மின்சாரம்

மின்சாரம்

'சோ' மறைவிற்குப் பிறகு திருவாளர்  குருமூர்த்தி 'துக்ளக்'கில் தன் பேனாவைச் சுழல விட்டிருக்கிறார்.

இந்திரன் மாறினாலும் இந்திராணி மாற மாட்டார் எனும் புராணக் கதை போல 'துக்ளக்' தன் பூணூல் தனத்தைவிடப் போவதில்லை.

வி.பி.சிங், லாலு பிரசாத், கலைஞர், வீரமணி என்று சொன்னாலே இந்தக் கூட்டத்திற்கு குருதிக் கொதிப்பும், மாரடைப்பும் வருவது புரிந்து கொள்ளத் தக்கதே!

சம்பந்தா சம்பந்தம் இல்லாமலும், உண்மைக்கு மாறாகவும் பூணூல் கொடுக்கு இவர்களைக் கொட்டிக் கொண்டே இருக்கும்.

எடுத்துக்காட்டாக இவ்வார 'துக்ளக்'கில் (28.6.2017) கேள்வி -  பதில் பகுதியில் திராவிடர் கழகத் தலைவரை சீண்டிப் பார்க்க ஆசைப்பட்டுள்ளார்.

கேள்வி: திராவிடக் கட்சிகளின் பின்பலம் இல்லாமல் தமிழகத்தில் எந்த நடிகராலும் வெற்றி பெற முடியாது என்று ரஜினிகாந்த் குறித்து கி. வீரமணி கருத்துக் கூறியுள்ளாரே?

பதில்: என்னையும் கொஞ்சம் மனதில் வைத்துக் கொள்ளுங்கள், கவனித்துக் கொள்ளுங்கள் என்று ரஜினியிடம் வீரமணி கேட்கிற மாதிரி இல்லை?

'சோ'வாக இருந்தாலும், குருமூர்த்திகளாக இருந் தாலும் பார்ப்பனர்கள் ஒரு முறையைப் பின்பற்றி வருவது கண்கூடு. எதையும் ஆதாரத்தோடு வெளியிடுவதில்லை என்ற 'சத்தியம்' செய்து கொண்டு 'அக்னிசாட்சியாக' எழுதுவதைப் பிழைப் பாகக் கொண்டவர்கள் இவர்கள்.

18 வயதுள்ள யாரும் அரசியலுக்கு வரலாம் - அதே போல பைத்தியம் பிடிக்காதவர்களாகவும் அவர்கள் இருக்க வேண்டும் என்ற சட்டத்தின் நிலையை திராவிடர் கழகத் தலைவர் கூறியுள்ளார். இதனை ஏன் வசதியாக குருமூர்த்திகள் மறக்க வேண்டும்?

ரஜினி கவனித்துக் கொள்ள என்ன இருக்கிறது? திராவிடர் கழகத் தலைவர் ரஜினியிடமிருந்து மட்டுமல்ல - எவரிடமும் எதையும் எதிர்பார்க்கக் கூடியவரல்லர் - எதிர்பார்க்க வேண்டிய அவசியமும் இல்லாதவர் 'ஓட்டு' உட்பட!

உண்மை என்னவென்றால் திராவிடர் கழகத் தலைவர் வீரமணியைத் தான் இந்தக் குருமூர்த்தி கூட்டம் எப்பொழுதும் மனதில் வைத்துக் கொண்டு தத்தளிக்கிறது. அதன் வெளிப்பாடுதான் இந்தப் பதில். இருட்டைக் கண்டால் அய்யோ 'பேய்' என்று அஞ்சுபவர்களும், கறுப்புச் சட்டையைக் கண்டால், நினைத்தால் பதறுபவர்களும் இருக்கத்தானே செய்வார்கள்.

ஒரு பிரச்சினையில் ரஜினி நன்றாகவே 'கவனிக்கப்பட்டார்' மானமிகு வீரமணி அவர்களால்! அந்தத் தகவல் தெரியுமா குருமூர்த்தி கூட்டத்துக்கு?

இதுபற்றி தெரிந்து கொள்ள வேண்டும் என்றால் 15 ஆண்டுகளுக்கு முன் செல்ல வேண்டியிருக்கும்.

ரஜினி நடித்த 'பாபா' என்ற திரைப்படம் - கவிஞர் வாலி பாடல் ஆசிரியர் - அதில் ஒரு பாடல். அந்தப் பாடலில் சில வரிகள்:

கடவுளை மறுத்தவன் நாள்தோறும்

கூறினானே நாத்திகம்

பகுத்தறிவாளன் நெஞ்சினிலே

பூத்ததென்ன ஆத்திகம்

திருமகன் வருகிறான் திருநிறை

நெற்றிமீது தினம் பூசி

அதிசயம் அதிசயம் பெரியார்தான்

ஆனதென்ன ராஜாஜி

என்பதுதான் அந்தப் பாடல்.

பெரியார் ராஜாஜியாகி விட்டார் என்று பொருள் தரும் இந்த வரி நீக்கப்பட வேண்டும் என்று குரல் கொடுத்தவர் - வழக்கும் தொடுத்தவர் திராவிடர் கழகத் தலைவர்.

அவ்வளவுதான், அலறி அடித்துக் கொண்டு சமாதானத்துக்கு வந்தவர் யார் என்பதை ரஜினியைக் கேட்டுத் தெரிந்து கொள்ளட்டும் திருவாளர் குருமூர்த்தி அய்யர்வாள். ஏன்? பாடலாசிரியர் வாலியே பெரியார் திடலுக்குப் பறந்து வந்தார் - தன் வருத்தத்தையும் பகிர்ந்து கொண்டார் கடைசி செய்தி, 'பாபா'வில் சர்ச்சைக்குரிய பாடல் நீக்கம் ('தினமலர்' 3.8.2002).

எங்களோடு மோதியவர் கதை எல்லாம் இப்படியாகத்தான் முடிந்திருக்கிறது.

ஆளானப்பட்ட திருவாளர் 'சோ'வே பெரியார் திடலுக்குப் பேட்டி காண வரும்போதே 'வீரமணி சார், இந்த ஆதாரங்களை எல்லாம் காட்டி பயமுறுத்தாதீர்கள்' என்ற சரணாகதியைப் பல்லவி யாக்கிக் கொண்டுதான் வருவார் என்பதெல்லாம் குருமூர்த்திக்கு எங்கே தெரியப் போகிறது!

இதே 'துக்ளக்'கில் இன்னொரு கேள்வி - பதில் பகுதியிலும் சம்பந்தா சம்பந்தம் இல்லாமல் ஆசிரியர் வீரமணி அவர்களை இழுத்திருக்கிறார்.

கேள்வி: வாஜ்பாய் ஆட்சிக் காலத்தில் காஷ்மீர் எல்லையில் முழுமையான சண்டை நிறுத்தம் கடைப் பிடிக்கப்பட்டது. அதே அணுகுமுறையை மோடியும் பின்பற்றி இருக்க வேண்டும் என்கிறாரே ஃபரூக் அப்துல்லா?
இதில் பலவற்றை எழுதி விட்டு கடைசியாக முடிக்கும் பொழுது  'முன்னுக்குப்பின் முரணாகப் பேசும் ஃபரூக்அப்துல்லா நம் வீரமணியைப் போலத் தோன்றுகிறார். காஷ்மீரிலும் ஒரு வீரமணி இருக்கிறார்' என்று பதில் சொல்லியிருக்கிறார் திருவாளர் குருமூர்த்தி அய்யர். இந்தக் கேள்விக்கும் பதிலுக்கும் ஏதாவது சம்பந்தம் உண்டா?
இதன் மூலம் ஒன்று உறுதியாகவே தெரிகிறது. வீரமணி என்ற பெயர் இந்தக் கூட்டத்தை தூங்க விடாமல் செய்கிறது அல்லும் பகலும் அவர் நினைவு தான் போலும்!

Phobia  என்று ஆங்கிலத்தில் ஒரு சொல் உண்டு. சதா நினைத்துக் கொண்டு அஞ்சிக் குலை நடுங்குவது.

நிழலைப் பார்த்துக்கூட 'அய்யோ வீரமணியா?' என்று வியர்த்து விறுவிறுத்துப் போகிறார்கள் என்பது நன்றாகவே விளங்குகிறது - இருக்காதா?

