10 மற்றும் 12 ஆ-ம் வகுப்பு தேர்வு எழுதும் மாணவர்களுக்காக பள்ளிகளுக்கு ஜெனரேட்டர் மூலம் மின்சாரம்: தமிழக அரசு அறிவிப்பு

எழுத்துரு அளவு

திங்கள், 27 பிப்ரவரி 2012 09:21

0 Comments

சென்னை, பிப்.27- மின்வெட்டு பிரச்சினையால் பெரிய அளவில் பாதிப்பு ஏற்படாமல் இருக்க தமிழக அரசு தீவிர நடவடிக்கைகளை எடுத்து வருகிறது.

தமிழ்நாட்டில் பொதுத்தேர்வு எழுத உள்ள 12 மற்றும் 10- ஆம் வகுப்பு படிக்கும் மாணவ, மாணவிகளுக்கு எவ்வித பாதிப்பும் ஏற்படாமல் இருப்பதற்காக அரசு உயர்நிலைப்பள்ளிகள், மேல்நிலைப்பள்ளிகளில் மின்வெட்டு உள்ள நேரங்களில் தொடர்ந்து மின்சாரம் கிடைக்கும் வகையில் அரசே ஜெனரேட்டர்களை வாடகைக்கு பெற்று வழங்க இருக்கிறது. அவற்றை இயக்குவதற்கான டீசல் உள்பட அனைத்து செலவையும் அரசே ஏற்கும்.

அரசு உதவி பெறும் பள்ளிகள் மற்றும் தனியார் உயர்நிலை மற்றும் மேல்நிலைப்பள்ளிகள் ஜெனரேட்டர்களை வாடகைக்கு எடுத்து இயக்கிக்கொள்ளலாம்.

அதற்கு ஏற்படும் கூடுதல் செலவினை அரசே ஏற்கும் என்று முதலமைச்சர் ஜெயலலிதா அறிவித்துள்ளார்.

இதுகுறித்து முதல்-அமைச்சர் ஜெயலலிதா நேற்று வெளியிட்ட அறிக்கையில் கூறியிருப்பதாவது:-

தற்போதுள்ள இக்கட்டான மின் நிலைமையை சமாளிக்கும் வகையிலும், தொழில்துறையினர் மற்றும் நுகர்வோர்கள் தெரிவித்த கருத்துகளின் அடிப்படையிலும், தமிழ்நாடு மின்சார வாரியம் செயல்படுத்த உள்ள மின் விநியோக கட்டுப்பாட்டு முறைகளை 25- ஆம் தேதி தமிழ்நாடு மின்சார வாரியம் அறிவித்துள்ளது.

தமிழ்நாடு மின்சார வாரியத்தால் செயல்படுத்த உள்ள இந்த மின்வெட்டு காரணமாக, பொதுத்தேர்வு எழுதவுள்ள 10 மற்றும் 12- ஆம் வகுப்பு பயிலும் மாணவ, மாணவியருக்கு எந்த வித பாதிப்பும் ஏற்படக்கூடாது என்பதால், அரசு உயர்நிலை மற்றும் மேல்நிலைப்பள்ளிகளுக்கு மின்வெட்டு இல்லாமல் மின்சாரம் வழங்க நடவடிக்கை எடுக்கப்படும்.

எனினும், அவ்வாறு இயலாத சூழ்நிலையில், மின்வெட்டு உள்ள நேரங்களிலும், தொடர்ந்து மின்சாரம் கிடைக்கும் வகையில், அரசே ஜெனரேட்டர்களை வாடகைக்கு பெற்று வழங்கும். ஜெனரேட்டர்களை இயக்குவதற்கான டீசல் உள்பட அனைத்துச் செலவையும் அரசே ஏற்கும்.

இதே போன்று அரசு உதவி பெறும் மற்றும் தனியார் உயர்நிலை மற்றும் மேல்நிலைப்பள்ளிகள், ஜெனரேட்டர்களை வாடகைக்கு எடுத்து இயக்கிக்கொள்ளலாம். அதற்கு ஏற்படும் கூடுதல் செலவினை அரசு அவர்களுக்கு ஈடு செய்யும்.

இவ்வாறு அறிக்கையில் கூறப்பட்டுள்ளது.

---

.