கூட்டமாக நீதிமன்றத்திற்குள் வரவேண்டாம்: நீதிபதிகள் அறிவுரை

எழுத்துரு அளவு

வியாழன், 19 ஏப்ரல் 2012 09:27

0 Comments

சென்னை, ஏப்.19- வழக்கு விசாரணையின்போது மக்கள் நலப்பணியாளர்கள் கூட்டமாக நீதிமன்றத்திற்குள் வருவதை தவிர்க்க வேண்டும் என்று நீதிபதிகள் அறிவுறுத்தினர்.

மக்கள் நலப்பணியாளர்களை பணியிலிருந்து நீக்கம் செய்து கடந்த ஆண்டு நவம்பர் 8 ஆம் தேதி தமிழக அரசு அரசாணை வெளியிட்டது. இதனை எதிர்த்து மக்கள் நலப் பணியாளர்கள் சங்கங்கள் வழக்கு தொடர்ந்தன. அந்த அரசாணையை ரத்து செய்து கடந்த ஜனவரி 23 ஆம் தேதி உயர்நீதிமன்றம் நீதிபதி கே.சுகுணா உத்தரவிட்டார்.

இதனை எதிர்த்து உயர்நீதிமன்ற டிவிஷன் பெஞ்ச்-ல் தமிழக அரசு மேல்முறையீடு செய்தது. மேல்முறையீடு வழக்கை விசாரித்த நீதிபதிகள் தர்மாராவ், எம்.வேணுகோபால் ஆகியோர், மக்கள் நலப்பணியாளர்களுக்கு மீண்டும் வேலை வழங்க வேண்டும் என்று நீதிபதி கே.சுகுணா பிறப்பித்திருந்த உத்தரவுக்கு கடந்த ஏப்ரல் 4 ஆம் தேதி இடைக்கால தடை விதித்து உத்தரவிட்டனர்.

இந்த இடைக்கால தடை உத்தரவை விலக்கக்கோரி திண்டுக்கல் மாவட்ட மக்கள் நலப்பணியாளர்கள் நலச்சங்கம் சார்பில் அதே நீதிபதிகளிடம் மனு தாக்கல் செய்யப்பட்டுள்ளது. இந்த மனு நேற்று விசாரணைக்கு வந்தது.

மக்கள் நலப்பணியாளர்களுக்கான பணி ஒப்பந்த காலம் வரும் மே 31 ஆம் தேதியுடன் முடிவடைவதால், தங்கள் வழக்கை உடனடியாக விசாரித்து உத்தரவு பிறப்பிக்க வேண்டும் என்று சங்கத்தின் சார்பில் வழக்கறிஞர்கள் ஆர்.வைகை, எல்.சந்திரகுமார் ஆகியோர் வாதிட்டனர்.

வழக்கு விசாரணையின்போது நூற்றுக்கும் மேற்பட்ட மக்கள் நலப்பணியாளர்கள் கோர்ட்டுக்குள் ஆஜராகியிருந்தனர். இதற்கு நீதிபதிகள் அதிருப்தி தெரிவித்தனர்.

அப்போது நீதிபதிகள், `அவர்கள் தரப்பில் வழக்கு தாக்கல் செய்துள்ள சங்கங்களின் நிர்வாகிகள் வேண்டுமானால் கோர்ட்டுக்குள் வரலாம். மக்கள் நலப்பணியாளர்கள் நூற்றுக்கணக்கில் கூட்டமாக வர வேண்டாம். இது விசாரணைக்கு தடங்கலாக உள்ளது.

இந்த வழக்கு விசாரணையை 19 ஆம் தேதிக்கு (இன்று) தள்ளிவைக்கிறோம். மக்கள் நலப்பணியாளர்கள் பெரும் கூட்டமாக வருவதை தவிர்த்தால்தான் வழக்கை நடத்த முடியும்'' என்று குறிப்பிட்டனர்.

---

.