காவிகளுக்குக் கசையடி - சங்கர மடத்துக்குச் சவுக்கடி - சமூகநீதி எதிரணிகளுக்குத் தடாலடி - ஆன்மீகவாதிகளுக்கு அதிரடி - மூடநம்பிக்கை வியாபாரிகளுக்கு முதலடி - மதவாதக் கும்பலுக்கு மரண அடி!

அவர் பெயரைக் கேட்டால் அதிருதுல! அந்த எரிச்சலில்தான் எதற்கெடுத்தாலும் வீரமணி வீரமணி என்ற உதறல்!
அகில இந்திய பிஜேபி தலைவரை வரவழைத்து, எங்களுக்கு இடஒதுக்கீடே வேண்டாம் என்று சில அனாமதேயங்களைச் சொல்ல வைத்து "சபாஷ்! சபாஷ்!! இடஒதுக்கீடு வேண்டாம்" என்று சொல்லுகிற பிரகஸ்பதிகளும் இருக்கிறார்களே!

இதை பிரதமர் மோடியிடம் சொல்லி ஆவன செய்வேன் என்று அமித்ஷாவையும் பேச வைத்து, கடைசியில் உள்ளி மூக்கு உடைந்து ரத்தம் கொட்டி யது தானே குருமூர்த்திகள் கண்ட மிச்சம்!

அந்த ஆத்திரம் இருக்காதா? அந்தோ பரிதாபம்! ஆழ்ந்த அனுதாபங்கள்!


மின்சாரம்

தமிழ்நாட்டில் தி.மு.க. விற்கு வாய்ப்பு இனிமேல் இல்லை. திராவிட இயக்கச் சித்தாந்தம் என்பது திமுகவிற்கு வெறும் சடங்காக மாறி பல காலம் ஆகி விட்டது.

அ.தி.மு.க காலத்தில் எம்.ஜி.ஆர். அந்தச் சடங்கை கொஞ்சம் பகிர்ந்து கொண்டார்.

ஜெயலலிதா காலத்தில் இம்மாதிரிச் சடங்குகள் எல்லாம் உதறித் தள்ளப்பட்டன.

இப்பொழுது அ.தி.மு.க. பல கிளையாகி விட்டது. இந்த நிலையில் இக் கட்சிகளுக்கு மாற்றாக தேசிய கட்சிகளுக்கு நன்கு வாய்ப்பு இருக்கிறது.

இந்த மாநிலக் கட்சிகளுக்கு எதிராக காங்கிரஸ் அல்லது பா.ஜ.க. என்கிற தேசிய கட்சிகள் முன்னி லைப்படுத்துவது தமிழக அரசியல் களத்தை ஆரோக்கியமானதாக்கும் எனும் வகையில் இவ் வார ‘துக்ளக்’ இதழில் (28.6.2017) கட்டுரை ஒன்று தீட்டப்பட்டுள்ளது.

‘துக்ளக்’ இதன் மூலம் என்ன சொல்ல வருகிறது.  தி.மு.க, அ.தி.மு.க . வுக்கு எதிர்காலம் இல்லை. திராவிட சித்தாந்தம் என்பதெல்லாம் இனி எடுபடாது. எனவே தேசிய கட்சிகள் தான் வேரூன்ற வாய்ப்பு உண்டு.

அந்தத் தேசிய கட்சிகள் காங்கிரசும் - பா.ஜ.க.வும் தான் என்பது ‘துக்ளக்‘ கட்டுரையின் சாரமாகும்.

இது உண்மைதானா? தமிழ்நாட்டில்  திராவிட சித்தாந்தத்திற்கு மதிப்பு இல்லையா? அது காலாவதியாகி விட்டதா? இந்த சித்தாந்ததுக்கு எதிராக  தேசிய கட்சிகள் இங்கே செயல்படப் போகிறதா? என்பது மிக முக்கியமான கேள்விகளாகும்.

இந்தி இந்தியாவின் ஆட்சி மொழி என்று பா.ஜ.க. தமிழ்நாட்டு மக்கள் முன் வைக்கப் போகிறதா? சமஸ்கிருதத்திற்கு முக்கியத்துவம் கொடுக்கப்படும் என்று அறிவிக்கப் போகிறதா?

இடஒதுக்கீடு இனி தேவையில்லை என்று பிரகடனப் படுத்தப் போகிறதா?

தமிழ்நாட்டின் பெயரை மறுபடியும் சென்னை மாநிலம் என்று பெயர் மாற்றம் செய்யப் போகிறதா? சுயமரியாதைத் திருமணம் செல்லாது என்று சட்டம் செய்யப் போகிறதா?

தலைமைச் செயலகத்தில் பொறிக்கப்பட்டுள்ள “வாய்மையே வெல்லும்” என்பதற்குப் பதிலாக ‘சத்தியவே ஜெயதே’ என்று மறுபடியும் பலகையை மாட்டப் போகிறதா?

தொடர் வண்டி நிலையங்களில் பெயர் பலகைகளில் முதல் இடத்தில் இந்தி எழுத்துகளை முன்பு இருந்தது போல) மீண்டும் இடம் பெறச் செய்யப் போகிறதா?

ஜாதிப் பெயர்களில்தெருக்களின் பெயர்கள் இருக் கலாம் என்று சுற்றறிக்கை விடப் போகிறதா?

தமிழ்த்தாய் வாழ்த்துப் பாடலை நீக்கி விட்டு ‘சரஸ்வதி வந்தனா’வை அறிமுகம் செய்யப் போகிறார்களா?

திருவள்ளுவர் ஆண்டை தீர்த்துக் கட்டப் போகிறார்களா? குமரி முனையில் இருக்கும் 133 அடி உயரமுள்ள திருவள்ளுவர் சிலையை நீக்கி விட்டு மனுவின் சிலையை நிறுவப் போகிறார்களா?

கலப்புத் திருமணம் செய்து கொண்டவர்களுக்கு நிதி உதவி, பெண்களுக்கான மறுமலர்ச்சித் திட்டங்களை எல்லாம் ஊத்தி மூடுவோம் என்று பொங்குவார்களா?

விளம்பரப் பலகைகளில் முதல் இடத்தில் தமிழ் இருக்க வேண்டும் என்ற ஆணையை விலக்கிக் கொள்ளப் போகிறார்களா?

மறுபடியும் வணக்கம் போய் நமஸ்காரமா? நன்றிக்கு விடை கொடுத்து, வந்தனோபசாரமா? சொற்பொழிவு போய் பிரசங்கம் தானா?

‘திரு’ போய் ‘ஸ்ரீ’ தானா?

மயிலாடுதுறை மாயவரம் தானா? திருமணம் நீங்கி விவாஹ சுப முகூர்த்தம் தானா?

நீத்தார் நினைவேந்தலுக்கு விடை கொடுத்து உத்தரகிரியை தானா?

புதுமனைப்புகு விழா போய் கிரகப்பிரவேசம் தானா?

பொங்கல் போய் சங்கராந்திதானா?

இவற்றையெல்லாம் முன்னிறுத்தி எந்தத் தேசிய கட்சி தமிழ்நாட்டில் கடை விரிக்கப் போகிறது? எந்த புதிய கட்சிக்கு இந்தத் துணிவுண்டு?

காங்கிரசிஸ் தேசிய கட்சி தான். வெறும் காமராசர் அல்ல - பச்சைத் தமிழராக இருந்துதானே ஆள முடிந்தது - திராவிட இயக்கச் சித்தாந்தமான சமூக நீதியைத் தோளில் சுமந்துதானே கர்ம வீரர் காமராசர் வீரர் உலா வந்தனர்.

கல்வி வளர்ச்சிக்குக் காரணம் பெரியார், காரியம் காமராசர் என்று ஆனந்தவிகடன் எழுதியது எந்த அடிப்படையில்?
தேசியத் திலகமான காமராசரை கதர்ச் சட்டைக்குள் கருப்புச் சட்டை என்று ‘கல்கி’ கருத்துப் படம் போட்டது. தேசிய அடிப்படையிலா-  திராவிட சித்தாந்தத்தின் அடிப்படையிலா?

இந்தியாவிலேயே ஒரு கருப்புக் காக்கை இங்கே இருக்கிறது. அதைக் கல்லால் அடிக்க வேண்டும் என்று ஆச்சாரியார் ராஜாவா? சென்னைக் கடற்கரைக் கூட்டத்தில் பேசியது - எந்த அடிப்படையில் காக்கை என்றால் கருப்புத்தான்.

