எழுத்துரு அளவு Larger Font Smaller Font

சென்னையில் கடும் குடிநீர் பஞ்சம்:
ஆந்திர முதல்வருக்கு தமிழக முதல்வர் கடிதம்

சென்னை, ஜன.8 தமிழகத்துக்கு நிர்ண யிக்கப்பட்ட கிருஷ்ணா நதி நீரை திறந்து விட வலியுறுத்தி, ஆந்திர முதல்வருக்கு தமிழக முதல்வர் ஓ. பன்னீர்செல்வம் கடிதம் எழுதியுள்ளார்.

சந்திரபாபு நாயுடுவுக்கு அவர் எழுதி யுள்ள கடிதத்தில், வடகிழக்குப் பருவ மழை பொய்த்ததால், சென்னையில் கடுமையான குடிநீர் பற்றாக்குறை நிலவுகிறது. இதனைத் தீர்க்க, உடனடியாக கிருஷ்ணா நதியில் இருந்து சென்னைக்கு உரிய நீரை திறந்து விட வேண்டும் என்று கேட்டுக் கொள்கிறேன்.

சென்னைக்குக் குடிநீர் தட்டுப்பாட்டைப் போக்க கண்டலேறு அணையில் இருந்து ஆந்திர - தமிழ்நாடு மாநிலங்களுக்கு இடையே கிருஷ்ணா நதி நீரை பகிர்ந்து கொள்வதற்கான ஒப்பந்தத்தின் அடிப்படையில், உடனடியாக தண்ணீர் திறந்து விட வேண்டும்.

தமிழகத்துக்கு குறிப்பாக சென்னையின் முக்கிய நீர் ஆதாரம் வடகிழக்குப் பருவ மழைதான். ஆனால், இந்த ஆண்டு, வடகிழக்குப் பருவ மழை போதிய அளவில் பெய்ய வில்லை. இதனால், சென்னைக்கு 57% அளவுக்கு குடிநீர் பற்றாக் குறை ஏற்பட்டுள்ளது.

ஏற்கனவே, சென்னையில் உள்ள குடிநீர் ஆதாரங்களான ஏரிகளின் நீர்மட்டம் வெகுவாகக் குறைந்துள்ளது. எனவே, சென்னையின் குடிநீர் பஞ்சத்தைப் போக்க கிருஷ்ணா நதியில் இருந்து உடனடியாக தண்ணீர் திறந்து விட வேண்டியது மிகவும் அவசியமாகிறது.

எனவே, ஆந்திர அதிகாரிகளுக்கு உடனடியாக அறிவுறுத்தி, தமிழகத்துக்கு உரிய நீரை கிருஷ்ணா நதியில் திறந்து விட உத்தரவிடுமாறு கேட்டுக் கொள்கிறேன் என்று கூறியுள்ளார்.


மனிதனை விண்வெளிக்கு அனுப்பும் திட்டம்: ‘இஸ்ரோ’ விஞ்ஞானி தகவல்

விருதுநகர், ஜன.8 ‘’மனிதனை விண்வெளிக்கு அனுப்பும் திட்டத்திற்கு மத்திய அரசின் அனுமதி கிடைத்தவுடன் அய்ந்து ஆண்டுகளில் இது நிறைவேறும்,’’ என, ‘இஸ்ரோ’ எனப்படும் இந்திய விண்வெளி ஆராய்ச்சி நிறுவன முன்னாள் முதுநிலை விஞ்ஞானி சிவசுப்பிரமணியன் தெரிவித்தார்.

விருதுநகர் வெள்ளைச்சாமி நாடார் பாலிடெக்னிக்கில் தொழில் நுட்ப கண்காட்சியை துவக்கி வைத்த அவர் பேசியதாவது:

வெளிநாடுகளில் உடல் நலம், சுகாதாரம் குறித்து உயிரியல், ‘நானோ’ அறிவியல் கண்டுபிடிப்புகள் நடந்து வருகின்றன. மந்தபுத்தி உள்ளவர்களுக்கு ‘நியூரான்’ செலுத்தி சோதனை நடக்கிறது. அறிவியல் கண்டுபிடிப்புகள் சமூக ரீதியில் மாறி வருகின்றன.

