அண்ணா பல்கலைக்கழகம்: ஜூன் முதல் வாரத்தில் பொறியியல் கலந்தாய்வு

எழுத்துரு அளவு

சனி, 21 ஏப்ரல் 2012 09:17

0 Comments

திருச்சி,ஏப்.21- பொறியியல் கல்லூரிகளில் மாணவர் சேர்க்கைக்கான கலந்தாய்வு  ஜூன் முதல் வாரம் தொடங்கும் என்று மாணவர் சேர்க்கைக்கான செயலாளர் கூறினார்.

பிளஸ்-2 முடித்த மாணவர்கள் தங்களது எதிர்கால தேவைக்கு தகுந்தாற்போல் சேர்ந்து படிக்கவேண்டிய கல்லூரிகள், வேலைவாய்ப்புகள் தொடர்பான கலந்துரையாடல் கூட்டம் திருச்சி மண்டல இந்திய தொழில் கூட்டமைப்பின் சார்பில் திருச்சியில் நேற்று நடைபெற்றது.

இந்தக் கூட்டத்தை தொடங்கி வைத்து அண்ணா பல்கலைக்கழக பொறியியல் மாணவர் சேர்க்கைக்கான செயலாளர் ரைமண்ட் உத்தரிய ராஜ் பேசினார். அப்போது அவர் பேசியதாவது:-

பிளஸ்-2 முடித்த மாணவர்கள் அடுத்து என்ன படிக்கவேண்டும், எந்த கல்லூரியில் படிக்கவேண்டும் என்பதை இப்போதே முடிவு செய்து கொள்ளவேண்டும். அந்த முடிவானது பெற்றோரின் கருத்துக்கு ஏற்பவும் இருக்கவேண்டும்.

அதேநேரத்தில் பெற்றோரும் தங்களது பிள்ளைகளை முடிவு எடுக்க சுதந்திரமாக விடவேண்டும். தங்களது எண்ணங்களை அவர்கள் மீது திணிக்கக்கூடாது.

தமிழகத்தில் பொறியியல் கல்லூரிகளில் மாணவர் சேர்க்கைக்கான கவுன்சிலிங் விண்ணப்பங்கள் மே மாதம் முதல் வாரத்தில் வினியோகிக்க திட்டமிடப்பட்டு உள்ளது. ஜூன் மாதம் முதல் வாரத்தில் பொறியியல் மாணவர் சேர்க்கைக்கான கவுன்சிலிங் தொடங்கும்.

மாணவர்கள் கவுன்சிலிங்கில் கல்லூரிகளை தேர்வு செய்வதற்கு முன்பாக அந்த கல்லூரிகளின் தரம், ஆசிரியர்களின் திறமை பற்றி நன்றாக தெரிந்து வைத்துக்கொள்ளவேண்டும். பள்ளியில் மனப்பாடம் செய்து பாடங்களை படிப்பதுபோல் கல்லூரிகளில் படிக்க முடியாது. எனவே மாணவர்கள் புரிந்து கொள்ளும் திறனை வளர்த்துக்கொள்ளவேண்டும்.

புரியும் திறனை வளர்த்துக்கொள்ள முடியாத மாணவர்கள் தான் பருவத்தேர்வுகளில் தோல்வியை தழுவுகிறார்கள். தமிழகத்தில் தற்போது 525 பொறியியல் கல்லூரிகள் உள்ளன. இந்த ஆண்டு பல கல்லூரிகளில் ஏ.அய்.சி.டி.இ கூடுதல் இடங்களுக்கு அனுமதி வழங்கி உள்ளது. எனவே கலந்தாய்வு  மூலம் சுமார்ஒன்றரை லட்சம் மாணவர்களுக்கு இடம் கிடைக்க வாய்ப்புள்ளது.

இவ்வாறு அவர் பேசினார்.

---

.