கருப்புக் காக்கை என்று அவர் அழுத்திச் சொன்னதன் அர்த்தம் என்ன? காமராசரை அவரின் அரசியல் எதிரி என்று திராவிட சித்தாந்தத்தின் அடிப்படையில் தானே பார்க்கிறார்?

ஏன், பாரதீய ஜனதா வடமாநிலங்களில் பேசும் அதே தொனியைத் தமிழ்நாட்டில் காட்டுவதுதானே?

தமிழ்நாட்டுப் பா.ஜ.க.வுக்கு ஒரு தமிழிசையைத் தானே தலைவராக நியமிக்க வேண்டிய அவசியம் ஏற்பட்டு இருக்கிறது, ராஜாக்களும், சோக்களும், கஜக்குட்டிக்கரணம் போட்டாலும் அந்த நாற்காலி ஒரு பிற்படுத்தப்பட்டவருக்குதானே கிடைத்திருக்கிறது இங்கே!

தமிழ்நாட்டில் 234 சட்டமன்ற உறுப்பினர்கள் என்றால் (இப்பொழது 233) பார்ப்பனர் ஒண்ணே ஒண்ணு, கண்ணே கண்ணுதானே!

எந்தக்கட்சியும் பார்ப்பனரை சீண்டாதது ஏன்?

இவை எல்லாம் இருக்கிற வரை இங்கு திராவிடச் சித்தாந்தம் உயிர் துடிப்புடன் உயர்ந்து பறக்கிறது என்று தானே பொருள்!
இந்தப் பாரதீய ஜனதாக்கள் தமிழ்நாட்டில் ஏதோ இருக்கின்றன என்று சொல்வது கூட திராவிட அரசியல் கட்சிகள்

போட்ட பிச்சைதானே!

இப்பொழுது தீட்டிய மரத்தில் கூர்ப்பாய்ச்சப் பார்ப்பது என்பது பார்ப்பனீயத்துக்கே உரித்தான மரபணு.
தருண் விஜய்களைக் காட்டி திருவள்ளுவரைக் காட்டி கூழைக் கும்பிடு போட்டாலும், குரக்களி வித்தை காட்டினாலும், அதன் ஆணி வேர் வரை ஊடுருவிச் சென்று அடையாளம் காட்டும் ஈரோட்டுக் கண்ணாடி இங்கு உண்டு - மறவாதே துக்ளக்கே - ஆரியமே!


அசோக் மேத்தா சொன்னது

1977 செப்டம்பரில் தமி ழகத்துக்கு வந்த பிரபல சோசலிஸ்டும், பொருளா தார மேதையுமான அசோக் மேத்தா அவர்கள் சென்னையில் செய்தியாளர் களிடையே பேசும்போது கீழ்க்கண்ட கருத்தைச் சொன்னார்.

தென்னகத்தில் குறிப்பாகத் தமிழ்நாட்டில் இன்றைக்கு 50 ஆண்டுகளுக்கு முன்பே பிற்படுத்தப்பட்ட மக்களின்மீது உயர்ஜாதிக்காரர்கள் செலுத்திய ஆதிக்கத்தை எதிர்த்து சுயமரியாதை இயக்கம் அறைகூவல் விடுத்தது.

பிற்படுத்தப்பட்ட மக்கள் அதிலே வெற்றி கண்டு அரசியலையும் கைப்பற்றினார்கள்.  தமிழகத்தில் ஏற்கெனவே நடந்துள்ள இத்தகைய மாற்றத்தின் எதிரொலியை அண்மையில் சில மாதங்களாக வட மாநிலங்களில் நடந்துள்ள அரசியல் மாற்றங்களில் காண முடிகிறது.

ஒடுக்கப்பட்ட, பிற்படுத்தப்பட்ட சமுதாய மக்களாக இருப்பவர்கள் விவசாயிகள்தான். அத்தகைய பிற்படுத்தப்பட்ட மக்கள் இப்பொழுது வட மாநிலங்களில் அரசியலைக் கைப்பற்றிக் கொண்டு வருகிறார்கள். வடநாட்டுக்கும் தென் னாட்டுக்கும் இடையே இப்படிப்பட்ட சிந்தனைப் பூர்வமான ஒற்றுமை ஏற்பட்டு இருக்கிறது! என்று அசோக் மேத்தா அவர்கள் குறிப்பிட்டார்கள்.

(இந்தியன் எக்ஸ்பிரஸ், 16.09.1977)

திராவிட இயக்க சித்தாந்தம் தான் வடக்குக்குத் தேவையே தவிர. திராவிட இயக்கத் தமிழ் நாட்டுக்குத் தேசிய கட்சிகள் தேவையில்லை என்பது இப்பொழுது புரிகிறதா?

பா.ஜ.க. ஆட்சியில் தலித்களுக்கு எதிராக அராஜகம் தொடர்வதால் உ.பி.யில் சுமார் ஒரு லட்சம் பேர் புத்த மதத்திற்கு மாற முடிவு செய்துள்ளனர்.

உ.பி.யில் ஒரு லட்சம் தலித் மக்களை ஒரே சமயத்தில் புத்த மதத்திற்கு மதமாற்றம் செய்யும் நிகழ்வு வரும் 14 ஆம் தேதி நடக்கிறது. இதற்கான ஏற்பாடுகள் நடந்து வருகின்றன. முசாபர்நகர் மாவட்டதில் சஹ ரான்பூர் அருகே உள்ள சாபிர்பூர் கிராமத்தைச் சேர்ந்த தலித் மக்கள் தங்களுக்கு எதிராக தொடர்ந்து மேற்கொள்ளப்படும் அராஜக போக்கிற்கு முடிவு கட்டும் விதமாக இந்த முடிவை எடுத்துள்ளனர்.

ஜெய் சிந்து சங் என்ற புத்த மத அமைப்பு இதற்கான ஏற்பாடுகளை செய்து வருகிறது. புத்த மதத்தினரின் எண்ணிக்கையை அதிகரிக்கும் வகையில் சமூக வலை தளம் உள்ளிட்ட பல வகைகளில் அந்த அமைப்பு பிரச்சாரம் மேற்கொண்டு வருகிறது. வரும் 14 ஆம் தேதி நடத்தும் நிகழ்வில் ஒரு லட்சம் பேரை மதமாற்ற திட்டமிட்டு அந்த அமைப்பு செயல்பட்டு வருகிறது.

இது குறித்து அந்த அமைப்பின் மாவட்ட செயலாளர் சிங் போத் கூறுகையில், ‘‘அனைத்து ஏற்பாடுகளும் முடிந்துவிட்டன’’ என்றார்.

டியோ பேண்ட் பிம் ஆர்மி தலைவர் தீபக்குமார் கூறுகையில், ‘‘இந்த நிகழ்வில் புத்த மதத்திற்கு மாற தலித்கள் மத்தியில் அதிக ஆர்வம் உள்ளது. இந்த நிகழ்வுக்கு மாவட்ட நிர்வாகம் அனுமதி வழங்க மறுக்கிறது. ஏற்கெனவே முசாபர்நகரில் தடை உத்தரவு பிறப்பிக்கப்பட்டுள்ளது’’ என்றார். இந்த நிகழ்வு தொடர்பான துண்டறிக்கைகள் மாவட்டம் முழுவதும் பரவலாக விநியோகம் செய்யப்பட்டு வருகிறது.

இது குறித்து மாவட்ட ஆட்சியர் கவுரி சங்கர் பிரியதர்சி கூறுகையில், ‘‘தலித்கள் மதமாற்றம் தொடர் பான துண்டு பிரசுரங்களை நான் படித்துப் பார்த்தேன். ஆனால் இது தொடர்பாக யாரும் எங்களை அணுக வில்லை. எனினும் மத ரீதியிலான நிகழ்வுகளுக்கு தடை உத்தரவு அமலில் உள்ளது. அதனால் இதுபோன்ற நிகழ்வுகளுக்கு எந்த சூழ்நிலையிலும் அனுமதி வழங்கப்படமாட்டாது’’ என்றார்.

புரன் சிங் என்பவர் கூறுகையில், ‘‘மத்தியிலும், மாநிலத்திலும் புதிய அரசு பொறுப்பேற்றது முதல் தலித்கள் மீதான மனித உரிமை மீறல்கள் அதிகரித்து வருகின்றன. நாடு முழுவதும் இந்த நிலை தான் உள்ளது. சமீபகாலமாக தாக்குதலும், அராஜகமும் அதிகரித்துள்ளன. காவல்துறையினர், தலித்கள்மீது தான் நடவடிக்கை எடுக்கின்றனர். அவர்கள் ஒரு தலைபட்சமாக நடந்து கொள்கின்றனர். இந்த நிகழ்வுகளுக்கு எதிர்ப்புத் தெரிவிக்கும் வகையில் வரும் 14 ஆம் தேதி ராத்தெடி கிராமத்தில் ஒரு லட்சம் தலித்கள் கூடி புத்த மதத்தை தழுவ முடிவு செய்துள்ளோம்’’ என்றார்.