பார்வை குறைபாடு உள்ளவர்களுக்கு வழங்கப்படும் குச்சியில், ‘சென்சார்’ கருவிகள் பொருத்தினால் துணை இல்லாமல் செல்லலாம். இந்த ‘சென்சார்’ குறைந்த விலையில் சிங்கப்பூரில் கிடைக்கிறது. ‘இஸ்ரோ விண்வெளி வாரம்‘ ஆண்டுதோறும் அக்டோபர், நவம்பரில் நடக்கிறது.

அப்போது பள்ளி, கல்லூரிகளில் ராக்கெட் தயாரிப்பு குறித்து விழிப்புணர்வு ஏற்படுத்தி வருகிறோம். இந்தியாவில் இருந்து மனிதனை விண்வெளிக்கு அனுப்பும் திட்டத்திற்கு மத்திய அரசின் ஒப்புதல் கிடைக்கவில்லை. அனுமதி கிடைத்த 5 ஆண்டுகளில் இது நிறைவேறும், என்றார்.


புதர்களுக்கு மத்தியில் பழைய நோட்டுகள் ரூ.9.80 லட்சம் கண்டெடுப்பு

ரிஷிகேஷ், ஜன.8 உத்தரகண்ட் மாநிலம், ரிஷிகேஷில் கங்கை நதிக்கரையோரம் உள்ள புதர்களில் மொத்தம் ரூ.9.80 லட்சம் மதிப்பிலான பழைய ரூபாய் நோட்டுகளை குப்பை அள்ளுபவர் கண்டெடுத்தார்.

இதுகுறித்து காவல் துறை அதிகாரி ஒருவர் செய்தியாளர்களிடம் வெள்ளிக்கிழமை கூறியதாவது: கங்கை நதிக்கரையில் பக்தர்கள் விட்டுச் செல்லும் பழைய துணிகளை அப்புறப்படுத்தும் பணியில் நேபாளத்தைச் சேர்ந்த உத்தம் தாரு என்பவர் வெள்ளிக்கிழமை ஈடுபட்டிருந்தார்.

அப்போது, புதர்களுக்கு மத்தியில் செல்லாத பழைய ரூ.500 நோட்டுகள் இருந்ததைக் கண்ட அவர், அவற்றை எடுத்துவந்து காவல் நிலையத்தில் ஒப்படைத்தார். அவற்றின் மொத்த மதிப்பு ரூ.9.80 லட்சமாகும். இதுகுறித்து விசாரணை நடைபெற்று வருகிறது என்று அந்த அதிகாரி தெரிவித்தார்.


பொருளாதார வளர்ச்சி விகிதம் குறையும்  மத்திய அரசு ஒப்புதல்

புதுடில்லி, ஜன.8- நடப்பு நிதியாண்டில் (2016-  -2017) நாட்டின் ஒட்டு மொத்த உள்நாட்டு உற்பத்தி (ஜிடிபி) வளர்ச்சி விகிதம் 7.1 சதவீதமாகக் குறையும் என்று மத்திய அரசு மதிப்பிட்டுள்ளது. கடந்த நிதியாண்டில் (2015-16) இது 7.6 சதவீதமாக இருந்தது.

தொழில் துறை உற்பத்தி குறைவு, சுரங்கத் துறையில் ஏற்பட்ட பின்னடைவு, கட்டுமானத் துறையில் ஏற்பட்ட சுணக்கம் ஆகியவை நடப்பு நிதியாண்டில் ஜிடிபி குறைவதற்கு முக்கியக் காரணமாகும் என்று கூறப்பட்டுள்ளது.

