மாற்ற அமைப்பு ஜூலை இறுதிக்குள் நிறைவேற்றப்படும்

இவ்வாறு அவர் கூறினார்.

---

.