அந்தத் துண்டறிக்கையில் தீபக்குமார் உள்ளிட்ட மூன்று பேர் கைப்பேசி எண்கள் குறிப்பிடப்பட்டுள்ளன. இது குறித்து தீபக்குமார் கூறுகையில், ‘‘துண்டறிக்கைகள் விநியோகம் செய்தது முதல் எனது கைப்பேசிக்கு தொடர்ந்து அழைப்புகள் வந்த கொண்டே இருக் கின்றன. எனது கைப்பேசி ஓய்வின்றி ஒலித்துக் கொண்டே தான் இருக்கிறது. பஞ்சாப் முதல் தமிழ் நாட்டில் இருந்தும் அழைப்புகள் வருகின்றன. தென் னிந்தியாவைச் சேர்ந்த ஒரு தலித் குழுவினர் 100 பேருடன் இந்த நிகழ்வில் கலந்துகொள்வதாக தெரிவித்துள்ளனர்’’ என்றார். முசாபர்நகர் மாவட்டம் சையோனி ஆற்றங்கரையில் உள்ள சுக்ரத்தான் முகாமில்  துண்டறிக்கைகள் விநியோகம் செய்யும் நிகழ்வு நடந் துள்ளது. மேலும், அங்கு சகாரன்பூரில் பாதிக்கப்பட்டவர்களுக்கு நன்கொடை வழங்கவேண்டும் என்ற பதாகைகள் வைக்கப்பட்டுள்ளன.

1956 அக்டோபர் 14 அன்று ஆறு லட்சம் தாழ்த்தப்பட்ட மக்களுடன் நாக்பூரில் அண்ணல் அம்பேத்கர் இந்து மதத்துக்கு முழுக்குப் போட்டு பவுத்தம் தழுவினார்.

50 ஆண்டுகளுக்குப் பிறகு பெரிய எண்ணிக்கையில் இந்து மதத்துக்கு முழுக்குப் போடுவது (ஒரு லட்சம் பேர்) இப்பொழுதுதான் நடக்கிறது.

அதுவும் பி.ஜே.பி. உத்தரப்பிரதேசத் தில் ஆட்சி அதிகாரத்திற்கு வந்த பின் இது நடக்கிறது என்பது கவனிக்கத் தக்கது.

இந்துக் கலாச்சாரம்பற்றி இரைச்சல் போடுகிறார்கள் - இந்தியா என்பது இந்து நாடு என்கிறார்கள். ஏக இந்தியா என்று ஏ அப்பா - எப்படியெல்லாம் பேசுகிறார்கள்!

இந்துக்களே ஒன்று சேருங்கள்! நாம் எண்ணிக்கையில் குறைந்து கொண்டே வருகிறோம். முசுலிம்களும், கிறித்தவர் களும் எண்ணிக்கையில் அதிகரித்துக் கொண்டே வருகின்றனர் என்று பீதி யைக் கிளப்புகின்றனர்.

சிறுபான்மையினர் பக்கம் ‘சூ’ காட் டும் இந்தக் குள்ளநரிகள் இந்துக்கள் என்று சொல்லப்படுகிற பெரும் பான்மை மக்களான தாழ்த்தப்பட்டவர் களை எப்படி நடத்துகிறார்கள்? பிற்படுத்தப்பட்டவர்கள்பற்றி இவர்களின் மதிப்பீடு என்ன?

பஞ்சமர்கள், சூத்திரர்கள் என்ற இழி பட்டங்கள்தானே! உத்தரப்பிர தேசத்தில் தன்னைச் சந்திக்க வரும் தாழ்த்தப்பட்டவர்கள் சோப்புப் போட்டுக் குளித்து விட்டு வரவேண்டும் என்று ஒரு முதலமைச்சர் சொல்லு கிறார். சோப்புகள் அரசு சார்பிலும் வழங்கப்படுகின்றன என்றால், அதன் பொருள் என்ன?

பாபா சாகேப் அண்ணல் அம்பேத் கர் விழாவை நடத்தக் கூடாது என்று கூறி விழா மேடையைத் தகர்த்தவர்கள் யார்? தாழ்த்தப்பட்ட மக்களின் வீடு களைத் தீக்கிரையாக்கியவர்கள் யார்?

பி.ஜே.பி.தானே - சங் பரிவார்களைச் சேர்ந்தவர்கள்தானே! இந்து மதத்தில் உயர்ந்த ஜாதியினர் - என்ற நிலையில் உள்ளவர்கள் அதே இந்து மதத் தினைச்சேர்ந்த தாழ்த்தப்பட்டவர் களை ஒடுக்குவது, அவர்களின் வீடு களைக் கொளுத்துவது எதைக் காட்டுகிறது?

இந்த நிலையில், ஒடுக்கப்பட்ட மக்கள் ஏன் இந்து மதத்தில் இருந்தாகவேண்டும்? என்னை வேசி மகன் என்று கூறும் இந்து மதத்தில் நான் ஏன் இருந்து தொலையவேண்டும் என்று சூத்திர மக்கள் நெஞ்சில் நெருப்புக் கனல் எரிய ஆரம்பித்து விட்டது.

இந்துவாகிய தாழ்த்தப்பட்டவர் களுக்கு எதிரி இந்த உயர்ஜாதி இந்துதானே தவிர - முசுலிம் அல்ல - கிறித்தவன் அல்ல.

ஆனால், இந்துத்துவாவாதிகள் இதை எப்படி திசை திருப்புகிறார்கள்?

முசுலிம்கள் எண்ணிக்கை பெருகி வருகிறது- கிறித்தவர்கள் எண்ணிக்கை யில் அதிகரித்து வருகிறார்கள் என்று கூறி அவர்கள் பக்கம் நம்மை ஏவி விடுகிறார்கள். இது அசல் திசை திருப்பும் எத்து வேலை!

ஒடுக்கப்பட்ட மக்கள் ‘எகிறிப் பாயவேண்டியது’ - இந்த இந்து உயர்ஜாதி கூட்டத்தை நோக்கியே தவிர -  அதன் தத்துவத்தை நோக்கி தானே தவிர - சிறுபான்மை மதத்தைச் சேர்ந்தவர்களை நோக்கியல்ல!

நம்மை இழிவுபடுத்துபவர்கள் நம்மை சகோதரர்களாகப் பாவிக்கும் சிறுபான்மையினர்மீது ஏவிவிடுகிறார் கள். ஒடுக்கப்பட்ட மக்களே உஷார்! உஷார்!!

உத்தரப்பிரதேசம் வழிகாட்டுகிறது- பார்ப்பனீய நோய்க்கு மாமருந்து பவுத்தம்தான் - ஆம்! அன்று ஆரிய வருணாசிரம வைதீக மார்க்கத்தை எதிர்த்து எழுந்த யுகத் தலைவன்தான் கவுதமப் புத்தன்.

இடையில் சூழ்ச்சியால், வஞ்சகத் தால், பவுத்தத்திற்குச் சவக்குழி வெட் டியது இந்த சாணக்கியப் பார்ப்பனக் கூட்டம். இப்பொழுது அரசியல் அதி காரத்தைப் பற்றிக்கொண்டு மறுபடியும் மனுதர்மத்தைக் கோலோச்ச வைக்கக் குடுமியை அவிழ்த்துக் கொண்டு நிர்வாண ஆட்டம் போடுகிறது.

எனவே, மீண்டும் புத்தர் தேவைப் படுகிறார். புத்த மார்க்கம் தேவைப் படுகிறது.

உ.பி. வழிகாட்டுகிறது - ஒடுக்கப் பட்ட மக்களே புத்த மார்க்கத்தைப் புதுப்பிக்க இதுவே தருணம்! தருணம்!!

