மருத்துவப் படிப்பிற்கான முதல்கட்ட கலந்தாய்வு 5 ஆம் தேதி தொடக்கம்

எழுத்துரு அளவு

செவ்வாய், 26 ஜூன் 2012 08:40

0 Comments

சென்னை, ஜூன் 26- மருத்துவ படிப்புக்கான முதல்கட்ட கலந்தாய்வு ஜூலை மாதம் 5 ஆம் தேதி தொடங்குகிறது.

தமிழ்நாட்டில் 17 அரசு மருத்துவக் கல்லூரிகள் உள்ளன. இதில் 1,696 எம்.பி.பி.எஸ். இடங்கள் பொது கலந்தாய்வு மூலமாக நிரப்பப்படும். சென்னையில் மட்டும் ஒரேயொரு அரசு பல் மருத்துவக் கல்லூரி இருக்கிறது.

இதில் 85 பி.டி.எஸ். இடங்கள் உள்ளன. 11 தனியார் மருத்துவக் கல்லூரிகளில் இருந்து அரசு ஒதுக்கீட்டிற்கு 838 எம்.பி.பி.எஸ். சீட்டுகளும், 18 பல் மருத்துவக் கல்லூரிகளில் இருந்து 898 பி.டி.எஸ். இடங்களும் கிடைக்கும். இந்த இடங்களும் கலந்தாய்வு மூலமாக நிரப்பப்படும்.

எம்.பி.பி.எஸ். பி.டி.எஸ். மருத்துவ படிப்புகளில் சேர 28,275 மாணவ-மாணவிகள் விண்ணப்பித்தனர். அவர்களில் 398 பேரின் விண்ணப்பங்கள் நிராகரிக்கப்பட்டன. 27,877 பேரின் விண்ணப்பங்கள் ஏற்றுக்கொள்ளப்பட்டன. அவர்கள் அனைவருக்கும் கடந்த 20 ஆம் தேதி ரேண்டம் நம்பர் ஒதுக்கப்பட்டது.

இந்த நிலையில், மருத்துவ, பல்மருத்துவ படிப்புக்கான ரேங்க் பட்டியல் சென்னை கீழ்ப்பாக்கத்தில் உள்ள மருத்துவ தேர்வுக்குழு அலுவலகத்தில் நேற்று மாலை 4.30 மணிக்கு வெளியிடப்பட்டது.

சுகாதாரத்துறை அமைச்சர் டாக்டர் வி.எஸ்.விஜய் ரேங்க் பட்டியலையும், 200-க்கு 200 கட் ஆப் மதிப்பெண் பெற்ற 10 மாணவ-மாணவிகளின் பட்டியலையும் வெளியிட்டார்.  ரேங்க் பட்டியலை வெளியிட்ட பிறகு அமைச்சர் டாக்டர் வி.எஸ்.விஜய் செய்தியாளர்களுக்கு பேட்டி அளித்தார். அப்போது அவர் கூறியதாவது:-

சென்னை கீழ்ப்பாக்கம் அரசு மருத்துவக் கல்லூரிக்கு இந்த ஆண்டு கூடுதலாக 50 எம்.பி.பி.எஸ். இடங்கள் கிடைத்துள்ளன. செங்கல்பட்டு மருத்துவக் கல்லூரிக்கு 50 சீட்டுகள் கிடைக்கும் வகையில் இந்திய மருத்துவக் கவுன்சிலிடம் இருந்து உத்தேச கடிதம் வந்துவிட்டது. அடுத்ததாக அனுமதி கடிதம் வர வேண்டும்.

இதேபோல், சிவகங்கை மருத்துவ கல்லூரியில் மருத்துவக் கவுன்சில் குழுவினர் 3 முறை ஆய்வு செய்துவிட்டு சென்றிருக்கிறார்கள். அந்த கல்லூரியில் 100 இடங்களுக்கு அனுமதியை எதிர்பார்த்து இருக்கிறோம். அடுத்த மாதம் (ஜூலை) 15 ஆம் தேதி வரை அவகாசம் உள்ளது.

