எழுத்தாளர் பொன்னீலன் கருத்தும் - மகிழ்ச்சியும்

எழுத்துரு அளவு

வெள்ளி, 09 மார்ச் 2012 15:44

அன்புக்கும் மிகுந்த மதிப்புக்கும் உரிய தோழர் அவர்களுக்கு,

வணக்கம். விடுதலை பிப்ரவரி 28 இதழ் (அஞ்சலில் எனக்கு நேற்று தான் வந்தது) திராவிட இயக்க நூற்றாண்டு தொடக்க விழாவில் தாங்களாற்றிய பேருரையை மனுதர்மத்துக்கும் மனித தர்மத்துக்குமிடையே மிகப் பெரும் போராட்டம் எனத் தலைப்பிட்டு அருமையாக வெளியிட்டுள்ளது. மிகுந்த மகிழ்ச்சி அடைகிறேன். சமநீதி இயக்கமென்பது அனைவருக்கும் அனைத்தும் என்னும் திசை வழியில் ஒரு நூற்றாண்டு காலம் ஓய்வில்லாமல், சோர்வில்லாமல் இயங்கி வரும் பேரியக்கம் என்பதைத் தெளிவாக விளக்கியிருக்கிறீர்கள். வரலாறு தெரியாமல் வரலாற்றுச் சாதனைகளை வசப்படுத்திக் கொள்ளாமல் வளர்ச்சி சாத்தியமில்லை என்பதையும் அழுத்தம் திருத்தமாகத் தெளிவுபடுத்தியுள்ளீர்கள். நாடகம் பார்க்கவும், ஏன் பேருந்தில் பயணம் செய்யவும், உணவு விடுதிகளில் நுழையவும் தலித்துகள் மறுக்கப்பட்ட காலம் அன்று இருந்தது. அந்தத் தடைகளை நீக்கி, அவர்களுக்கு விடுதலை வழங்கியது சமநீதிகட்சி. சமூகம் தெரிந்து, தெளிந்து கொள்ள வேண்டிய அடிப்படைக் கருத்து இது. உயர்நீதிமன்ற நீதிபதி சங்கரன் நாயரை வருணாசிரம நம்பூதிரி ஒருவர் எடாசங்கரா என அழைத்ததையும், கலைஞர் தலையீட்டால் இன்று தலித் நீதிபதிகளை வைதீக வெறிபிடித்த உயர் சாதியினர் எழுந்து நின்று ஓ மை லார்டு என்று பவ்வியமாக அழைக்கும் சூழ் நிலையையும் படிப்பவர் மனதில் பசு மரத்தாணிபோல் பதியும் வகையில் அழுத்தம் திருத்தமாகச் சொல்லயிருக்கிறீர்கள்.

தேவதாசி முறை பகவத்காரியம், இதை மாற்றக் கூடாது என்று சட்டமன்றத்தில் முழங்கிய சத்தியமூர்த்தி அய்யரை அப்படி பகவத் காரியம் முடங்கிவிடக் கூடாது என்றால், இனி அதை உங்கள் பெண்களைக் கொண்டு தொடருங்கள் என்று அன்னை முத்துலெட்சுமி ரெட்டி சொன்ன பதிலின் பின்னால், பகுத்தறிவுப் பகலவன் பெரியார் இருந்தார் என மிக நேர்த்தி யாகச் சுட்டிக்காட்டியிருக்கிறீர்கள்.

தங்கள் பேருரை அடித்தளத்தில் இன்னும் நசுங்கிக் கொண்டிருக்கும் மக்களைச் சென்றடைய வேண்டும். பெரியார் என்னும் பெரு மழையில் முளைத்துக் கிளைத்துச் செழித்துப் பூத்துக் காய்த்து நிற்கும் நம் மண்ணின் மக்களுக்குத் தங்கள் வாழ்வுக்கான ஆதார வேர்களை மனதில் பதியும்படி நினைவு படுத்த வேண்டும். மிக அரிய பேருரை இது. மிகுந்த மகிழ்ச்சி யடைகின்றேன்.

- பொன்னீலன்

---

.