அச்சம், மடம், நாணம், பயிர்ப்பு ஆகியவை வெறும் பசப்பு


உழவர் சந்தை அன்று (27.5.2017) ஒரு கலகலப்பாகத்தான் இருந்தது. மகளிரே முழுக்க முழுக்க ஆக்கிரமித்திருந்த காட்சி அது. மேட்டூர் வசந்தி, தன் பாடலைத் தொடங்குமுன் இவ்வளவு எண்ணிக்கையில் கருப்புடை தரித்த மகளிரைப் பார்க்கும் பொழுது பெருமையாக இருக்கிறது - எழுச்சியாகவும் இருக்கிறது என்று சொன்னாரே - அது நூற்றுக்கு நூறு உண்மையாகும்.

சகோதரி இரண்டு பாடல்களைத் தான் பாடினார். இன்னும் செவியில் ரீங்காரம் செய்து கொண்டுதான் இருக்கிறது இசையின்பம் மட்டுமல்ல பொருள் பொதிந்த சுருதியாகவும் இருந்தது.

அச்சம், மடம், நாணம், பயிர்ப்பு ஆகிய சொத்து வெறும் பசப்பு எனும் தொடங்கும் பாடல்

"இச்சைப் பொருளாய், போகப் பொருளாய்
இருப்பது தானா பெண் பொறுப்பு?
என்பதுதான் அந்தப் பாடல்
தேவதையும் இல்லை, தெய்வமும் இல்லை
மனுஷிதானே அம்மா நீயும்?
பிள்ளைப் பெறவே பெண்ணென்றால்
கர்ப்பப்பையை அறுத்தெறி!!

என்று தொடங்கும் இன்னொரு பாடல் ஆவேசத்தின் உச்சம்! இன்னும் பாட மாட்டாரா என்ற எதிர்ப்பார்ப்பு ஒரு பக்கம் எதிரே வந்து நிற்க - மறுபக்கம் மேடையை விட்டுச் சென்றபோது ஏமாற்றமாகவே இருந்தது.

சிவகங்கை கங்கைக்கருங்குயில் குழுவினரின் பறையாட்டம் சும்மா தூள் கிளப்பியது. பெண்கள் முழக்கம் சற்று தூக்கலாகவே இருந்தது. பறை என்றால் குறிப்பிட்ட ஜாதிக்குச் சொந்தம் -  சாவுக்குரியது என்றிருந்த நிலைப்பாட்டைத் தகர்த்ததில் திராவிடர் கழகத்திற்கு பங்கு உண்டு.

கழகத் தோழர்கள் வீட்டில் நடக்கும் திருமணம்,  புதுமனைப் புகு விழாக்களில் எல்லாம் சும்மா புகுந்து விளையாட ஆரம்பித்து விட்டனர் எம் தோழர்கள். எதிலும் புரட்சி என்பது தானே கருஞ்சட்டைச் சேனையின் தனி நடை உடைப் பாவனைகள்!

பறையாட்டத்தோடு முடிந்து விடவில்லை; கங்கைக் கருங்குயில் குழுவில் இடம் பெற்ற பெண்களில் சிலம்பாட்டம் சீறியது - ஆணுக்கென்று தனி உடைமை ஏதும் இல்லை என்று நிறுவுவதுதானே பெண்களின் போர்க் குணமாக இருக்க வேண்டும் என்பதற்கான அடையாளம்தான் அது.

சிறுமி யாழினியின் தூங்கும் புலியை என்று தொடங்கும் புரட்சிக் கவிஞர் பாடலுக்கான நடனம் எல்லோர் கவனத்தையும் ஈர்த்தது. திருச்சி மாவட்ட திராவிடர் கழகத் தலைவர் மானமிகு கணேசன் அவர்களின் மகள்தான் அவர்.

(சில நாட்களுக்கு முன்தான் கழகத் தலைவர் முன்னிலையில் அரங்கேற்றம் நடந்தது என்பது குறிப்பிடத்தக்கது).

சின்ன உடல் அதில் அன்ன நடையில்லை புலியின் பாய்ச்சல் காணப்பட்டது. (பாராட்டுகள் - வாழ்த்துகள்)

ஈரோடு சிறுவர்கள் ச. இராவணன் - ச. எழிலன் ஆகியோரின் கேள்வி பதில் உரையாடல்களை இரசிக்காதவர்கள் யாருமே இருக்க முடியாது எல்லாமே நறுக்குகள்தான் நச்சென்றசொல்லாடல்கள்தாம்!

அவ்வையார் வந்தார்

மறைந்த இலட்சியக் கவிஞர் இன்குலாப் எழுதிய அவ்வையார் நாடகம் (பேராசிரியர் மங்கை அவர்களின் இயக்கம்) புதுமையாகவே இருந்தது. அவ்வையாரை நோக்கிப் பல கேள்விக் கணைகள் சுருக்சுருக்கென்று இருந்தன. உண்டிச் சுருங்குதல் பெண்டிர்க்கழகு என்று பாடியிருக்கிறார் அவ்வைப் பாட்டி, ஏன் ஆணுக்கு அது அழகில்லையா? என்பது போன்ற இடக்கு முடக்கான கேள்விகள்.
நாடகத்தில் பங்கு பெற்றவர்கள் எல்லாம் சென்னையைச் சேர்ந்த கழகக் கண்மணிகள்தான். அதிலும் பெரியார் திடலைச் சேர்ந்தவர்கள்தான்.

பா. மணியம்மை, பவானி, யாழினி, அஞ்சு, உடுமலை வடிவேல், ஓவியச் செல்வன், பொழிசை, கண்ணன், சீர்த்தி, இனநலம், தொண்டறம், நதியா, வேலவன் ஆகியோரின் நடிப்பும் நகைச்சுவையும் தொழில் ரீதியான நடிகர்களே பிச்சை வாங்க வேண்டும் போங்க!. ஒப்பனை: தென் சென்னை மகளிர் அணி தலைவர் கனகா (ஒட்டு மொத்தத்தில் சபாஷ்! சபாஷ்!!)

தொடர்ந்து பத்தாம் வகுப்பிலும், +2 தேர்விலும் வெற்றி பெற்ற கழகக் குடும்பத்தைச் சேர்ந்த இருபால் மாணவர்களுக்கும் பாராட்டுச் சான்றிதழை கழகப் பொதுச் செயலாளர்கள் வீ. அன்புராஜ், தஞ்சை இரா. ஜெயக்குமார் வழங்கினார்.

உயர்ந்தது கழகக் கொடி!

கழகக் கொடியினை "பெரியார் களம்" அமைப்பின் தலைவர் இறைவி உயர்த்தினார்.

கழக மகளிர்ப் பாசறை மாநில செயலாளர் கோ. செந்தமிழ்ச் செல்வி வரவேற்புரையாற்றிட பகுத்தறிவாளர் கழக செயல் தலைவர் தகடூர் தமிழ்ச்செல்வி மாநாட்டினைத் திறந்து வைத்து உரையாற்றினார்.

உரை வீச்சு

போர்த்தொடுப்போம்! வேரறுப்போம்!! எனும்  பொதுத் தலைப்பின்கீழ் மூடநம்பிக்கைகள் என்னும் பொருளில் சென்னை மண்டல மாணவரணிச் செயலாளர் பா. மணியம்மை பாலியல் வன்கொடுமைகளை எனும் பொருளில் சே.மெ. மதிவதனி ஜாதி வெறிக் கொடுமைகளை என்றும் எனும் பொருளில் தேன்மொழி, தாராளமயமாக்குதல் எனும் பொருளில் வழக்குரைஞர் பானுமதி ஆகியோர் சிறப்பாக உரை மழை பொழிந்தனர்.

மணிமணியான 36 தீர்மானங்கள்

பெண்களின்  உரிமை குறித்த வகையிலும், மீட்சிப் பெற வேண்டிய உணர்வின் அடிப்படையிலும் பல்துறைகளையும் திசைகளையும் உள்ளடக்கிய 36 தீர்மானங்கள் நிறைவேற்றப்பட்டு அவை மாநாட்டின் மகுடமாக ஒளி வீசின. தோழர்கள் செந்தமிழ்ச்செல்வி, பொறியாளர் இ.சா. இன்பக்கனி, க. தேன்மொழி, கோவை ப. கலைச்செல்வி சேலம் கமலம், வேண்டா தீனதயாளன், வசந்தி கிருஷ்ணன் ஆகியோர் தீர்மானங்களை முன்மொழிந்தனர். பலத்த கரஒலிக்கிடையே 36 தீர்மானங்களும் நிறைவேற்றப்பட்டன.