மத்திய அரசு அண்மையில் மேற்கொண்ட ரூபாய் நோட்டு வாபஸ் நடவடிக்கையின் விளைவுகள், பொருளாதார வளர்ச்சி விகித மதிப்பீட்டில் சேர்க்கப்படவில்லை. மத்திய புள்ளியியல் அலுவலகம் தொகுத்த இந்த தகவல்களை, டில்லியில் தலைமை புள்ளியியலாளர் டி.சி.ஏ. அனந்த் வெள்ளிக்கிழமை வெளியிட்டார். இது தொடர்பாக அவர் மேலும் கூறியதாவது:

பொருளாதார வளர்ச்சி விகிதத்தை மதிப்பிட்டபோது கடந்த நவம்பர் மாத (ரூபாய் நோட்டு மதிப்பிழப்பு அறிவிப்பு வெளியான மாதம்) புள்ளி விவரங்களும் ஆய்வுக்கு உள்படுத்தப்பட்டன. ஆனால், இதில் அந்த மாதத்தின் வங்கி டெபாசிட்டுகளையும், கடன் தகவல்களையும் சேர்க்கவில்லை. ஏனெனில், ரூபாய் நோட்டு வாபஸ் நடவடிக்கையால் பெரிய அளவில் மாற்றங்கள் ஏற்படக் கூடும். அக்டோபர் மாதம் வரையிலான விவரங்கள் முழுமையாக ஆய்வுக்கு எடுத்துக் கொள்ளப்பட்டன.

எனவே, இந்த மதிப்பீட்டில் ரூபாய் நோட்டு வாபஸ் நடவடிக்கை காரணியாக எடுத்துக் கொள்ளப்படவில்லை. நடப்பு நிதியாண்டில் (2016-   -  2017) ஒட்டுமொத்த உள்நாட்டு உற்பத்தி 7.1 சதவீதமாக இருக் கும் என்று மதிப்பிடப்பட்டுள்ளது. இது கடந்த நிதியாண்டில் (2015- -   2016) 7.6 சதவீதமாக இருந்தது. மொத்த மதிப்புக் கூட்டல் (ஜிவிஏ) வளர்ச்சி, நடப்பு நிதியாண்டில் 7 சதவீதமாக இருக்கும். இது கடந்த நிதியாண்டில் 7.2 சதவீதமாக இருந்தது.

வேளாண் துறை, மீன் பிடிப்புத் துறை, வனத் துறை ஆகியவற்றின் வளர்ச்சி 1.2 சதவீதத்தில் இருந்து 4.1 சதவீதமாக அதிகரிக்க வாய்ப்பு உள்ளது. அதே நேரத்தில் சுரங்கத் துறையின் வளரச்சி 1.8 சதவீதம் குறையும். உற்பத்தித் துறையின் வளர்ச்சி 9.3 சதவீதத்தில் இருந்து 7.4 சதவீதமாகக் குறையும். கட்டுமானத் தொழில் துறை வளர்ச்சி 3.9 சதவீதத்தில் இருந்து 2.9 சதவீதமாகக் குறையும் என்று மதிப்பிடப்பட்டுள்ளது.

2016- -   2017-ஆம் நிதியாண்டில் தேசிய தனி நபர் சராசரி வருமானம் (தற்போதைய விலையில்) ரூ.1,03,007-ஆக இருக்கும் என்று மதிப்பிடப்பட்டுள்ளது. இது 10.4 சதவீத வளர்ச்சி யாகும். இது கடந்த நிதியாண்டில் ரூ.93,293 ஆக இருந்தது. அப்போது தேசிய தனிநபர் சராசரி வருமான வளர்ச்சி விகிதம் 7.4 சதவீதமாக இருந்தது.



.
 

இப்பிரிவில் அண்மைச் செய்திகள்:
இப்பிரிவில் முந்தையச் செய்திகள்:

தமிழில் கருத்துக்களை தெரிவிக்க -  


Security code
Refresh

Banner

Banner
Banner