தற்போது மருத்துவ படிப்புகளுக்கான ரேங்க் பட்டியல் வெளியிடப்பட்டு இருக்கிறது. முதல்கட்ட கலந்தாய்வு ஜூலை 5 ஆம் தேதி தொடங்கும். முதல்நாளில், உடல் ஊனமுற்றோர், முன்னாள் ராணுவத்தினரின் வாரிசுகள் உள்ளிட்ட சிறப்பு பிரிவினருக்கான கலந்தாய்வு நடக்கும். 6 ஆம் தேதி முதல் 10 நாளைக்கு பொது கலந்தாய்வு நடைபெறும்.

கலந்தாய்வு நாள் குறித்து சம்பந்தப்பட்ட மாணவ-மாணவிகளுக்கு அழைப்புக்கடிதம் அனுப்பப்படும். ஒருவேளை அழைப்புக்கடிதம் கிடைக்காவிட்டால் குறிப்பிட்ட கட் ஆப் மதிப்பெண் உள்ள மாணவர்கள் அதற்குரிய நாளில் கலந்தாய்விற்கு நேரடியாக வந்து கலந்து கொள்ளலாம்.

எனவே, கலந்தாய்விற்கு விடுபட்டு விடுவோமோ என்று எந்த மாணவ-மாணவியும் அச்சப்படத் தேவையில்லை. அரசு கல்லூரிகளில் 15 சதவீத இடங்கள் அகில இந்திய ஒதுக்கீட்டிற்குச் சென்றுவிடும்.

அந்த இடங்களில் ஏற்படும் காலி இடங்கள் மற்றும் தனியார் கல்லூரிகளில் உள்ள அரசு ஒதுக்கீட்டு இடங்கள் ஆகியவற்றை நிரப்புவதற்கான 2 ஆவது கட்ட கலந்தாய்வு தேதி பின்னர் தெரிவிக்கப்படும். முதல் ஆண்டு எம்.பி.பி.எஸ். மாணவர்களுக்கு வழக்கம்போல் ஆகஸ்டு மாதம் முதல் வாரத்தில் வகுப்புகள் தொடங்கும்.

தனியார் சுயநிதி மருத்துவ கல்லூரிகளில் மாணவர்களிடம் இருந்து அதிக கல்விக்கட்டணம் வசூலிப்பது குறித்து யாரும் புகார் கொடுக்க முன்வருவதில்லை. அவ்வாறு புகார் வந்தால் கண்டிப்பாக சம்பந்தப்பட்ட கல்லூரி நிர்வாகங்கள் மீது கடும் நடவடிக்கை எடுக்கப்படும்.

இவ்வாறு அமைச்சர் வி.எஸ்.விஜய் கூறினார்.

இந்த நிகழ்ச்சியில், சுகாதாரத்துறை முதன்மைச் செயலாளர் கிரிஜா வைத்தியநாதன், மருத்துவக் கல்வி இயக்குநர் டாக்டர் சி.வம்சதாரா, கூடுதல் இயக்குநரும், மருத்துவ தேர்வுக்குழு செயலாளருமான டாக்டர் ஆர்.ஜி.சுகுமார், துணை இயக்குநர் டாக்டர் ராஜேந்திரன் உள்ளிட்டோர் கலந்து கொண்டார்கள்.

நிகழ்ச்சி முடிவடைந்ததும் ரேங்க் பட்டியல் உடனடியாக அங்குள்ள தகவல் பலகையில் ஒட்டப்பட்டது. மருத்துவ படிப்புக்கு விண்ணப்பித்த மாணவ-மாணவிகளும், அவர்களின் பெற்றோரும் அங்கு வந்து ரேங்க் பட்டியலை பார்த்தார்கள். பட்டியல் வெளியிடப்பட்ட சற்று நேரத்தில் சுகாதாரத்துறையின் இணையதளத்திலும் அது வெளியிடப்பட்டது.

---

.