மாநாட்டுத் தலைவர் டாக்டர் பிறைநுதல்செல்வி

மாநாட்டுத் தலைவரும் கழகப் பொருளாளருமான டாக்டர் பிறைநுதல் செல்வி அவர்கள் சுருக்கமாக பெண்கள் உரிமையில்தான் மண் உரிமை இருக்கிறது.  பெண்கள் விளம்பரப் பொருளாக, நுகர்வுப்பொருளாகச் சித்தரிக்கப்படுகின்றனர். அழகுப் போட்டி  நடத்துகின்றனர். இவை ஒழிக்கப்பட வேண்டும். மூடநம்பிக்கை காரணமாக சாமியார்களின் பின்னால் பெண்கள் ஒடுவது தடுக்கப்பட்டாக வேண்டும். ஜாதி ஆவணக் கொலைகளை எதிர்த்துப் பெண்களே முன் வந்து போராடவும் வேண்டும் என்றும் குறிப்பிட்டார்.

திராவிடர் கழகத் துணைத் தலைவர் கலி. பூங்குன்றன் தமதுரையில் பெண்ணுரிமைக்குத் தடையாக இருப்பது இந்துத்துவாவே! பெண்கள் வீட்டு வேலைக்குத் தான் லாயக்கு என்று உச்சநீதிமன்ற தலைமை நீதிபதியாக இருந்த ரெங்கநாத் மிஸ்ரா சொன்ன நிலையில், அவர் காஞ்சிபுரம் சங்கராச்சாரியாரைச் சந்திக்க வருகிறார் என்பதை அறிந்து கருப்புக் கொடி காட்டிட கழக மகளிர் அணியினர் கிளர்ந்தெழுந்ததால் உச்சநீதிமன்ற தலைமை நீதிபதி பயணத்தை ரத்து செய்து திரும்பியதை நினைவுபடுத்தினார்.

ஆர்.எஸ்.எஸ். தலைவர் மோகன் பகவத், ஆண்களுக்கு நிகராக படிப்பதாலும் கை நிறைய பணம் சம்பாதிப்பதாலும் பெண்கள் ஆண்களுக்குக் கட்டுப்பட மறுக்கிறார்கள்;  ஒரு வகை ஈகோ ஏற்படுகிறது. அந்த நிலையில் ஆண்கள் விவாகரத்து செய்ய முன் வர வேண்டும் என்று கூறியதை எடுத்துக்காட்டி, இந்துத்துவா பார்வையில் பெண் என்பவர் எந்த இடத்தில் வைக்கப்படுகிறார் என்பதை எடுத்துக்காட்டினார்.

பெண்களுக்கு தேவையான நாப்கினுக்கு 12 சதவீத வரியும், இந்து மதச் சின்னமான குங்குமம், பொட்டு முதலியவைகளுக்கு வரி விலக்கும் ஜி.எஸ்.டி. வரியில் அளிக்கப்பட்டு இருப்பதை எடுத்துக்காட்டி, மத்தியில் உள்ள பிஜேபி ஆட்சி எதிலும் இந்துத்துவா கண்ணோட்டத்தோடு செயல்படுவதை எடுத்துக் காட்டினார்.

மாநாட்டு வரவேற்புக் குழுவின் சார்பில் சால்வைக்குப் பதில் கழகத் தலைவருக்கு வேலூர் மாவட்ட மகளிரணி தலைவர் ச. ஈஸ்வரி விடுதலை சந்தாவை வழங்கினார்.

கழகப் பொதுக் குழு உறுப்பினர் சே. கிரேசி நன்றி கூறினார்.

தமிழர் தலைவரின் கருத்துரை

கழகத் தலைவர் ஆசிரியர் கி. வீரமணி அவர்கள் மாநாட்டு நிறைவுரையை இரவு 9 மணிக்குத் தொடங்கினார். மாநாடு தொடங்கப்படுவதற்கு முன் சிறப்பான வகையில் கலை நிகழ்ச்சிகள் நடைபெற்றன. மாநாட்டில் மட்டுமல்ல - நாம் நடத்தும் கழகக் கூட்டங்களில்கூட இடையிடையே கலை நிகழ்ச் சிகள் பாடல்கள் இடம் பெற வேண்டும் சோவியத்து ஒன்றியத்திற்கு நான் சென் றிருந்தபோது இந்த நிலையை நேரில் பார்த்தேன்.

நமது வீதி நாடக வித்தகர் சித்தார்த்தன், செந் தமிழ்ச்செல்வி ஆகியோர் இதில் கவனம் கொள்ள வேண்டும் என்றும் கேட்டுக் கொள்கிறேன்.

மாநாட்டில் நிறைவேற்றப் பட்ட 36 தீர்மானங்களும் மற்றவர்களால் எளிதில் சீரணிக்கப்பட முடியாதவை ஊடகத்தைச் சேர்ந்தவர்கள் கூட எந்த அளவுக்கு வெளியிடுவார்கள் என்று சொல்ல முடியாது. நீதிக்கட்சி, சுயமரியாதை இயக்கம், காலந்தொட்டு நமது மாநாடுகளில் நிறைவேற்றப்பட்டுள்ள தீர்மானம் ஒவ்வொன்றும் பிற்காலத்தில் அரசின் சட்டங்களாக ஆக்கப்பட்டுள்ளன (பெண்களுக்கு சொத்துரிமை, கல்வி உரிமை, விதவைப் பெண்களுக்கு மறுமணம், விவாகரத்துரிமை போன்றவை நம் மாநாட்டுத் தீர்மானங்கள் இப்பொழுது சட்டங்களாக வடிவம் பெற்று மக்கள் அனுபவித்தும் வருகிறார்களே!)

பெண்களைப் பாலியல் பண்டமாகப் பார்க்கிறார்களே தவிர, உரிமைப் படைத்தவர்களாக பார்ப்பதில்லை என்பதை இடித்துச் சொன்ன கழகத் தலைவர் அவர்கள் நாட்டில் அறிவுப் போட்டிதான் தேவையே தவிர, அழகுப் போட்டியல்ல.

இரு கைகள் பலமாக இருக்க வேண்டும், இரு கால்கள் பலமாக இருக்க வேண்டும், இரண்டு கண்களின் பார்வையும் சம அளவில் இருக்க வேண்டும். அதேபோலத்தான் ஆண் பெண் இரு பாலரும் சமத்துவம் உள்ளவராக இருந்தால் தான் சமுதாயமும் வலிமையோடு இருக்க முடியும்.

பெண்களுக்கு வாய்ப்பு கொடுத்தால், சாதித்துக் காட்டுவார்கள், பத்தாம், வகுப்பு, பன்னிரெண்டாம் வகுப்புத் தேர்வுகளில்கூட மாணவர்களைவிட மாணவிகளின் தேர்ச்சி விகிதம்தான் அதிகம்.

நம் நாட்டில் வளர்ப்பில் கூட ஆண் பிள்ளைகளுக்கு ஒரு மாதிரி, பெண் பிள்ளைகளுக்கு இன்னொரு அளவுகோல்தான்; பொம்மை வாங்கி கொடுப்பதிலிருந்து, உணவு கொடுப்பது வரை பாரபட்சம் உண்டு.

தந்தை பெரியார் சகாப்தம் பெண்ணுரிமை சகாப்தம்! தந்தை பெரியாரை அடையாளம் கண்டு பெரியார் என்று பட்டம் கொடுத்தவர்களே பெண்கள்தானே!

பெண்களைப் பற்றி தந்தை பெரியார் சிந்தித்த அளவுக்கு வேறு யாரும் சிந்தித்ததேயில்லை. தந்தை பெரியாரின் "பெண் ஏன் அடிமையானாள்" எனும் ஒப்பரிய நூலை கழக மகளிர் அணியினர், பாசறையினர் வீட்டுக்கு கொண்டு போய் சேர்க்க வேண்டும். ஒவ்வொரு வீட்டிலும் தந்தை பெரியார் படம் பெற வேண்டும். பெண்களுக்கு இலக்கணம் என்று எதை வைத்தார்கள். அச்சம், மடம், நாணம், பயிர்ப்பு என்று சொல்லி வைத்தனர். மற்ற மூன்றிற்கும் பொருள் சுலபமாக விளங்கும் கடைசியாக சொன்ன பயிர்ப்பு என்பதற்கு என்ன பொருள் என்று யாருக்குத் தெரியும்?

