அக்.8இல் வடகிழக்குப் பருவ மழை தொடங்குவதற்கான சூழல் உள்ளது

எழுத்துரு அளவு

ஞாயிறு, 07 அக்டோபர் 2018 14:49

0 Comments

வானிலை ஆய்வு மய்யம் தகவல்

சென்னை, அக்.7 வடகிழக்கு பருவமழை அக்டோபர்  8-ஆம் தேதி தொடங்குவதற்கான சாதகமான சூழல் நிலவுகிறது என்று சென்னை வானிலை ஆய்வு மய்யம் தெரிவித்துள்ளது.

இது குறித்து சென்னை வானிலை ஆய்வு மய்ய இயக்குநர் எஸ்.பாலச்சந்திரன் வெள்ளிக்கிழமை கூறியது:

தமிழகம் மற்றும் புதுச்சேரியில் அக்டோபர் 8-ஆம் தேதி வரை பரவலாக மிதமான மழையும், ஓரிரு இடங்களில் பலத்த மழை முதல் மிக பலத்த மழையும் பெய்யக்கூடும். தென்கிழக்கு அரபிக் கடல் பகுதியில்  குறைந்த காற்றழுத்தத் தாழ்வு பகுதி உருவாகியுள்ளது. இது அடுத்து வரும் இரண்டு நாள்களில் காற்றழுத்த தாழ்வு மண்டலமாகவும், தொடர்ந்து புயலாகவும் வலுப்பெற்று வடமேற்கு திசையில் ஓமன் கரையை நோக்கி நகரக்கூடும்.

அரபிக்கடல் பகுதிகளில் குறைந்த காற் றழுத்த தாழ்வுப் பகுதி உருவாகியுள்ளதால், மீனவர்கள் குமரிக்கடல், லட்சத்தீவுகள், தென்கிழக்கு மற்றும் அரபிக்கடல் பகுதி களில் மீன்பிடிக்க செல்ல வேண்டாம் என அறிவுறுத்தப்படுகிறார்கள்.

தென் மேற்குப் பருவ மழை வட இந்தியப் பகுதிகளில் இருந்து அடுத்து வரும் 3 நாள்களில் படிப்படியாக விலகி விடும். இதைத் தொடர்ந்து, வடகிழக்குப் பருவமழை தமிழகம், கேரளம், தெற்கு ஆந்திரம், தெற்கு கர்நாடகம் பகுதிகளில்  அக்டோபர் 8-ஆம் தேதி தொடங்குவதற்கான சாதகமாக சூழல் நிலவுகிறது. தெற்கு வங்கக் கடல் பகுதியில் அக்டோபர் 8-ஆம் தேதி ஒரு குறைந்த காற்றழுத்த தாழ்வு பகுதி உருவாகக்கூடும். தென் கிழக்கு அரபிக் கடலில் உருவாகவுள்ள புயல் காரணமாக, தமிழக பகுதி வழியாக ஈரப்பதமிக்க  காற்று வீசும். அப்போது, நீலகிரி, தேனி, திண்டுக்கல், கோவை, திருநெல்வேலி, கன்னியாகுமரி ஆகிய மாவட்டங்களில் மலைப் பகுதியில் ஓரிரு இடங்களில் மிக பலத்த மழைக்கு வாய்ப்பு உள்ளது என்றார் எஸ்.பாலச்சந்திரன்.

முன்னதாக தொடங்கும் பருவ மழை

தமிழகத்தை வளம் கொழிக்கச் செய்யும் வடகிழக்குப் பருவமழை வழக்கமாக, அக்டோபர் 3-ஆவது வாரத்தில் தொடங்கும். ஆனால், கடந்த ஆண்டு  சற்று தாமதமாக  அக்டோபர் 27-ஆம் தேதி தொடங்கியது.

ஆனால், இந்த ஆண்டு முன்னதாக அக் டோபர் 8-ஆம் தேதியே தொடங்குவதற்கான சாதகமான சூழல் உருவாகியுள்ளது. வட கிழக்குப் பருவ மழை சீசனில் (அக்டோபர், நவம்பர், டிசம்பர்)  இயல்பான மழை அளவு 440 மி.மீ. ஆகும். இந்த ஆண்டு 500 மி.மீ. வரை மழை பதிவாகும் என்று இந்திய வானிலை ஆய்வு மய்யத்தால் எதிர்பார்க்கப்படுகிறது.