கிராமமாக இருந்து மாநகராக உயர்ந்த சென்னைக்கு இன்று 373ஆம் ஆண்டு பிறந்தநாள்

எழுத்துரு அளவு

புதன், 22 ஆகஸ்ட் 2012 15:13

0 Comments

சென்னை, ஆக.22-  தென் இந்தியாவின் நுழைவு வாயிலாக கருதப்படும் சென்னை மாநகரம் 1639ஆம் ஆண்டு ஆகஸ்டு மாதம் 22ஆம் தேதி உருவானது. நீண்ட.. நெடிய.. வரலாற்றை கொண்ட சென்னை மாநகரம் இன்று (புதன்கிழமை) தனது 373ஆவது பிறந்தநாளை கொண்டாடுகிறது. பரபரப்பாகவும், சுறுசுறுப்பாகவும் இன்று இயங்கிக் கொண்டிருக்கும் சென்னை மாநகரம், தொடக்க காலத்தில் சிறு சிறு கிராமங்களாக பிரிந்து கிடந்தது. அந்தப் பகுதிகளை பல்லவ, சோழ, பாண்டிய, விஜயநகர மன்னர்கள் ஆட்சி செய்தனர்.

அந்த சமயத்தில், வெளிநாடுகளில் இருந்து வர்த்தகர்களும், மதபோதகர்களும் கப்பல் மூலம் வந்து சென்னை கடற்கரையில் இறங்கியுள் ளனர். சிறிய கிராமமாக இருந்த அந்தப் பகுதி `சென்னப்பட்டினம்' என்று அழைக்கப்பட்டது. 1639ஆம் ஆண்டு ஆங்கிலேய கிழக்கிந்திய கம்பெனி யின் ஏஜெண்டுகளான பிரான்சிஸ் டே, ஆண்ட்ரூ கோகன் ஆகியோர், அந்தப் பகுதியை ஆங்கிலேயர் களுக்கான குடியிருப்பு அமைக்க தேர்வு செய்தனர். அதன்பிறகு, ஓராண்டு கழித்து செயின்ட் ஜார்ஜ் கோட்டை கட்டப்பட்டது. அதை மையமாக வைத்து ஆங்கிலேயர்களின் குடியிருப்புகள் கட்டப்பட்டன.

இதனால், சென்னப்பட்டினத்தை சுற்றி பரவலாக இருந்த திருவல்லிக்கேணி, புரசைவாக்கம், எழும்பூர், சேத்துப்பட்டு போன்ற கிராமங்களும் ஒன்றிணைந்தன. 1688ஆம் ஆண்டு சென்னை முதல் நகரசபையாக இரண்டாம் ஜேம்ஸ் மன்னரால் அறிவிக்கப்பட்டது. இதன் மூலம் இந்தியாவின் முதல் நகரசபை என்ற புகழ் சென்னைக்கு கிடைத்தது. 1746ஆம் ஆண்டு செயின்ட் ஜார்ஜ் கோட்டையையும், சென்னை நகரையும் பிரெஞ்சுக்காரர்கள் கைப்பற்றினர். அதன்பிறகு, 1749ஆம் ஆண்டு இவை மீண்டும் ஆங்கிலேயர் வசம் வந்தன. அதன்பின்னர்தான், சென்னை நகரம் பெரிதும் வளர்ச்சியடைய தொடங்கியது.

இந்தியாவில் இருந்த முக்கிய நகரங்கள் ரயில் பாதைகள் மூலம் சென்னையுடன் இணைக்கப்பட் டன. சென்னப்பட்டினம் என்ற பெயரில் கிராமமாக இருந்த ஆரம்பகால சென்னை, அதன்பிறகு மதராஸ் பட்டினம், மதராஸ் மாகாணம் என்ற பெயரைத் தாண்டியே சென்னை என அழைக்கப்பட்டது.   1947ஆம் ஆண்டு இந்தியா சுதந்திரம் அடைந்த பிறகு, மதராஸ் மாகாணத்தின் தலைநகரமாக சென்னை அமைந்தது. 1956ஆம் ஆண்டு மொழி வாரியாக மாநிலங்களை பிரித்தபோது, மதராஸ் தமிழ்நாட்டின் தலைநகர மானது. அதன்பின்னர், 1996ஆம் ஆண்டு மதராஸ், சென்னை என்று பெயர் மாற்றப்பட்டது. அன்று முதல் இன்று வரை அனைத்து தரப்பு மொழிகள் பேசும் மக்கள் வசிக்கும் `காஸ்மோபாலிடன்' நகரமாக சென்னை விளங்கிவருகிறது.

தொழில் வளர்ச்சியை எடுத்துக் கொண்டால், இந்தியாவிலேயே அதிக வாகன உற்பத்தி தொழிற்சாலைகள் இங்குதான் உள்ளன. கம்ப்யூட்டர் சேவை, பெட்ரோ கெமிக்கல்ஸ், ஜவுளி மற்றும் நிதி சேவைகள் உள்பட பல்வேறு துறைகளிலும் சென்னை சிறந்து விளங்குகிறது.   சென்னையில் இருந்து பிற மாநிலங்களுக்கு ரெயில் மற்றும் விமான சேவையும், வெளிநாடுகளுக்கு விமான சேவையும், அந்தமான் தீவில் உள்ள போர்ட் பிளேருக்கு கப்பல் போக்குவரத்தும் இருந்து வருகிறது.

அன்றைய கால கட்டடக்கலைக்கு சான்றுகளாக, சென்னை உயர்நீதிமன்றம், சென்னை பல்கலைக்கழக கட்டடம், எழும்பூர் அருங்காட்சியகம், சென்னை மாநகராட்சி ரிப்பன் மாளிகை, விக்டோரியா ஹால், மெமோரியல் ஹால், சென்டிரல் மற்றும் எழும்பூர் ரயில் நிலையம் உள்ளிட்டவை இருக்கின்றன. `வந்தாரை வாழவைக்கும் சென்னை' என்ற சொல்லுக்கு ஏற்ப வேலைவாய்ப்புகள் அதிகம் உள்ள நகராக சென்னை உருவெடுத்துள்ளது. நிறைவேறிக் கொண்டிருக்கும் மெட்ரோ மற்றும் மோனோ ரயில் திட்டங்கள் சென்னையை மேலும் வளர்ச்சியுடையதாக்கும்.

இருந்தாலும், அன்றைய காலத்தில், சென்னையில் தெளிந்த நீராக ஓடிய கூவம், அடையாறு போன்றவை, இன்று மக்கள் நெருக்கத் தால் சாக்கடை செல்லும் கால்வாயாக மாறிவிட்டன. சென்னையின் 373ஆவது பிறந்தநாளை கொண்டாடிக் கொண்டிருக்கும் இந்த வேளையிலாவது, கூவம், அடையாறு போன்றவற்றை சுத்தப்படுத்துவதற்கான முயற்சியில் அரசும், சமூக ஆர்வலர்களும் ஈடுபட வேண்டும். இந்த முயற்சி வெற்றியடைந்தால், சென்னை வரலாறு என்றும் மணக்கும்.

---

.