அகராதி என்ன சொல்லுகிறது? அதன் பொருளை தந்தை பெரியார்  அவர்கள் எடுத்துச் சொன்ன போது அதிர்ந்தே போனார்கள். பயிர்ப்பு என்ற சொல்லுக்கு என்ன பொருள் தெரியுமா? அசிங்கம், அருவருப்பு என்று பொருளாகும்?

பதிவிரதை என்று வைத்துள்ளார்களே தவிர பதிவிரதன் என்ற சொல் வழக்கில் உண்டா? கற்பில்கூட தலைக் கற்பு, இடைக் கற்பு, கடைக் கற்பு என்று பிரித்து வைத்துள்ளார்களே.

திருவள்ளுவரைக்கூட விட்டு வைக்கவில்லை தந்தை பெரியார்.

தெய்வம் தொழாஅள் கொழுநன் தெழுதெழுவாள்

பெய்யெனப் பெய்யும் மழை என்ற குறளில்

பெண்ணானவள் கணவனைத் தொழுது எழ வேண்டும், என்று திருவள்ளுவர் சொன்னதில் தந்தை பெரியாருக்கு உடன்பாடு இல்லை அதை வெளிப்படையாகவும் கூறி வந்திருக்கிறார்.

கணவன் இறந்து விட்டால் மனைவியை அவளோடு தீயில் வைத்து எரிக்க வேண்டும் என்ற சதி, உடன்கட்டை ஏறுதல் வழக்கத்தில் இருந்ததற்குக் காரணமே - கணவன் மரணம் அடைந்த பிறகு, மனைவி வேறு ஜாதியில் மறுமணம் செய்து கொண்டால் வர்ணம் கெட்டுப் போய் விடும் அல்லவா அதனால்தான்; கீதையும் அதைத்தான் கூறுகிறது என்று விரிவாக எடுத்துரைத்தார் கழகத் தலைவர். சரியாக ஒரு மணிநேரம் அவரின் நிறைவுரை  அமைந்திருந்தது.

இம்மாநாட்டு வெற்றிக்கு வீறு கொண்டு  உழைத்த மகளிர் அணி, மகளிர்ப் பாசறை பொறுப்பாளர்கள் திருச்சி மண்டல மாவட்ட, நகரக் கழகப் பொறுப்பாளர்களைப் பாராட்டுகிறோம்! பாராட்டுகிறோம்!!



இருவருக்கு விருதுகள்

பெண்ணுரிமைப் பாதுகாப்பு மாநாட்டில் இரு பெண்மணிகளுக்குப் பாராட்டும் விருதும் வழங்கப்பட்டது. அதில் ஒருவர் திருநங்கை, மங்கை பானு ஆவார். திருநங்கையரில் முதல் பட்டதாரி இவர் ஆவார். அடக்குமுறை, ஒடுக்குமுறைகளுக்கு ஆளாக்கப்படும் திரு நங்கைகளுக்கு குரல் கொடுக்கும் போராளியாவார். திருநங்கைகளுக்கு இடஒதுக்கீடு வேண்டும் என்பதற்காகவும் போராடி வரக் கூடியவர் ஆவார். அவருக்கு சால்வை போர்த்தி விருது வழங்கிச் சிறப்பித்தார் தமிழர் தலைவர்.

கருப்புடை தரித்த பெரியார் இயக்கத்தைச் சேர்ந் தவர்கள் சமத்துவத்துக்காகப் பேராடக் கூடியவர்கள் அந்த இயக்கத்தின் சார்பில் அதன் தலைவர் கையால் விருது பெறுவதைப் பெரும் பேறாகக் கருதுகிறேன் என்று தன் ஏற்புரையில் இரத்தினச் சுருக்கமாகச் சொன்னார்.

ஆர். தங்காத்தாள்

இரண்டாவதாக பாராட்டும் விருதும் அளிக்கப் பட்டவர். திருச்சி பெரியார் கல்வி நிறுவனங்களின் ஒருங்கிணைப்பாளர் ஆர். தங்காத்தாள் ஆவார். திராவிடர் கழகத் துணைத் தலைவர் கலி. பூங்குன்றன் அவரை அறிமுகப்படுத்தினார்.

சிறுவயதில் அவரின் பெற்றோர்களால் திருச்சி நாகம்மையார் இல்லத்தில் கொண்டு வந்து விடப்பட்டவர் அந்த இல்லத்திலேயே வளர்க்கப்பட்டு, படித்து, கல்வி முடிந்த பின்னர் பெரியார் ஆசிரியர் பயிற்சிப் பள்ளியிலேயே எழுத்தராகப் பணியாற்றினர். எந்த நாகம்மையார் குழந்தைகள் இல்லத்தில் வளர்ந்தாரோ, அந்த இல்லத்திற்கே தாளாளராகவும் வந்தார் என்றால், அதன் சிறப்பை தெரிந்து கொள்ளலாம்.

ஓய்வுக்குப் பிறகு திருச்சி பெரியார் கல்வி நிறுவனங்களின் ஒருங்கிணைப்பாளராகப் பொறுப்பில் அமர்த்தப்பட்டுள்ளார். அர்ப்பணிப்பும் உழைப்பும், நாணயமும் நிறுவனத்திற்கும், தலைமைக்கும் உண்மையான விசுவாசமும், கொண்டு பணியாற்றும் ஒருவருக்குத்தான் இந்தப் பாராட்டும், விருதும் கிடைக்கும் என்று கூறினார். கழகத் தலைவர் அவர்கள் தோழர் தங்காத்தாள் அவர்களுக்குச் சால்வை அணிவித்து விருதும் வழங்கினார்.

விருது பெற்ற இருவரையும் கழகத் தலைவர் பாராட்டினார். திருநங்கை என்றால் ஒதுக்கப்பட்டவர்கள் என்ற நிலை மாறி வருகிறது. அதிலும் படித்தவர்கள் வர ஆரம்பித்து விட்டனர். தான் மட்டும் வாய்ப்புப் பெற்றதோடு நில்லாமல் அந்தத் திருநங்கைகளின் உரிமைக்காகவும், வளர்ச்சிக்காகவும்,மங்கை பானு அவர்கள் பாடுபடுவது பாரட்டுக்குரியது. முதன் முதலாக ஒரு திருநங்கைக்கு டாக்டர் பட்டம் கொடுத்தது பெரியார் மணியம்மைப் பல்கலைக் கழகம்தான்.

தங்காத்தாளுக்கு விருது வழங்குவதில் மகிழ்ச்சி அடைகிறேன். இந்த நேரத்தில் தந்தை பெரியார் அவர்களுக்கு உதவியாளராக, தன் வாழ்வை ஒப்படைத்துக் கொண்டு நாகம்மையார் இல்லத்துப் பிள்ளைகளுக்கு உடன் பிறவா அண்ணனாக விளங்கிய புலவர் இமயவரம்பன் அவர்களை நினைத்துப் பார்க்கிறேன்.

அந்த இல்லத்தில் வளர்ந்த 32 பெண்களுக்குத் திருமணம் செய்து வைத்துள்ளோம். வேறு எந்த இல்லத்திலும் இதனைக் கேள்விப்பட்டிருக்க முடியாது.

மதுரை உயர்நீதிமன்றத்தில் ஒரு நீதிபதி சொன்னது நினைவிற்கு வருகிறது. குறிப்பிட்ட சில பிள்ளைகளை எங்கு சேர்ப்பது என்ற பிரச்சினை வந்தபோது திருச்சியில் உள்ள நாகம்மையார் குழந்தைகள் இல்லத்தில் சேருங்கள் என்று ஒரு உயர்நீதிமன்ற நீதிபதி சொல்லும் அளவுக்கு அன்னை நாகம்மையார் இல்லம் சிறப்பாகச் செயல்பட்டு வருகிறது.

அந்த இல்லத்தின் வளர்ச்சிக்கும் சிறப்பிற்கும் காரணமாக இருப்பவர் தங்காத்தாள் ஆவார். தந்தை பெரியார், அன்னை மணியம்மையார் ஆகியோரால் அடையாளம் காணப்பட்ட எவரும் சோடை போனது கிடையாது.

இதுவரை செய்த பணிக்கும், இனி செய்ய வேண்டிய பணிக்கும் சேர்த்துதான் இந்தப் பாராட்டு என்று குறிப்பிட்டார் கழகத் தலைவர்.

 

தென்னாட்டைப் பிரிக்கப் போகிறார்களா?

 

மண்ணின் மைந்தர்கள் குரலை எழுப்பிய மல்லிகார்ஜுன் கார்கே, நிறவெறிப் பேச்சிற்கு எதிராக மீண்டும் தன்னுடைய போர்க்குணத்தை காட்டினார். தொடர்ந்து நிறவெறிப் பேதத்தை எங்கள்மீது காட்டி வந்தால் தென்னகம் தனியாக பிரிந்து செல்லும் என்று எச்சரிக்கை செய்துள்ளார்.

தென் மாநிலங்கள் தனிநாடாகப் பிரிய நேரிடும் என்று மக்களவை காங்கிரஸ் குழுத் தலைவர் மல்லி கார்ஜூன கார்கே எச்சரிக்கை விடுத்துள்ளார். தென் இந்தியர்களை கறுப்பர்கள் என பாஜக முன்னாள் எம்.பி. தருண் விஜய் குறிப்பிட்டதற்கு அவர் இவ்வாறு கூறியுள்ளார். டில்லியில் அண்மையில் ஆப்பிரிக்கா மாணவர்கள் தாக்கப்பட்டது சம்பவம் பெரும் சர்ச்சையை ஏற்படுத்தியது.

இது தொடர்பாக தொலைக்காட்சி நிறுவனத்துக்கு பாஜக முன்னாள் எம்.பி. தருண் விஜய் அளித்த பேட்டியில்,

‘‘இந்தியர்கள் இனவெறியர்கள் இல்லை. நாங்கள் இனவெறியர்களாக இருந்தால் எப்படி தென்னிந்திய மக்களுடன் இணைந்து வாழ முடியும்? இந்தியாவிலும் கறுப்பர்கள் உள்ளனர். எங்களைச் சுற்றியும் கறுப்பின மக்கள் உள்ளனர்’’ என்று இனவெறியைத் தூண்டும் வகையில் அவர் கூறியிருந்தார்.

இந்த விவகாரம் மக்களவையிலும் எதிரொலித்தது. இதுகுறித்து  எதிர்க்கட்சி குழு தலைவர் மல்லிகார்ஜுன கார்கே பேசுகையில்,

தென்னிந்திய மாநிலங்களை சேர்ந்தவர்கள் இந்தி யர்களா? இல்லையா? என அரசு விளக்கமளிக்க வேண்டும் என காட்டமாகக் கேள்வி எழுப்பினார்.

மேலும் தென் மாநிலங்களை பற்றி தவறாக பேசிய தருண் விஜய்மீது நடவடிக்கை எடுக்கவேண்டும் எனவும் இது போன்ற பேச்சுக்களை அனுமதித்தால் தென் மாநிலங்கள் தனி நாடாக பிரிந்து செல்ல முற்படும் என்றும் எச்சரிக்கை விடுத்தார் மல்லி கார்ஜூன கார்கே.

கார்கே பேச்சுக்கு எதிர்கட்சிகளின் மற்ற எம்பிக் களும் ஆதரவாக குரல் கொடுத்தனர். இதனால் அவையில் பெரும் பரபரப்பு ஏற்பட்டது.

ஆரியர்கள் எந்த ஒரு காலத்திலும் தங்களை மண்ணின் மைந்தர்களோடு ஒப்பிட்டுப் பேசுவதே கிடையாது, அவர்களைப் பொறுத்தவரை திராவிடர்கள் அவர்களுக்கு இன்றளவும் பகையாளிகள்தான்; சூத்திரர்கள் தான் இதை அண்ணல் அம்பேத்கர் மற்றும் தந்தை பெரியார் 70 ஆண்டுகளுக்கு முன்பே சுட்டிக்காட்டியுள்ளனர்.

ஒரு ஜெர்மானியருக்கு ஒரு பிரஞ்சுக்காரன் எப்படி அன்னியனோ, ஒரு வெள்ளைக்காரனுக்கு ஒரு நீக்ரோ எப்படி அன்னியனோ, அதுபோலவே பார்ப்பான் - அடிமை வகுப்பினர்களான சூத்திரர்களுக்கும், தீண்டத்தகாதவர்களுக்கும் அன்னியனாவான். இவர்களுக்கு அன்னியர்கள் மட்டுமல்ல. அவர்களுக்கு விரோதியாகவும் இருக்கிறான் என்று கூறுகிறார், பாபா சாகேப் அண்ணல் அம்பேத்கர். (ஆதாரம்: காந்தியும் காங்கிரசும் தீண்டப்படாதவர்களுக்குச் செய்ததென்ன எனும் நூல்).

இதே கருத்தைத் தந்தை பெரியார் அவர்கள் வேறு சொற்களில் தத்துவார்த்தமாகச் சொல்லியுள்ளார்.

என்னை அடிமை என்பவனும், வைப்பாட்டி மகன் என்பவனும், கிட்ட வர வேண்டாம், தொட வேண்டாம் என்பவனும் - கிட்ட வந்தாலே, கண்ணில் பட்டாலே தோஷம் என்பவனும் நான் தொட்டதைச் சாப்பிட்டால் - என் எதிரில் சாப்பிட்டால் நரகன் என்பவனும் அந்நியனா? அல்லது உனக்கும், எனக்கும் வித்தியாசம் இல்லை, தொட்டாலும் பரவாயில்லை நாம் எல்லோரும் சமம்தான் என்று சொல்லுகிறவன் அந்நியானா? என்பதை யோசித்துப் பாருங்கள் என்றார் பகுத்தறிவுப் பகலவன் தந்தை பெரியார் (‘குடிஅரசு’,6.9.1931)

மறக்க முடியாத நவம்பர் 25 2015

மதச்சார்பின்மை தொடர்பான விவாதத்தின் போது உள்துறை அமைச்சருக்கு பதிலளித்த மல்லிக்கார்ஜுன கார்கே கூறியதாவது (25.11.2015).

அம்பேத்கர் அரசமைப்புச் சட்டத்தில்

மதச் சார்பின்மை என்ற வார்த்தையைச் சேர்க்க எவ் வளவோ முயற்சி செய்தார். ஆனால், நாடாளு மன்றத்தில் இருந்த பார்ப்பனர்கள் அதற்கு கடுமையான எதிர்ப்பைத் தெரிவித்தார்கள்.

‘‘அம்பேத்கரும், நாங்களும் இந்த நாட்டின் பூர்வீகக் குடிமக்கள் - மண்ணின் மைந்தர்கள்! ஆரியக் கூட் டமே ஆடு மாடுகளை ஓட்டிக் கொண்டு இங்கு வந்தது. எங்களுக்குத்தான் இந்த மண்ணின் உரிமை உள்ளது. ஆயிரம் ஆண்டு காலமாக ஆரியர்களின் கொடுமைகளைச் சகித்து வந்தோம்!’’ என்று ஆர்ப்பரித்தார்.

தந்தை பெரியாரின் குரல் நாடாளு மன்றத்திலும் ஒலிக்கத் தொடங்கி விட்டது.

நம்மைப் பார்த்து பிரிவினைவாதி என்றவர்கள் இப்பொழுது மக்களவை எதிர்க்கட்சித் தலைவர் (காங்கிரசு) மல்லிகார்ஜூன கார்கே தென்னாடு பிரியும் என நாடாளுமன்றத்திலேயே அறிவித்துள்ளாரே, என்ன பதில்?

நம்மைப் பார்த்து இனவாதம் பேசு வதாகச் சொல்லுகிறார்களே - ஆரியர் கள் இங்கு வந்து குடியேறியவர்கள் - நாங்கள்தான் இந்நாட்டு மண்ணின் மைந்தர்கள் என்று சிங்கநாதம் செய்துள்ளாரே நாடாளுமன்றத்தில் - எண்ணிப் பார்த்தீர்களா?

தந்தை பெரியார் மறைந்திருக்கலாம் - அவர்கள் ஊட்டிய திராவிட சித்தாந்தக் குரல் நாடாளுமன்றத்திலேயே எதிரொ லிக்கிறதே - பார்த்தீர்களா - பார்த்தீர் களா?

வடநாடு - தென்னாடு

ஆரியர் - திராவிடர்

இது வரலாறு - மாற்றியமைக்க முடியாது - இது கல்வெட்டு!

இந்தியா ஒரே நாடு - ஒரே கலாச் சாரம் - ஒரே மொழி என்ற சப்பைக் கட்டுகள் எல்லாம் செல்லுபடியாகாது!

தந்தை பெரியாரின் திராவிட சித் தாந்தம் நாடாளுமன்றம்வரை சென்று விட்டதே!

மகிழ்ச்சி! மகிழ்ச்சி!!

Banner
Banner